ឥណ្ឌា ចាប់ផ្ដើមមានមនុស្សស្លាប់ ដោយសារសីតុណ្ហភាពក្ដៅខ្លាំង

មនុស្ស ២ នាក់បានស្លាប់បាត់បង់ជីវិតនៅក្នុងរដ្ឋ Kerala ភាគខាងត្បូងប្រទេសឥណ្ឌា ដោយសារជំងឺដាច់សរសៃឈាមខួរក្បាលបណ្ដាលមកពីកម្ដៅខ្លាំង ខណៈដែលប្រទេសនេះទទួលរងនូវការកើនឡើងសីតុណ្ហភាពមិនធ្លាប់មាន ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៣០ ខែមេសានេះ ។

យោងតាមកាសែត Hindu បានរាយការណ៍កាលពីចុងសប្ដាហ៍ថា ស្ត្រីអាយុ ៩០ ឆ្នាំម្នាក់ និងបុរសអាយុ ៥៣ ឆ្នាំម្នាក់បានស្លាប់នៅក្នុងរដ្ឋ Kerala ដោយសារជំងឺដាច់សរសៃរឈាមខួរក្បាលដែលបណ្ដាលមកពីរលកកម្ដៅឡើងខ្លាំង ខណៈសីតុណ្ហភាពនាពេលនោះហក់ដល់ជិត ៤២ អង្សាសេ ។

សីតុណ្ហភាពនៅទូទាំងរដ្ឋ Kerala ត្រូវបានគេរំពឹងថានឹងខ្ពស់ជាងធម្មតា ដែលបណ្តាលឲ្យអាជ្ញាធរចេញការព្រមានដោយសុំឲ្យប្រជាជនមានការប្រុងប្រយ័ត្នចំពោះកម្ដៅ និងចៀសវាងការចេញក្រៅផ្ទះ ខណៈសាលារៀនជាច្រើនត្រូវបានបិទទ្វារ ។

មិនត្រឹមតែនៅក្នុងរដ្ឋ Kerala ប៉ុណ្ណោះទេនៅក្នុងរដ្ឋ Odisha ភាគខាងកើត Odisha សីតុណ្ហភាពក៏ឡើងដល់ ៤៤.៩ អង្សាសេផងដែរកាលពីចុងសប្ដាហ៍ដែលជាកំណត់ត្រាខ្ពស់បំផុតក្នុងខែមេសានេះ ។

ជាមួយគ្នានេះ ប្រទេសនៅក្បែរខាងគ្នាដូចជា បង់ក្លាដែស អាជ្ញាធរបានប្រកាសបិទសាលាបឋមសិក្សាទាំងអស់នៅទូទាំងប្រទេស និងស្ថាប័នអប់រំស្ទើរតែពាក់កណ្តាល ខណៈដែលរលកកម្ដៅខ្លាំងបានធ្វើឲ្យសីតុណ្ហភាពកើនឡើងលើសពី ៤៣ អង្សាសេ ៕

អត្ថបទ ៖ ប៊ុន សុភាព