មេដឹកនាំក្រុមហាម៉ាស ដាក់លក្ខខណ្ឌ សម្រាប់ការចរចាសន្តិភាព

ប្រធានការិយាល័យនយោបាយរបស់ចលនាហាម៉ាស លោក Ismail Haniyeh និយាយថា ក្រុមសកម្មប្រយុទ្ធនេះ បើកចំហសម្រាប់ការចរចាដើម្បីបញ្ចប់សង្គ្រាមជាមួយអ៊ីស្រាអែល ប៉ុន្តែលក្ខខណ្ឌគឺថា កិច្ចព្រមព្រៀងណាមួយអាចកើតឡើងបាន លុះត្រាតែមានការបង្កើតរដ្ឋប៉ាឡេស្ទីនឯករាជ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាតាមទូរទស្សកាលពីថ្ងៃពុធទី១៣ខែធ្នូ លោក Haniyeh និយាយថា ក្រុមហាម៉ាស ត្រៀមខ្លួនរួចជាស្រេចសម្រាប់កិច្ចសន្ទនាជាមួយអ៊ីស្រាអែល ដោយសង្ឃឹមថា កិច្ចពិភាក្សានាពេលអនាគតអាចនាំឲ្យប្រជាជនប៉ាឡេស្ទីន មានសណ្តាប់ធ្នាប់ទាំងនៅតំបន់ West Bank និង Gaza Strip។

លោកលើកឡើងថា “យើងបើកចំហដើម្បីពិភាក្សាអំពីការរៀបចំ ឬគំនិតផ្តួចផ្តើមណាមួយដែលអាចបញ្ចប់ការវាយលុកនិងនាំទៅរកផ្លូវនយោបាយដែលធានាសិទ្ធិរបស់ប្រជាជនប៉ាឡេស្ទីន ឲ្យមានរដ្ឋឯករាជ្យ ហើយទីក្រុងហ្ស៊េរុយសាឡិមជារដ្ឋធានីរបស់ខ្លួន”។

ទោះជាយ៉ាងណាក៏ដោយ មន្ត្រីរូបនេះព្រមានទៀតថា ការប៉ុនប៉ងណាមួយដើម្បីដកក្រុមហាម៉ាស និងក្រុមប្រដាប់អាវុធផ្សេងទៀតចេញពីតំបន់តាំងទីលំនៅក្រោយសង្គ្រាម នឹងបង្កជាបញ្ហា។ លោកនិយាយថា “ក្រុមប្រឆាំងទាំងនេះ ត្រូវតែចូលរួមនៅក្នុងដំណើរការនេះ”។

ការអត្ថាធិប្បាយរបស់លោក Haniyeh កើតឡើងមួយថ្ងៃ បន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu លើកឡើងថា ​អ៊ីស្រាអែល ច្បាស់ជាមិនសាង​កំហុសដូចកិច្ចព្រមព្រៀងសន្តិភាព​ទីក្រុង អូស្លូ ​ម្តងទៀតឡើយ”។

លោក Netanyahu មិន​បាន​បញ្ជាក់​ថា​តើនោះជា​កំហុស​អ្វី​ទេ ប៉ុន្តែទីក្រុងអូស្លូ នៃប្រទេសន័រវែស គឺជាកន្លែងភាគីទាំង២ ចុះហត្ថលេខាលើកិច្ចព្រមព្រៀងឆ្នាំ១៩៩៣ ដោយមានសហរដ្ឋអាមេរិកជាអ្នកសម្រុះសម្រួល ដែលក្នុងនោះ អ៊ីស្រាអែល ទទួលយកអង្គការរំដោះប៉ាឡេស្ទីន (PLO) ជាអ្នកតំណាងប្រជាជនប៉ាឡេស្ទីន។

ថ្វីបើពីមុន អ៊ីស្រាអែល ទទួលយកគំនិតនេះជាគោលការណ៍ក៏ពិតមែន ប៉ុន្តែដំណើរការដែលបង្កើតឡើងដោយកិច្ចព្រមព្រៀងទីក្រុងអូស្លូ បានបែកបាក់តាំងពីយូរយារណាស់មកហើយ។

ជាង៣០ឆ្នាំក្រោយមក ទាហានអ៊ីស្រាអែលបន្តកាន់កាប់តំបន់ West Bank។ កន្លែងតាំងទីលំនៅរបស់ជនជាតិជ្វីហ្វ បានកើនឡើងជាលំដាប់ក្នុងប៉ុន្មានឆ្នាំចុងក្រោយ ខណៈរដ្ឋាភិបាលអ៊ីស្រាអែល បន្តការរឹតត្បិតយ៉ាងតឹងរ៉ឹងជុំវិញតំបន់ហ្គាហ្សាស្ទ្រីប៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Netanyahu ទម្លាយមូលហេតុដែលអ៊ីស្រាអែលនិងអាមេរិក ខ្វែងគំនិតគ្នា