អ៊ីស្រាអែល ទាមទារឲ្យប្រមុខ UN ចុះចេញពីតំណែងជាបន្ទាន់ ព្រោះកាន់ជើងក្រុម ហាម៉ាស់

កាលពីថ្ងៃអង្គារទី២៤ខែតុលា ឯកអគ្គរដ្ឋទូតអ៊ីស្រាអែលប្រចាំអង្គការសហប្រជាជាតិ លោក Gilad Erdan បានទាមទារឲ្យអគ្គលេខាធិការ UN លោក Antonio Guterres ចុះចេញពីតំណែង ដោយចោទប្រកាន់គាត់ថា គាត់កាន់ជើង ថែមទាំងបង្ហាញក្តីអាណិតអាសូរចំពោះក្រុមសកម្មប្រយុទ្ធ និងឃាតករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Erdan បានបង្ហោះក្នុងបណ្តាញសង្គម X ថា “អគ្គលេខាធិការរូបនេះ មិនសមដឹកនាំអង្គការសហប្រជាជាតិទេ។ ខ្ញុំ​សូម​អំពាវនាវឲ្យ​គាត់​លាលែង​ពី​តំណែង​ជា​បន្ទាន់។ គ្មានហេតុផល ត្រូវនិយាយទៅកាន់អ្នកដែលបង្ហាញក្តីអាណិតអាសូរ ចំពោះអំពើឃោរឃៅដ៏អាក្រក់បំផុត ដែលបានប្រព្រឹត្តលើពលរដ្ឋអ៊ីស្រាអែល និងប្រជាជនជ្វីហ្វ នោះទេ”។

លោកបន្តថា “សុន្ទរកថាដ៏គួរឲ្យភ្ញាក់ផ្អើលរបស់លោក Guterres គឺជាព័ស្តុតាងបង្ហាញថា អគ្គលេខាធិការរូបនេះ ត្រូវបានផ្តាច់ទាំងស្រុងពីការពិតនៅក្នុងតំបន់របស់យើង ហើយថា គាត់ចាត់ទុកការសម្លាប់រង្គាលដែលប្រព្រឹត្តដោយក្រុមណាស៊ីហាម៉ាស់ ក្នុងលក្ខណៈខុសឆ្គង និងអសីលធម៌”។

មុននេះ លោក Guterres ថ្លែងថា ខ្ញុំមានក្តីព្រួយបារម្ភយ៉ាងខ្លាំង ចំពោះការរំលោភបំពានច្បាស់ក្រឡែតលើច្បាប់មនុស្សធម៌អន្តរជាតិ ដែលយើងកំពុងមើលឃើញនៅក្នុងតំបន់ហ្គាហ្សាពីសំណាក់អ៊ីស្រាអែល។

យ៉ាងណាក្តី រដ្ឋមន្ត្រីការបរទេសអ៊ីស្រាអែល លោក Eli Cohen បានប្រតិកម្មទៅនឹងសុន្ទរកថារបស់លោក Guterres នៅក្នុងក្រុមប្រឹក្សាសន្តិសុខ ដោយចង្អុលនិងស្រែកដាក់អគ្គលេខាធិការរូបនេះ។ បន្ទាប់​មក ​គាត់​បាន​ប្រកាស​ថា ​គាត់​នឹង​លែង​ជួប​ជាមួយលោក​ Guterres ​ទៀត​ហើយ។

លោក Cohen ប្រកាសថា “ក្រោយថ្ងៃ៧តុលា គ្មានអ្វីត្រូវនិយាយអំពីតុល្យភាពទេ។ ក្រុមហាម៉ាស់ ត្រូវតែបាត់មុខពីពិភពលោក!”៕

ប្រែសម្រួល៖ Vann Vann

ប្រភព៖ RT

ចុចអាន៖ អ៊ីស្រាអែល ឲ្យក្រុមហាម៉ាស់ដោះលែងចំណាប់ខ្មាំងទាំងអស់សិន ទើបឈប់ទម្លាក់គ្រាប់បែក តែក្រុមហាម៉ាស់ ឲ្យអ៊ីស្រាអែលឈប់ទម្លាក់គ្រាប់បែកសិន ទើបដោះលែង