ក្រុមហ៊ូទី ដាក់ផ្ទាំងស៊ីបលើនាវា អ៊ីស្រាអែល នៅសមុទ្រអារ៉ាប់

អ្នកនាំពាក្យក្រុមហ៊ូទីលោក Yahya Sarea បាននិយាយកាលពីថ្ងៃចន្ទថា ក្រុមហ៊ូទីដែលជាចលនាប្រដាប់អាវុធដ៏មានឥទ្ធិពលនៅក្នុងប្រទេសយេម៉ែនបានកំណត់គោលដៅលើនាវាអ៊ីស្រាអែលឈ្មោះ MSC SKY នៅក្នុងសមុទ្រអារ៉ាប់ ។ នេះបើយោងតាមការចេញផ្សាយរបស់សារពត៌មាន CNA នៅថ្ងៃទី៥ ខែ​មីនា ។

អ្នកនាំពាក្យរូបនេះបាននិយាយនៅក្នុងសុន្ទរកថាតាមទូរទស្សន៍ថា កងកម្លាំងប្រដាប់អាវុធជើងទឹករបស់យេម៉ែនបានធ្វើប្រតិបត្តិការកំណត់គោលដៅប្រឆាំងនឹងនាវាអ៊ីស្រាអែល MSC SKY នៅក្នុងសមុទ្រអារ៉ាប់ ហើយប្រតិបត្តិការនេះបានកើតមានឡើងតែប៉ុន្មានម៉ោងប៉ុណ្ណោះ បន្ទាប់ពីប្រតិបត្តិការដាច់ដោយឡែកមួយរបស់ក្រុមហ៊ូទីទៅលើនាវាចម្បាំងអាមេរិកមួយចំនួននៅក្នុងសមុទ្រក្រហម ។

តាមរយៈប្រតិបត្តិការទាំងពីរនេះ គឺដើម្បីបញ្ជាក់ពីសមត្ថភាពរបស់ក្រុមប្រដាប់អាវុធមួយនេះសម្រាប់ការកំណត់គោលដៅក្នុងពេលដំណាលគ្នាលើនាវាចម្បាំង និងនាវាពាណិជ្ជកម្ម ដោយប្តេជ្ញាបន្តការវាយប្រហារលើនាវាដែលឆ្លងកាត់ប្រទេសយេម៉ែន រហូតដល់ការវាយលុករបស់អ៊ីស្រាអែលប្រឆាំងនឹងតំបន់ហ្គាហ្សាត្រូវបានបញ្ឈប់ ។

កន្លងមកការវាយប្រហារនៅសមុទ្រក្រហមរបស់ក្រុមហ៊ូទីបានរំខានដល់ការដឹកជញ្ជូនជាសកលរួចទៅហើយ ដោយបង្ខំឲ្យក្រុមហ៊ុនដឹកជញ្ជូនបង្វែរផ្លូវចរាចរណ៍ដែលមានចម្ងាយឆ្ងាយជាងមុន និងថ្លៃជាងមុននៅជុំវិញអាហ្វ្រិកខាងត្បូង ។

គួរបញ្ជាក់ថា ក្រុមសកម្មប្រយុទ្ធហ៊ូទីបានបាញ់មីស៊ីល និងបើកការវាយប្រហារដោយយន្តហោះគ្មានមនុស្សបើកម្ដងជាពីរដងប្រឆាំងនឹងការដឹកជញ្ជូនពាណិជ្ជកម្មអន្តរជាតិ ចាប់តាំងពីពាក់កណ្តាលខែវិច្ឆិកា ឆ្នាំ២០២៣ មកម្ល៉េះ ដោយលើកហេតុផលថា ក្រុមប្រដាប់អាវុធរបស់ខ្លួនកំពុងបង្ហាញសាមគ្គីភាពជាមួយប៉ាឡេស្ទីនប្រឆាំងនឹងសកម្មភាពយោធារបស់អ៊ីស្រាអែលនៅតំបន់ហ្គាហ្សា ។

ទោះជាយ៉ាងណា សហរដ្ឋអាមេរិក និងអង់គ្លេសមិនបិទភ្នែកបិទច្រមុះនោះទេ ពោលប្រទេសទាំងពីរបានព្រួតដៃគ្នាចាប់ផ្តើមការវាយប្រហារលើក្រុមនេះវិញ ដើម្បីសងសឹកចំពោះការវាយប្រហារលើផ្លូវដឹកជញ្ជូនទំនិញនៅសមុទ្រក្រហម ប៉ុន្តែជាក់ស្ដែងក្រុមនេះមិនខ្លាចរអានោះឡើយ ៕

អត្ថបទ ៖ ប៊ុន សុភាព