អាកាសយានដ្ឋាន Haneda នៃទីក្រុងតូក្យូ ដំណើរការឡើងវិញទាំងស្រុង ក្រោយកើតហេតុយន្តហោះបុកគ្នា

តាមការបញ្ជាក់ពីក្រុមមន្ត្រី, ប្រតិបត្តិការហោះហើរនៅអាកាសយានដ្ឋាន Haneda ក្នុងទីក្រុងតូក្យូ បានដំណើរការធម្មតាវិញហើយនៅថ្ងៃចន្ទទី៨ខែមករា បន្ទាប់ពីកើតហេតុយន្តហោះបុកគ្នា ដែលបណ្តាលឲ្យមនុស្សចំនួន៥នាក់ស្លាប់ កាលពី៦ថ្ងៃមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកដំណើរនិងអាកាសយានិកទាំង៣៧៩នាក់ នៃយន្តហោះរបស់ក្រុមហ៊ុនអាកាសចរណ៍ជប៉ុន ត្រូវបានជម្លៀសចេញដោយសុវត្ថិភាព បន្ទាប់ពីហេតុការណ៍កាលពីថ្ងៃទី២ខែមករា ប៉ុន្តែមនុស្ស៥នាក់ក្នុងចំណោម៦នាក់នៅលើយន្តហោះឆ្មាំសមុទ្រ ត្រូវបាត់បង់ជីវិត។

ពិភពលោក បានស្ញើចសរសើរជប៉ុនមិនដាច់ពីមាត់ ចំពោះការដែលប្រទេសនេះអាចគ្រប់គ្រងស្ថានការណ៍បាន ដោយចាយពេលត្រឹម៩០វិនាទីប៉ុណ្ណោះដើម្បីជម្លៀសមនុស្សជិត៤០០នាក់ ចេញពីយន្តហោះដែលកំពុងឆេះ។

អ្នកជំនាញនិយាយថា ល្បឿននៃការជម្លៀសអ្នកដំណើរនិងសមាជិកអាកាសយានិក ចេញពីជើងហោះហើរ JAL516 ក្នុងឧបទ្ទវហេតុកាលពីថ្ងៃអង្គារទី២ខែមករា គឺជាអព្ភូតហេតុ និងសបញ្ជាក់ឲ្យឃើញច្បាស់អំពីប្រព័ន្ធសង្គ្រោះបន្ទាន់របស់យន្តហោះ។

ចាប់តាំងពីពេលនោះមក ផ្លូវយន្តហោះនៅអាកាសយានដ្ឋាន Haneda ត្រូវបានបិទ នាំឲ្យមានការលុបចោលជើងហោះហើរក្នុងស្រុករាប់រយជើង។

ទោះបីជាយ៉ាងណាក៏ដោយ អ្នកនាំពាក្យអាកាសយានដ្ឋានក្រុងតូក្យូ បានប្រាប់ AFP ថា “Runway C បានដំណើរការឡើងវិញហើយនៅថ្ងៃចន្ទ ដូច្នេះអាកាសយានដ្ឋានបានដំណើរការធម្មតាវិញទាំងស្រុង”។

ស្របពេលជាមួយគ្នានោះ ក្រុមការងារបានយកខ្មោចយន្តហោះទាំង២ចេញ ហើយ​ក្រុម​អ្នក​ស៊ើបអង្កេត​ជប៉ុន​រួម​ជាមួយ​សមភាគី​មកពី​ប្រទេស​បារាំង អង់គ្លេស និង​កាណាដា កំពុង​ស៊ើបអង្កេត​គ្រោះថ្នាក់​នេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ គ្រប់គ្នាស្ងើចសរសើរជប៉ុន ដែលចាយពេលត្រឹម៩០វិនាទី ជម្លៀសមនុស្សជិត៤០០នាក់ ចេញពីយន្តហោះឆេះ