វៀតណាម​ដាក់​ពង្រាយ​ប៉ូលិស​ជិត ២០០ ​នាក់ ដើម្បី​បង្ក្រាប​អ្នក​ចាប់​ជំរិត

កាលពីព្រឹកថ្ងៃអង្គារ ទី១៥ ខែសីហា ប៉ូលិសប្រមាណ ២០០ នាក់ បានបង្ក្រាបអ្នកចាប់ជំរិតក្មេងអាយុ ៧ ឆ្នាំ ក្រោយការតាមដានអស់រយៈពេល ១០ ម៉ោង ។

ជន​ចាប់​ជំរិត​មានឈ្មោះថា Nguyen Duc Trung អាយុ ៣១ ឆ្នាំ រស់នៅ​ខេត្ត Vinh Phuc ភាគ​ខាងជើង​ប្រទេស​វៀតណាម ។

នាយកដ្ឋានសន្តិសុខសាធារណៈទីក្រុងហាណូយបាននិយាយថា នៅម៉ោង ៧ និង ៤០ នាទី យប់ថ្ងៃចន្ទ ស្ត្រីនៅទីក្រុង Viet Hung ម្នាក់បានរាយការណ៍ប្រាប់ប៉ូលិសក្នុងសង្កាត់ Viet Hung Ward ថាបាត់កូន ។

ក្នុងករណីនេះ ក្មេងប្រុសរងគ្រោះត្រូវបានបុរសពាក់ម៉ាស់ចាប់ដាក់ក្នុងឡាន កាលពីល្ងាចថ្ងៃចន្ទមែន ។ មិនតែប៉ុណ្ណោះជនចាប់ជំរិតទារប្រាក់លោះដល់ទៅ ៦២៧ ៨៨៥ ដុល្លារអាមេរិក ដើម្បីសងបំណុលគេ ។

មិនយូរប៉ុន្មានប៉ូលិសប្រមាណ ២០០ នាក់ បានចេញប្រមាញ់ជនសង្ស័យនៅកន្លែងប្រគល់ប្រាក់ ប៉ុន្តែគាត់តែងតែផ្លាស់ទីឥតឈប់ឈរដើម្បីគេចខ្លួន ។ គាត់ថែមទាំងបើករថយន្ដពាក់ស្លាកលេខក្លែងក្លាយទៀតផង ទើបសមត្ថកិច្ចពិបាកតាមដានយ៉ាងខ្លាំង ។

លុះដល់ពេលប្រគល់លុយបានសម្រេច គឺគេប្រព្រឹត្តទៅនៅសួនឧស្សាហកម្ម Dong Van ក្នុងខេត្ត Ha Nam ចម្ងាយប្រហែល ៦០ គីឡូម៉ែត្រពីទីក្រុងហាណូយ ។

ក្រោយ​ពី​ពិនិត្យ​មើលប្រាក់គ្រប់​ហើយ គាត់​បាន​ដោះលែង​ក្មេង​ប្រុសតាមពាក្យសម្ដីរួច​បើក​រថយន្ត​ចេញ​ទៅ​បាត់ ។

នៅពេលដែលលោក Trung ត្រូវបានឡោមព័ទ្ធ គាត់បានបាញ់លោកឧត្តមសេនីយ៍ Nguyen Anh Tuan ឲ្យរងរបួស ។ ទីបំផុតគាត់​ត្រូវ​បាន​ឃុំ​ខ្លួន​នៅ​ម៉ោង ៥ ព្រឹក​ថ្ងៃ​អង្គារ ទី១៥ ដោយជោគជ័យ ៕

ប្រែសម្រួល៖ វារី

ប្រភព៖ tuoitrenews

ចាប់ខ្លួនស្ត្រីវៀតណាមពីបទទិញទារកក្នុងតម្លៃ ៧១៥ ដុល្លារ ដើម្បីលក់បន្ត