អ្នកវិទ្យាសាស្រ្តកំពុងបារម្ភ ខ្លាចផ្ទុះមេរោគ Zombie ចេញពី តំបន់ស៊ីបេរី

ក្រុមអ្នកវិទ្យាសាស្រ្ត កំពុងបារម្ភនិងតាមដានយ៉ាងដិតដល់ជាទីបំផុត ចំពោះវីរុស Zombie សម័យដើមដែលលាក់ខ្លួននៅក្រោមផ្ទាំងទឹកកកក្នុងតំបន់ស៊ីបេរី ព្រោះថា ការឡើងកម្តៅផែនដី អាចឲ្យទឹកកករលាយ ហើយដោះលែងវីរុសដ៏សាហាវនោះចេញមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីរុសនេះ ត្រូវបានរកឃើញតាំងពីឆ្នាំ២០២២មកម្ល៉េះ ហើយក្រុមអ្នកវិទ្យាសាស្រ្តបានបន្តតាមដានវាយ៉ាងជាប់ និងត្រៀមខ្លួនដើម្បីដោះស្រាយបើមានករណីណាមួយកើតឡើង។

តាមការចុះផ្សាយរបស់ Daily Mail ក្នុងសប្តាហ៍នេះ, ក្រុមអ្នកជំនាញបានព្រមានអំពីការកើតជំងឺរាតត្បាតថ្មីជាសកល ប្រសិនបើវីរុសអាយុកាល៤៨៥០០ឆ្នាំ ពិតជាផ្ទុះចេញដោយការរលាយទឹកកកមែន។

អ្នកជំនាញខាងហ្សែនលោក Jean-Michel Claverie នៃសាកលវិទ្យាល័យ Aix-Marseille បាននិយាយថា ពេលលោកធ្វើដំណើរទៅចុងភាគខាងជើងផែនដី លោកបានសិក្សាអំពីមេរោគនៅទីនោះ។ ពិតណាស់ មេរោគពិតជាមានឱកាសឆ្លងដល់មនុស្ស និងបង្កជាជំងឺរាតត្បាតថ្មីមែន។ អ្វីដែលជាក្តីព្រួយបារម្ភបំផុតគឺថា ប្រព័ន្ធភាពស៊ាំរបស់មនុស្ស មិនដែលស្គាល់មេរោគបែបនេះទេ នោះហើយជាបញ្ហា។

ទោះបីជាយ៉ាងណាក៏ដោយ លោកអះអាងថា ទម្រាំទឹកកកនៅតំបន់ប៉ូលរលាយនិងដោះលែងមេរោគនេះចេញមក វាអាចចំណាយពេលរាប់រយឆ្នាំទៀតឯណោះ ប៉ុន្តែយើងក៏ត្រូវរៀបចំខ្លួនឲ្យរួចរាល់ចាប់ពីឥឡូវនេះទៅដែរ។

ជាលទ្ធផល អ្នកវិទ្យាសាស្ត្រ បានចាប់ផ្តើមរៀបចំផែនការបណ្តាញត្រួតពិនិត្យតំបន់អាក់ទិក ដែលនឹងរាយការណ៍ភ្លាមៗ បើមាននរណាឆ្លងជំងឺដែលបណ្តាលមកពីមេរោគសរីរាង្គសម័យបុរាណ។ បន្ថែមពីលើនេះ បណ្តាញដដែល ក៏អនុវត្តការធ្វើចត្តាឡីស័ក និងព្យាបាលអ្នកឆ្លងមេរោគដោយប្រើថ្នាំពិសេសផងដែរ ដើម្បីទប់ស្កាត់ការរីករាលដាល និងការពារអ្នកឆ្លងមិនឲ្យចាកចេញពីតំបន់នោះ។

សូមបញ្ជាក់ថា ការដែលអ្នកវិទ្យាសាស្រ្តនាំគ្នាហៅមេរោគនេះថា Zombie មិនមែនពេលមនុស្សឆ្លងហើយក្លាយទៅជាខ្មោច Zombie ទេ ប៉ុន្តែព្រោះ វាខ្លាំងមានសមត្ថភាពរស់នៅក្នុងទឹកកកបានយូរ មិនងាប់៕

អត្ថបទ៖ សុខ សុវណ្ណ

ចុចអាន៖ រកឃើញវីរុស Zombie នៅមានជីវិត ទោះកកអស់ពេល ៤៨,៥០០ ឆ្នាំ