រដ្ឋមន្ត្រីការបរទេសអាមេរិក ទៅដល់ កូរ៉េខាងត្បូង ចំពេល កូរ៉េខាងជើង និងរុស្ស៊ី ពង្រឹងទំនាក់ទំនងយោធា

នៅថ្ងៃព្រហស្បតិ៍ទី៩ខែវិច្ឆិកា រដ្ឋមន្ត្រីការបរទេសអាមេរិក លោក Antony Blinken កំពុងបំពេញទស្សនកិច្ចប្រទេសជាសម្ព័ន្ធមិត្តដ៏សំខាន់ក្នុងតំបន់គឺកូរ៉េខាងត្បូង សម្រាប់កិច្ចពិភាក្សាដែលផ្តោតលើបញ្ហាសន្តិសុខ ខណៈកូរ៉េខាងជើង បង្កើនកិច្ចសហប្រតិបត្តិការយោធាជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Blinken បានមកដល់ទីក្រុងសេអ៊ូល កាលពីល្ងាចថ្ងៃពុធ បន្ទាប់ពីកិច្ចប្រជុំរដ្ឋមន្ត្រីការបរទេស G7 ក្នុងទីក្រុងតូក្យូ និងដំណើរនៅមជ្ឈិមបូព៌ា ហើយនេះគឺជាទស្សនកិច្ចលើកដំបូងរបស់លោកទៅកាន់ប្រទេសកូរ៉េខាងត្បូង ចាប់តាំងពីប្រធានាធិបតី Yoon Suk Yeol ចូលកាន់តំណែងកាលពីឆ្នាំមុន។

អ្នកការទូតកំពូលរបស់សហរដ្ឋអាមេរិក គ្រោងជួបពិភាក្សាជាមួយសមភាគីកូរ៉េខាងត្បូង Park Jin ហើយគេរំពឹងថា លោកនឹងចូលជួបសម្តែងការគួរសមជាមួយលោក Yoon ទៀតផង។

ផលប៉ះពាល់ផ្នែកសន្តិសុខ នៃកិច្ចសហប្រតិបត្តិការយោធារវាងទីក្រុងមូស្គូ និងទីក្រុងព្យុងយ៉ាង ដែលកំពុងកើនឡើងខ្ពស់ ទំនងជារបៀបវារៈកំពូលក្នុងដំណើរទស្សនកិច្ចនេះ។

លោក គីម ជុងអ៊ុន និងលោក វ្ល៉ាឌីមៀរ ពូទីន បានជួបប្រជុំកំពូលកាលពីខែកញ្ញា នៅចុងភាគខាងកើតប្រទេសរុស្ស៊ី។ បន្ទាប់ពីនោះ ទីក្រុងសេអ៊ូលនិយាយថា ទីក្រុងព្យុងយ៉ាង បានបញ្ជូនគ្រាប់កាំភ្លើងធំចំនួន១លានគ្រាប់ ជួយដល់សង្រ្គាមរបស់ទីក្រុងមូស្គូនៅអ៊ុយក្រែន ជាថ្នូរនឹងចំណេះដឹងបច្ចេកវិទ្យាផ្កាយរណប៕

ប្រែសម្រួល៖ Vann Vann

ប្រភព៖ CNA 

ចុចអាន៖ អាមេរិក ធានាការពារប្រទេសជិតខាង ចិន