ចាប់ខ្លួនស្ត្រីវៀតណាមពីបទទិញទារកក្នុងតម្លៃ ៧១៥ ដុល្លារ ដើម្បីលក់បន្ត

ប៉ូលិសនៅទីក្រុងហូជីមិញបានចាប់ខ្លួនស្ត្រីវ័យ ៣៦ ឆ្នាំម្នាក់ឈ្មោះ Le Hong Anh ពីបទទិញទារកដែលឪពុកម្ដាយបោះបង់ចោល ហើយលក់បន្តទៅឲ្យស្វាមីភរិយាដែលមិនអាចមានកូនបាន ។

បើតាមប៉ូលិសបានឲ្យដឹងថា Anh បានប្រើប្រាស់បណ្ដាញសង្គម Facebook និង Zalo ដើម្បីស្វែងរកម្តាយរូបណាដែលមិនចង់ទុកកូនរបស់ពួកគេ ហើយទិញទារកនោះយកទៅលក់បន្តឲ្យគូស្នេហ៍ដែលចង់មានកូន ។

ទន្ទឹមនោះ របៀបបញ្ចុះបញ្ចូលប្រព្រឹត្តទៅតាមដំណាក់កាលផ្សេងៗគ្នា រួមទាំងអំឡុងពេលស្ត្រីជាម្ដាយមិនទាន់សម្រាលនៅឡើយផងដែរ ។ ទោះជាយ៉ាងណា បន្ទាប់ពីមានការព្រមព្រៀងគ្នាហើយ Anh នឹងនាំពួកគេទៅផ្ទះជួលមួយកន្លែងហើយរង់ចាំដល់ពេលសម្រាល ខណៈក្រៅពីទិញទារកមិនទាន់សម្រាល មេខ្យល់រូបនេះក៏ទិញពីអ្នកទើបនឹងកើតផងដែរ ។

លុះដល់ថ្ងៃសម្រាល ពួកគេកុហកមន្ទីរពេទ្យថា បាត់អត្តសញ្ញាណប័ណ្ណទាំងអស់ដោយការធ្វេសប្រហែស ហើយផ្ដល់អត្តសញ្ញាណប័ណ្ណក្លែងក្លាយជំនួសវិញ ទើបពេទ្យចេញសំបុត្របញ្ជាក់កំណើតដល់ទារក ។ ជំហានបន្ទាប់ Anh ស្វែងរកគូស្វាមីភរិយាណាដែលមានបំណងចង់បានកូន ហើយស្នើលក់កូនឲ្យពួកគេតែម្ដង ។

សូមជម្រាបថា ប៉ូលិសបានចាប់ខ្លួននាង Anh អំឡុងពេលកំពុងទិញក្មេងប្រុសអាយុ ១ ខែម្នាក់ក្នុងតម្លៃ ៧១៥ ដុល្លារអាមេរិក ព្រោះម្តាយបង្កើតដែលមកពីខេត្ត Ben Tre គ្មានលទ្ធភាពចិញ្ចឹមកូននោះឡើយ ។ ទោះយ៉ាងណា ប៉ូលិសនៅតែពង្រីកការស៊ើបអង្កេតជុំវិញករណីនេះ ចំណែកឯការកាត់ទោសដែល Anh កំពុងប្រឈមមុខវិញ គឺអាចនឹងជាប់ពន្ធនាគារអស់មួយជីវិត ៕

ប្រែសម្រួល៖ វារី

ប្រភព៖ vnexpress

ចុចអាន៖ ស្ត្រី​ពីរ​នាក់​សម្រាល​កូនភ្លោះម្ដង​ ៣​ នៅ​ប្រទេស​វៀតណាម​