ហាងកាហ្វេ រុស្ស៊ី រងភាពចម្រូងចម្រាស ក្រោយបើកដំណើរការលក់ផ្សំពីទឹកដោះម្តាយ

អ្នក​រាល់​គ្នា​ដឹង​ហើយ​ថា ទឹក​ដោះ​ម្ដាយ​ជា​របស់​ដ៏​មាន​តម្លៃ​បំផុត​ដែល​អ្នក​មាន​កាល​ពី​នៅ​ក្មេង។ ប៉ុន្តែចុះយ៉ាងណា បើអ្នកត្រូវផឹកនៅពេលអ្នកពេញវ័យ? តើវានឹងធ្វើឲ្យ​អ្នកមានអារម្មណ៍យ៉ាងណា?

នេះជា​រឿងរ៉ាវ​របស់ហាងកាហ្វេរុស្ស៊ីមួយឈ្មោះថា Coffee Smile ដែលបានរីករាលដាល​នៅលើ​អ៊ីនធឺណិត​នៅក្នុងប្រទេសនាពេលថ្មីៗនេះ។ បន្ទាប់ពីពួកគេបាន​ប្រកាស​ដាក់​ដំណើរការ​នូវមីនុយថ្មីដែលរួមមានទឹកដោះម្តាយ​ ជាគ្រឿងផ្សំសម្រាប់​កាហ្វេទឹកដោះគោ​ដូចជា ឡាតេ និងកាពូស៊ីណូ។

ការ​ចាប់​ផ្តើ​ម​មក​ពី Coffee Smile បាន​បង្ហោះ​ផ្ទាំង​ផ្សាយ​ពាណិជ្ជកម្ម​ម៉ឺនុយ​ទឹក​ដោះ​ម្តាយ​​ រហូតធ្វើឲ្យ​មនុស្ស​បាន​ចាប់ផ្តើម​ចែករំលែកវានៅលើបណ្តាញសង្គមក្នុងចំនួនដ៏ច្រើន។ មួយរយៈក្រោយមក Maxim Kobelev ដែលជា​ពាណិជ្ជករ​ក្នុងស្រុក និងជាម្ចាស់​ភោជនីយដ្ឋាន​បានចេញ​វីដេអូមួយ​ទៀតដែលផ្សព្វផ្សាយអំពីមុខម្ហូប ដោយ​អះអាង​ថា ហាង​កាហ្វេ​របស់​លោក​ នឹង​ប្រើ​ទឹកដោះ​ម្ដាយ​ដែល​ត្រូវ​បាន​រក្សា​ទុក​យ៉ាង​ប្រយ័ត្នប្រយែង​ក្នុង​ថង់​ ពិសេស​ថ្នាក់​ដូច​គ្នា​នឹង​ការ​ប្រើប្រាស់​ផ្នែក​វេជ្ជសាស្ត្រ។

ទន្ទឹមគ្នា​នោះដែរ ​អ្នក​ម្តាយវ័យក្មេងម្នាក់ដែលពណ៌នានៅក្នុងវីដេអូបាននិយាយថា “ខ្ញុំទើបតែ​ឈប់​សម្រាក​​ ហើយឃើញថាទឹកដោះម្តាយមានតម្រូវការខ្លាំង។ ខ្ញុំ​មាន​ទឹកដោះ​ច្រើន​ពេក​សម្រាប់​កូន​ខ្ញុំ​ញ៉ាំ។ ដូច្នេះ​ខ្ញុំ​គិត​ថា ហេតុ​អ្វី​បាន​ជា​យើង​មិន​រក​ប្រាក់​បន្ថែម​ពី​ទីនេះ? ដូច្នេះ​ហើយ​ខ្ញុំ​ចាប់​ផ្ដើម​ធ្វើ​កាហ្វេ​ជាមួយ​ទឹក​ដោះ​ម្តាយ​ឲ្យ​ប្តី​ខ្ញុំ។ ហើយ​គាត់ថាចូលចិត្ត​ខ្លាំងណាស់”។

ទោះយ៉ាងណាក៏ដោយ Maxim Kobelev ក៏បានធានាដល់អតិថិជនផងដែរ។ ស្រ្តីដែលទឹកដោះ​សម្រាប់ហាងនឹងត្រូវបានធ្វើតេស្តដើម្បីធានាថា ពួកនាង​មាន​សុខភាព​ល្អឥតខ្ចោះ​ ហើយវានឹងក្លាយជាអ្នកផលិតទឹកដោះម្តាយ​ដែលមានសុវត្ថិភាពបំផុត។

ជាមួយគ្នានេះដែរពាណិជ្ជកររូបនេះបាននិយាយ​បន្តទៀតថា ទឹកដោះម្តាយនឹងត្រូវបានបន្ថែម​បន្តិចម្តងៗទៅក្នុងម៉ឺនុយ​ផ្សេងៗនៅដើមដំបូង។ ហើយ​គាត់​មាន​គម្រោង​នឹង​បន្ថែម​ផលិតផល​ដល់​ទៅ ១,០០០ មុខ​ទៀត​នៅ​ចុង​ឆ្នាំ​នេះ ខណៈតម្លៃ​ភេសជ្ជៈ​ទឹក​ដោះ​ម្តាយ​មួយ​កែវ​នៅ​ហាង​គឺតម្លៃ៨ដុល្លារ។

ក្រោយមកទៀតបានក្លាយជានិន្នាការនៅក្នុងប្រទេសរុស្ស៊ី។ មនុស្សជាច្រើនមាន​ការងឿងឆ្ងល់ថា​ហេតុអ្វីបានជាអាជ្ញាធរ​សុវត្ថិភាពចំណីអាហាររុស្ស៊ីមិនស៊ើបអង្កេតបញ្ហានេះ។ ​ ភ្លាមៗនោះដែរ អភិបាលរង​ស្រុក​បាន​សម្រេច​ចិត្ត​ធ្វើ​ការ​បោះឆ្នោតដោយសួរថា តើ​ពួក​គេ​ចាប់​អារម្មណ៍​ចង់​សាក​កាហ្វេ​ទឹក​ដោះ​ម្តាយ​ទេ? ចម្លើយ​បាន​ប្រែ​ក្លាយ​ទៅ​ជា​គួរឲ្យចាប់​អារម្មណ៍​ដោយ​មនុស្ស ៤៦% មិន​ចង់​សាកល្បង​វា​ទេ។ ប៉ុន្តែ ២៣% នៃមនុស្សត្រៀមខ្លួនសាកល្បងវាជាមុនសិន។

យ៉ាងណាមិញ បន្ទាប់ពីនិន្នាការលើអ៊ីនធឺណិតបានក្លាយជាការជជែកដេញដោលថ្នាក់ជាតិ លោក Maxim ស្រាប់តែចេញមុខបញ្ជាក់ថា គាត់ពិតជាមិនបានគិតពីការប្រើប្រាស់ទឹកដោះម្តាយជាគ្រឿងផ្សំនោះទេ គាត់គ្រាន់តែព្យាយាមផ្សព្វផ្សាយអាជីវកម្មហាងកាហ្វេ។ ព្រោះ​ការ​ប្រើ​ទឹក​ដោះ​ម្តាយ​ជា​គ្រឿង​ផ្សំ​អាច​នឹង​ខុស​ច្បាប់៕

ប្រែសម្រួល៖ សាង ស្រីល័ក្ខ

ប្រភព៖ecr.co.za

ចុចអាន៖ភូមិអភិជនដែលគេបោះបង់ចោលនៅ ចិន ពេលនេះក្លាយជាកន្លែងចិញ្ចឹមគោ