ព័ត៌មានអន្ដរជាតិ

លោក Blinken៖ អាមេរិក មិនចង់ធ្វើសង្រ្គាមជាមួយអ៊ីរ៉ង់ទេ ប៉ុន្តែនឹងការពារខ្លួន

បានផុស

២ years មុន

នៅ

ថ្ងៃពុធ ២៥ តុលា ២០២៣

ដោយ

សហរដ្ឋអាមេរិក បានប្រាប់អង្គការសហប្រជាជាតិកាលពីថ្ងៃអង្គារ ទី២៤ ខែតុលាថា ខ្លួនមិនស្វែងរកជម្លោះជាមួយអ៊ីរ៉ង់ទេ ប៉ុន្តែរដ្ឋមន្ត្រីការបរទេសលោក Antony Blinken បានព្រមានថា ទីក្រុងវ៉ាស៊ីនតោន នឹងចាត់វិធានការយ៉ាងឆាប់រហ័សនិងម៉ឺងម៉ាត់ជាទីបំផុត ប្រសិនបើអ៊ីរ៉ង់ ឬភ្នាក់ងាររបស់ខ្លួន វាយប្រហារបុគ្គលិកអាមេរិក ទោះនៅកន្លែងណាក៏ដោយ។

រដ្ឋមន្ត្រីការបរទេសអាមេរិកលោក Antony Blinken (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken បានថ្លែងបែបនេះ ទៅកាន់ក្រុមប្រឹក្សាសន្តិសុខអង្គការសហប្រជាជាតិដែលមានសមាជិក១៥ប្រទេស ចំពេលមានការភ័យខ្លាចជាអន្តរជាតិថា ជម្លោះរវាងអ៊ីស្រាអែល និងក្រុមសកម្មប្រយុទ្ធហាម៉ាស់ប៉ាឡេស្ទីន នៅតំបន់ហ្គាហ្សាស្ទ្រីប អាចរីករាលដាលក្លាយជាសង្រ្គាមទ្រង់ទ្រាយធំ ដោយអូសទាញក្រុមប្រដាប់អាវុធហេសបូឡា របស់ប្រទេសលីបង់ ឲ្យចូលលូកដៃដែរ។

លោកនិយាយថា “សហរដ្ឋអាមេរិក មិនស្វែងរកជម្លោះជាមួយអ៊ីរ៉ង់ទេ។ យើងមិនចង់ឲ្យសង្រ្គាមនេះរីករាលដាលឡើយ។ ប៉ុន្តែប្រសិនបើអ៊ីរ៉ង់ ឬតំណាងរបស់ខ្លួនវាយប្រហារបុគ្គលិកអាមេរិកណាម្នាក់នៅកន្លែងណាក៏ដោយ សូមកុំសាងកំហុសឲ្យសោះ។ យើងនឹងការពារប្រជាជនរបស់យើង យើងនឹងការពារសន្តិសុខរបស់យើង យ៉ាងឆាប់រហ័ស និងម៉ឺងម៉ាត់ជាទីបំផុត”។

មន្ត្រីរូបនេះបានប្រាប់រ៉យទ័រថា យោធាអាមេរិក កំពុងចាត់វិធានការថ្មី ដើម្បីការពារកងទ័ពរបស់ខ្លួននៅមជ្ឈិមបូព៌ា ខណៈមានក្តីព្រួយបារម្ភអំពីការវាយប្រហារដោយក្រុមដែលគាំទ្រដោយអ៊ីរ៉ង់។ អាមេរិកក៏បានបញ្ជូននាវានិងយន្តហោះចម្បាំងទៅកាន់តំបន់ផងដែរ ដើម្បីព្យាយាមរារាំងក្រុមដែលគាំទ្រដោយទីក្រុងតេហេរ៉ង់ និងប្រទេសអ៊ីរ៉ង់។

ទោះបីជាយ៉ាងណាក៏ដោយ បេសកកម្មរបស់អ៊ីរ៉ង់ប្រចាំអង្គការសហប្រជាជាតិ មិនបានឆ្លើយតបភ្លាមៗចំពោះសំណើសុំការអត្ថាធិប្បាយលើការលើកឡើងរបស់លោក Blinken ទេ៕

ប្រែសម្រួល៖ Vann Vann

ប្រភព៖ CNA

ចុចអាន៖ អ៊ីរ៉ង៉ ថា អាមេរិក ផ្ញើសារចំនួន ២ មកប្រទេសខ្លួន និយាយរឿងសង្គ្រាម អ៊ីស្រាអែល-ក្រុមហាម៉ាស់