ប្រមុខ UN ចេញមុខឆ្លើយតបរឿង អ៊ីស្រាអែល ឲ្យចុះចេញពីតំណែង

អគ្គលេខាធិការអង្គការសហប្រជាជាតិ (UN) លោក Antonio Guterres បានចេញមុខជំទាស់ប្រទេសអ៊ីស្រាអែលដែលចាត់ទុកពាក្យសម្ដីរបស់លោកថាជា “ការបកស្រាយខុស” ពាក់ព័ន្ធនឹងការគាំទ្រទៅដល់អំពើភេរវកម្ម ហើយលោកថែមទាំងប្រឆាំងទៅ​នឹង​មន្ត្រី​អ៊ីស្រាអែលផងដែរ ចំពោះការ​អំពាវនាវ​ឲ្យ​លោក​លាលែង​ពី​តំណែង ។

នៅក្នុងសុន្ទរកថាទៅកាន់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារ លោក Guterres បានថ្កោលទោសចំពោះការវាយប្រហារទៅលើជនស៊ីវិលនៅអ៊ីស្រាអែល និងតំបន់ហ្គាហ្សា ។ លោក​បាន​បន្ថែម​ថា ការ​វាយ​ប្រហារ​របស់​ក្រុម​ហាម៉ាស់​លើ​អ៊ីស្រាអែល​មិន​បាន​កើត​ឡើង​ក្នុង​ភាព​ខ្វះ​ចន្លោះនោះ​ទេ ។

ការលើកឡើងទាំងនោះហើយបានជំរុញឲ្យឯកអគ្គរដ្ឋទូតអ៊ីស្រាអែលប្រចាំនៅអង្គការសហប្រជាជាតិលោក Gilad Erdan ទាមទារឲ្យប្រមុខ UN រូបនេះចុះចេញពីតំណែង ដោយលើកហេតុផលថា ការកត់សម្គាល់នេះគឺ “គួរឲ្យភ្ញាក់ផ្អើល” និង “ផ្ទុយស្រឡះពីការពិតទាំងស្រុង” ។

ជាការឆ្លើយតប លោក Guterres បាននិយាយថា “ខ្ញុំបានប្រើប្រាស់តួនាទីរបស់ខ្ញុំទាំងអស់ដើម្បីបន្តធ្វើអន្តរាគមន៍លើគ្រប់ទិដ្ឋភាពនៃវិបត្តិនៅមជ្ឈិមបូព៌ា ។ ខ្ញុំជឿជាក់ថា វាជារឿងចាំបាច់ចំពោះការគោរពទៅដល់ជនរងគ្រោះ និងក្រុមគ្រួសាររបស់ពួកគេ ជាពិសេសទុក្ខសោកដ៏គួរឲ្យរន្ធត់របស់ប្រជាជនប៉ាឡេស្ទីនតែម្ដង” ។

ទោះ​ជា​យ៉ាង​ណា ឯកអគ្គរដ្ឋទូតអ៊ីស្រាអែល​មិន​គាំទ្រចំពោះពាក្យសម្ដីរបស់ប្រមុខ UN ​ឡើយ ។ អ្នកការទូតរូបនេះថែមទាំងបាននិយាយថា “ដល់ពេលវេលាហើយដើម្បីបង្រៀនមន្រ្តីអង្គការសហប្រជាជាតិនូវមេរៀនមួយ ហើយនោះគឺការបដិសេធមិនផ្តល់ទិដ្ឋាការដល់ពួកគេ” ។

ពាក់ព័ន្ធនឹងបញ្ហានេះដែរ ជន​ជាតិ​អ៊ីស្រាអែល​មិន​បាន​និយាយ​ថា​តើ​ពួកគេ​នឹង​ទៅជាយ៉ាងណា​ជាមួយ​នឹង​បម្រាម​នេះនោះ​ទេ ។ ទោះយ៉ាងណាក៏ដោយ បុគ្គលិកជំនួយរបស់អង្គការសហប្រជាជាតិ បាននិងកំពុងផ្តល់ជំនួយមនុស្សធម៌ទៅកាន់តំបន់ហ្គាហ្សាស្ទ្រីប ដោយសារតែជន​ស៊ីវិល​នៅ​ទីនោះ​កំពុង​ត្រូវការ​អាហារ ទឹក និង​ថ្នាំ​សង្កូវដើម្បីព្យាបាល​ ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ទាមទារឲ្យប្រមុខ UN ចុះចេញពីតំណែងជាបន្ទាន់ ព្រោះកាន់ជើងក្រុម ហាម៉ាស់