អ្នកវិទ្យាសាស្ត្រឲ្យត្រៀមខ្លួន! ជំងឺឆ្លងសាហាវៗនឹងផ្ទុះឡើង ដោយសារអាកាសធាតុក្តៅខ្លាំង

តាមការចុះផ្សាយរបស់ Daily Mail កាលពីចុងសប្តាហ៍កន្លងទៅ, ក្រុមអ្នកស្រាវជ្រាវនៅរដ្ឋកាលីហ្វ័រញ៉ា និងម៉ាសាឈូសេត សហរដ្ឋអាមេរិក បានព្រមានឲ្យពិភពលោកត្រៀមខ្លួន ព្រោះថា អាកាសធាតុក្តៅខ្លាំង អាចនាំឲ្យមានការកើនឡើងនៃជំងឺឆ្លងសាហាវៗ ដែលបណ្តាលមកពីវីរុស បាក់តេរី ផ្សិត និងប៉ារ៉ាស៊ីត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំងឺទាំងនេះ រាប់បញ្ចូលទាំងជំងឺដែលបង្កដោយសត្វចៃ និងជំងឺគ្រុនចាញ់ផ្ទុះមុនរដូវផងដែរ ហើយ​ជំងឺ​សម័យបុរាណ​ដូចជា​ប៉េស្ត​ ​ត្រូវ​បាន​គេរាយការណ៍ថា មានករណីឆ្លងនៅ​ក្នុង​រដ្ឋ ​New Mexico រួចទៅហើយ ពិសេសអ្វីដែលគួរឲ្យព្រួយបារម្ភគឺថា តាមការព្រមានពីក្រុមអ្នកវិទ្យាសាស្រ្ត, លំហូរនៃជំងឺឆ្លងអាចបង្កភាពចលាចលពេញពិភពលោកទាំងមូល តែម្តង។

កត្តាធំមួយគឺថា ការឡើងកម្តៅផែនដី បណ្តាលឲ្យរលាយផ្ទាំងទឹកកក គាស់កកាយមេរោគដែលកប់រាប់សតវត្សរ៍ ហើយថែមទាំងធ្វើឲ្យមេរោគនានា បំប្លែងខ្លួនទៀតផង។

រឿងនេះធ្វើឲ្យគេនឹកឃើញដល់កាលពីប៉ុន្មានខែមុន ដែលក្រុមអ្នកវិទ្យាសាស្រ្ត បង្ហាញក្តីបារម្ភនិងតាមដានយ៉ាងដិតដល់ជាទីបំផុត ចំពោះវីរុស Zombie សម័យដើមដែលលាក់ខ្លួននៅក្រោមផ្ទាំងទឹកកកក្នុងតំបន់ស៊ីបេរី ព្រោះថា ការឡើងកម្តៅផែនដី អាចឲ្យទឹកកករលាយ ហើយដោះលែងវីរុសអាយុកាល ៤៨ ៥០០ ឆ្នាំដ៏សាហាវនោះចេញមក។

វីរុសនេះ ត្រូវបានរកឃើញតាំងពីឆ្នាំ២០២២មកម្ល៉េះ ហើយក្រុមអ្នកវិទ្យាសាស្រ្តបានបន្តតាមដានវាយ៉ាងជាប់ និងត្រៀមខ្លួនដើម្បីដោះស្រាយបើមានករណីណាមួយកើតឡើង។

លើសពីនេះ ក្រុមអ្នកស្រាវជ្រាវនៅក្នុងការសិក្សាថ្មី ក៏បានផ្សារភ្ជាប់ការកើនឡើងនៃកម្រិតទឹកសមុទ្រនិងព្រឹត្តិការណ៍ធ្ងន់ធ្ងរដូចជាទឹកជំនន់ ទៅនឹងជំងឺដែលឆ្លងតាមទឹកដូចជាការរីករាលដាលនៃជំងឺ E coli ផងដែរ។

វេជ្ជបណ្ឌិត George R Thompson អ្នកដឹកនាំការសិក្សាដែលផ្តល់មូលនិធិដោយរដ្ឋាភិបាលសហរដ្ឋអាមេរិក និងជាអ្នកឯកទេសជំងឺឆ្លងនៅសាកលវិទ្យាល័យកាលីហ្វ័រញ៉ា-ដេវីស បាននិយាយថា “គ្រូពេទ្យទាំងឡាយ គួរត្រៀមខ្លួនដើម្បីដោះស្រាយជាមួយនឹងស្ថានការណ៍ជំងឺឆ្លង ដែលកំពុងប្រែប្រួលមិនទៀង។ ការរៀនសូត្រ អំពីទំនាក់ទំនងរវាងបម្រែបម្រួលអាកាសធាតុនិងជំងឺឆ្លង អាចជួយឲ្យការធ្វើរោគវិនិច្ឆ័យ ព្យាបាល និងទប់ស្កាត់ជំងឺឆ្លង កាន់តែមានប្រសិទ្ធភាព”។

មិនត្រឹមប៉ុណ្ណឹង អ្នកនិពន្ធការសិក្សា ក៏បានបង្ហាញក្តីកង្វល់ជាពិសេសផងដែរចំពោះជំងឺដែលបង្កឡើងដោយសត្វមូសខាំដូចជា គ្រុនឈាម ហ្ស៊ីកា និងគ្រុនចាញ់ ដែលកើតមានញឹកញាប់បំផុតក្នុងប្រទេសកំពុងអភិវឌ្ឍន៍។

ទោះយ៉ាងនេះក្តី ក៏មានការរិះគន់ចំៗផងដែរ ចំពោះការព្យាករខាងលើ ដោយអង្គការសុខភាពពិភពលោក (WHO) បកស្រាយថា មិនមែនជារឿងលេងសើចឡើយ ការសន្និដ្ឋានលឿនអ៊ីចឹង អាចបង្កឲ្យមានចលាចល ហើយពួកគេគួរគិតគូរឲ្យមែនទែនចំពោះផលវិបាក ក្រោយចេញរបាយការណ៍បែបនេះ៕

អត្ថបទ៖ សុខ សុវណ្ណ

ចុចអាន៖ អ្នកវិទ្យាសាស្រ្តកំពុងបារម្ភ ខ្លាចផ្ទុះមេរោគ Zombie ចេញពី តំបន់ស៊ីបេរី