ព័ត៌មានអន្ដរជាតិ

១០០ ថ្ងៃមកនេះ រថភ្លើងល្បឿនលឿន ឥណ្ឌូណេស៊ី ដឹកអ្នកដំណើរជាង ២ លាននាក់

បានផុស

១ year មុន

នៅ

ថ្ងៃចន្ទ ៤ មីនា ២០២៤

ដោយ

គិតមកត្រឹមឆ្នាំ ២០២៤ នេះ រថភ្លើងល្បឿនលឿនឥណ្ឌូណេស៊ី (HSR) ដែលរត់ពីទីក្រុងហ្សាកាតាទៅកាន់ភាគអាគ្នេយ៍ ទីក្រុងបានដុង បានបំពេញបេសកកម្មខ្លួនដឹកអ្នកដំណើរប្រមាណជាង ២ លាននាក់បានដោយជោគជ័យ ។ នេះបើតាមការចុះផ្សាយរបស់ទីភ្នាក់ងារសារព័ត៌មានចិន ស៊ីនហួរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីប្រភពព័ត៌មានដដែលបានឲ្យដឹងថា រថភ្លើងល្បឿនលឿន HSR បានបំពេញបេសកកម្មដឹកភ្ញៀវធ្វើដំណើរបានចំនួន ២,០០៨,៣៨៧ នាក់ដែលគិតចាប់តាំងពីពេលដំណើរការដំបូងនាថ្ងៃទី១៧ ខែតុលា ឆ្នាំ ២០២៣ កន្លងទៅ និងមកដល់ពេលនេះគឺមានរយៈពេល ១៣៩ ថ្ងៃហើយ ។

ចំណែកពេលបច្ចុប្បន្ន ជើងរថភ្លើងល្បឿនលឿន HSR រត់ជាប្រចាំថ្ងៃកើនពី ១៤ ដងទៅដល់ ៤០ ដងដែលមានចំនួនកៅអីអ្នកធ្វើដំណើរកើនពី ៨,៤០០ កៅអីដល់ ២៤,០០០ កៅអី ហើយចំនួនអ្នកដំណើរច្រើនបំផុតក្នុងមួយថ្ងៃមានដល់ ២១,៥៣៧ នាក់ ដែលនេះនាំឲ្យកន្លែងអង្គុយពេញៗ ហើយគិតជាភាគរយប្រមាណ ៩៩.៦ ភាគរយ ។

សម្រាប់មធ្យោយបាយធ្វើដំណើរនេះផងដែរ ត្រូវបានកំណត់ក្នុងល្បឿន ៣៥០ គីឡូម៉ែត្រក្នុងមួយម៉ោង ដែលធ្វើឲ្យការធ្វើដំណើរចម្ងាយ ១៤២.៣ គីឡូម៉ែត្រពីរដ្ឋធានីហ្សាកាតា ទៅទីក្រុងបានដុង ដែលត្រូវចំណាយពេលប្រមាណ ៣ ម៉ោង មកត្រឹមប្រហែល ៤០ នាទី ។

ដោយឡែកដើម្បីបំពេញតម្រូវការអ្នកធ្វើដំណើរដ៏ច្រើនឡើងនេះ អាជ្ញាធរឥណ្ឌូណេស៊ី ក៏ដូចជាក្រុមហ៊ុនប្រតិបត្តិការបានបន្ថែមជើងរត់រថភ្លើង និងបង្កើនកាលវិភាគធ្វើដំណើរជាពិសេសផងដែរនាពេលរដូវកាលបុណ្យទាន ឬឈប់សម្រាកផ្សេងៗ ។

គួររំឭកថា រថភ្លើងល្បឿនលឿន ហ្សាកតា-បានដុង ជាគម្រោងស្នើឡើងដោយប្រទេសឥណ្ឌូណេស៊ី កាលពីឆ្នាំ ២០១៦ ដែលបានចំណាយទឹកប្រាក់ប្រមាណ ៥.៥ ពាន់លានដុល្លារ ហើយបានសាងសង់ឡើងរួមគ្នារវាងក្រុមហ៊ុនរដ្ឋឥណ្ឌូណេស៊ី និងភាគីក្រុមហ៊ុនចិន China-Railway International ដែលអាជ្ញាធរឥណ្ឌូណេស៊ីសម្រេចផ្តល់សិទ្ធិសាងសង់ដល់ភាគីចិន បន្ទាប់ពីមានការដាក់ប្រកួតប្រជែងគ្នារវាងភាគីចិន និងជប៉ុន ហើយរថភ្លើងល្បឿនលឿន HSR នេះជាប្រភេទមធ្យោបាយធ្វើដំណើរល្បឿនលឿនមុនគេបង្អស់នៅក្នុងឥណ្ឌូណេស៊ី ៕