ព័ត៌មានអន្ដរជាតិ

អ៉ីស្រាអ៊ែល ប្រកាសបិទ និងវាយឆ្មក់ទីតាំងសារព័ត៌មាន Al Jazeera ភ្លាមៗ

បានផុស

១០ ខែ មុន

នៅ

ថ្ងៃចន្ទ ៦ ឧសភា ២០២៤

ដោយ

Chheang

បន្ទប់សណ្ឋាគារមួយកន្លែងនៅក្រុងយេរូសាឡឹម ដែលបានប្រើប្រាស់ជាការិយាល័យរបស់ Al Jazeera ត្រូវបានក្រុមប៉ូលិសចូលលបវាយឆ្មក់ ក្រោយរដ្ឋាភិបាលអ៉ីស្រាអ៊ែលសម្រេចចិត្តបិទប្រតិបត្តិការទាំងអស់របស់បណ្ដាញសារព័ត៌មានមួយនេះ កាលពីថ្ងៃទី៥ ខែឧសភា។ នេះបើយោងតាមការចុះផ្សាយរបស់សារព័ត៌មាន Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧទ្ទកាល័យនាយករដ្ឋមន្ត្រី Benjamin Netanyahu បានប្រកាសថា វត្តមានសារព័ត៌មាន Al Jazeera បានធ្វើការគំរាមកំហែងចំពោះសន្តិសុខជាតិ ហើយការបិទនេះធ្វើឡើងដរាបណាសង្គ្រាមនៅតំបន់កាហ្សានៅតែបន្តកើតឡើង។ វិធានការរបស់អ៉ីស្រាអ៊ែល មានដូចជា ការចុះបិទការិយាល័យ Al Jazeera នៅអ៉ីស្រាអ៊ែលភ្លាមៗ ការរឹបអូសយកសម្ភារៈផ្សព្វផ្សាយ ការកាត់ផ្ដាច់ប៉ុស្ដិ៍ផ្សាយចេញពីក្រុមហ៊ុនខ្សែកាបនិងផ្កាយរណប ព្រមទាំងការបិទវិបសាយទាំងអស់របស់ Al Jazeera។ នាយករដ្ឋមន្ត្រីអ៉ីស្រាអ៊ែល បានចាត់ទុក Al Jazeera ជាសារព័ត៌មាន ដែលមានសភាពញុះញុង់ ហើយបានរិះគន់ប្រតិបត្តិការយោធារបស់អ៉ីស្រាអ៊ែលនៅតំបន់កាហ្សានាពេលកន្លងមក។

Al Jazeera ដែលជាបណ្ដាញសារព័ត៌មានរបស់ទូរទស្សន៍រដ្ឋកាតា បានហៅទង្វើនេះថា គឺជា “សកម្មភាពឧក្រិដ្ឋកម្ម” ហើយការចោទប្រកាន់ដែលថាប៉ះពាល់ដល់សន្តិសុខជាតិអ៉ីស្រាអ៊ែល គឺជា “ការកុហកដ៏ឆ្កួតលីលា និងគ្រោះថ្នាក់” ដែលធ្វើឲ្យអ្នកសារព័ត៌មានប្រឈមនឹងហានិភ័យ។

ទាក់ទិននឹងការបិទនេះ ការិយាល័យសិទ្ធិមនុស្សនៅអង្គការសហប្រជាជាតិ បានសម្ដែងនូវសេចក្ដីខកចិត្ត និងរិះគន់ចំពោះចំណាត់ការរបស់អ៉ីស្រាអ៊ែល ហើយបានសរសេរនៅបណ្ដាញសង្គម X ថា “ពួកយើងសោកស្ដាយចំពោះសេចក្ដីសម្រេចរបស់គណៈរដ្ឋមន្ត្រីក្នុងការបិទ Al Jazeera នៅអ៉ីស្រាអ៊ែល។ ប្រព័ន្ធផ្សព្វផ្សាយដែលមានសេរីភាព និងឯករាជ្យភាព ពិតជាមានសារៈសំខាន់ ដើម្បីធានាបាននូវតម្លាភាព និងទំនួលខុសត្រូវ។ ឥលូវ រឹតតែមានការរឹតបន្តឹងថែមទៀតចំពោះការរាយការណ៍ព័ត៌មានពីកាហ្សា។ សេរីភាពនៃការបញ្ចេញមតិគឺជាកូនសោនៃសិទ្ធិមនុស្ស។ ពួកយើងជំរុញឲ្យរដ្ឋាភិបាលលុបចោលនូវការហាមឃាត់នេះឡើងវិញ”៕

ដោយ៖ ឈាង