Connect with us

ព័ត៌មានអន្ដរជាតិ

ចិន ព្រមាន ណាតូ ថា កុំយកការស្លាប់មេបក្សប្រឆាំង រុស្ស៊ី ជាល្បិចលូកលាន់​កិច្ចការផ្ទៃក្នុងប្រទេសដទៃ

បានផុស

នៅ

បណ្ដាប្រទេសណាតូគួរតែបញ្ឈប់ “ល្បិចកិច្ចកល” របស់ពួកគេក្នុងការលូកលាន់កិច្ចការផ្ទៃក្នុងរបស់ប្រទេសដទៃទៀតទៅ ជាពិសេសពាក់ព័ន្ធនឹងមរណភាពរបស់មេបក្សប្រឆាំងរុស្ស៊ីលោក Alexei Navalny ។ នេះជាការលើកឡើងរបស់អ្នកនាំពាក្យក្រសួងការបរទេសចិនលោកស្រី Mao Ning នៅក្នុងសន្និសីទសារព័ត៌មានកាលពីថ្ងៃទី១៩ ខែកុម្ភៈកន្លងទៅ ។

លោកស្រី Mao Ning

នៅពេលអ្នកសារព័ត៌មានចាក់សួរអំពីការរិះគន់របស់អគ្គលេខាធិការអង្គការណាតូលោក Jens Stoltenberg ទាក់ទងការឆ្លើយតបរបស់ចិនចំពោះមរណភាពលោក Navalny, លោកស្រី Mao Ning បានលើកឡើងថា “អង្គការណាតូគួរតែបញ្ឈប់ល្បិចកិច្ចកលរបស់ខ្លួនក្នុងការបញ្ឆេះភាពតានតឹង និងការលូកលាន់ចូលកិច្ចការផ្ទៃក្នុងរបស់ប្រទេសដទៃដើម្បីតែពង្រីកវិសាលភាពនៃឥទ្ធិលពលរបស់ខ្លួន ជាពិសេសូមបញ្ឈប់ការលាបពណ៌មកលើចិន” ។

អ្នកនាំពាក្យរូបនេះបានបន្ថែមថា “ចិនខុសពីអង្គការណាតូ ចិនមិនដែលជ្រៀតជ្រែកកិច្ចការផ្ទៃក្នុងរបស់ប្រទេសដទៃនោះទេ ហើយរដ្ឋាភិបាលទីក្រុងប៉េកាំងចាត់ទុកការឃ្លាតឆ្ងាយមេបក្សប្រឆាំង និងជាអ្នករិះគន់មិនសំចៃមាត់លើលោក ពូទីន វ័យ ៤៨ ឆ្នាំរូបនេះថាជា កិច្ចការរផ្ទៃក្នុងរបស់រុស្ស៊ី ហើយណាតូគួរតែចាត់វិធានការជាក់ស្ដែងដើម្បីស្វែងរកសន្តិភាព និងស្ថិរភាពនៅអឺរ៉ុប” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីការបាត់រូបកាយលោក Navalny កាលពីថ្ងៃទី១៦ ខែកុម្ភៈ មេដឹកនាំនៅជុំវិញពិភពលោក ក៏ដូចជាមេដឹកនាំអង្គការណាតូបានដាក់ផ្ទាំងស៊ីបទៅលើលោកប្រធានាធិបតីរុស្ស៊ី វ្ល៉ាឌីមៀរ ពូទីន ឲ្យទទួលខុសត្រូវចំពោះរឿងរ៉ាវដ៏ក្ដុកក្ដួលនេះ មុនពេលការស៊ើបអង្កេតណាមួយត្រូវបានធ្វើឡើង ។

យោងតាមសេចក្ដីរាយការណ៍ពីទីភ្នាក់ងារព័ត៌មាន Reuters បានឲ្យដឹងថា អនុប្រធានាធិបតីសហរដ្ឋអាមេរិកលោកស្រី Kamala Harris បានលើកឡើងកាលពីថ្ងៃសុក្រសប្ដាហ៍មុន “ប្រសិនបើមានការបញ្ជាក់ពិតប្រាកដពីមរណភាពរបស់លោក Navalny នោះវានឹងក្លាយជាមុខសញ្ញាបន្ថែមទៀតនៃភាពឃោរឃៅរបស់លោក ពូទីន ហើយរុស្ស៊ីក៏ជាអ្នកទទួលខុសត្រូវតែម្នាក់គត់ចំពោះរឿងនេះ” ។

លោកស្រី Maria Zakharova

ជាការឆ្លើយតប លោកស្រី Maria Zakharova អ្នកនាំពាក្យក្រសួងការបរទេសរុស្ស៊ីតាមរយៈការចុះផ្សាយដោយសារព័ត៌មាន Sputnik បានបញ្ជាក់ថា “ការសន្និដ្ឋានរបស់អង្គការណាតូ គឺជារឿងគួរឲ្យសង្ស័យ ។ ប្រតិកម្មភ្លាមៗរបស់មេដឹកនាំណាតូចំពោះការស្លាប់របស់លោក Navalny គឺជាទម្រង់ចោទប្រកាន់ដោយផ្ទាល់ប្រឆាំងនឹងរុស្ស៊ី ។ រហូតមកដល់ពេលនេះ មិនទាន់មានការពិនិត្យ ឬការធ្វើកោសល្យវិច្ច័យនៅឡើយទេ ប៉ុន្តែលោកខាងលិចបានធ្វើសេចក្តីសន្និដ្ឋានមុនរួចទៅហើយ” ។

គួរបញ្ជាក់ថា លោក Navalny បានទទួលមរណភាពកាលពីថ្ងៃទី១៦ ខែកុម្ភៈ បន្ទាប់ពីបាត់បង់ស្មារតី ហើយដួលទៅនឹងដី ខណៈដែលលោកកំពុងតែដើរធម្មតា ។ ភ្លាមៗនោះក្រុមគ្រូពេទ្យក៏បានមកដល់កន្លែងកើតហេតុក្នុងបន្ទប់ឃុំឃាំងរបស់គាត់ និងបញ្ជូនទៅកាន់មន្ទីរពេទ្យផងដែរ ប៉ុន្តែទោះបីជាមានវិធានការជួយសង្គ្រោះពីសំណាក់គ្រូពេទ្យយ៉ាងណាក៏ដោយ ក៏មិនអាចទទួលបានលទ្ធផលគាប់ប្រសើរដែរ ខណៈទាក់ទងនឹងមូលហេតុនៃការស្លាប់របស់ទណ្ឌិតរូបនេះក៏មិនទាន់បានបង្ហាញដូចគ្នា ៕

ដោយ ៖ សុខ ជីវ័ន្ត

ចុចអាន ៖ មេដឹកនាំពិភពលោកដាក់បន្ទុកលោក ពូទីន ចំពោះករណីស្លាប់មេបក្សប្រឆាំង ខណៈ រុស្ស៊ី ក៏ចេញបកស្រាយ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម