ព័ត៌មានអន្ដរជាតិ

អាមេរិក ផ្អាកការដឹកគ្រាប់បែកឲ្យទៅអ៉ីស្រាអ៊ែល ព្រួយបារម្ភរឿងវាយលុកនៅ Rafah

បានផុស

២ years មុន

នៅ

ថ្ងៃពុធ ៨ ឧសភា ២០២៤

ដោយ

Chheang

គម្រោងបញ្ជូនគ្រាប់បែករបស់អាមេរិកឲ្យទៅអ៉ីស្រាអ៊ែល ត្រូវបានផ្អាកជាបណ្ដោះអាសន្នហើយ កាលពីសប្ដាហ៍មុន ដោយអាមេរិកព្រួយបារម្ភថា អ៉ីស្រាអ៊ែលអាចនឹងបើកការវាយប្រហារខ្នាតធំទៅលើទីក្រុង Rafah នៃតំបន់កាហ្សា ដែលវាគឺជាទង្វើផ្ទុយពីបំណងរបស់សហរដ្ឋអាមេរិក។ នេះបើយោងតាមការចុះផ្សាយរបស់សារព័ត៌មាន AP នៅថ្ងៃទី៨ ខែឧសភា។

ការវាយប្រហារនៅទីក្រុង Rafah ភាគខាងត្បូងតំបន់កាហ្សា ថ្ងៃទី៧ ខែឧសភា ឆ្នាំ២០២៤ (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយរបស់អាមេរិកនេះ ដំបូងឡើយគ្រោងនឹងដឹកគ្រាប់បែកប្រភេទទម្ងន់ ៩០០គីឡូក្រាម និងប្រភេទទម្ងន់ ២២៥គីឡូក្រាម ទៅអ៉ីស្រាអ៊ែល តែត្រូវផ្អាកវិញ ព្រោះអាមេរិក បារម្ភថា អ៉ីស្រាអ៊ែលអាចប្រើគ្រាប់បែកទាំងនោះយកទៅបំផ្ទុះនៅតំបន់ប្រជុំជន ដែលមានជនស៊ីវិលរស់នៅច្រើនជាង ១លាននាក់។

ការផ្អាកជំនួយលើកនេះ ឆ្លុះបញ្ចាំងពីការទាមទាររបស់អាមេរិក ដែលប្រាប់ឲ្យអ៉ីស្រាអ៊ែលត្រូវប្រឹងប្រែងបន្ថែមទៀតដើម្បីការពារជីវិតជនស៊ីវិលដែលមិនដឹងអីនៅតំបន់កាហ្សា។ កាលពីថ្ងៃទី៧ ខែឧសភា អាមេរិកបានបដិសេធមិនបញ្ជាក់ថា ការផ្អាកជំនួយទៅអ៉ីស្រាអ៊ែលត្រូវធ្វើដល់ពេលណានោះទេ។

គួររំឭកថា ការវាយប្រហាររបស់ក្រុមហាម៉ាស នៅភាគខាងត្បូងអ៉ីស្រាអ៊ែល ធ្វើឡើងនៅក្នុងថ្ងៃទី៧ ខែតុលា ឆ្នាំ២០២៣ ដោយសម្លាប់មនុស្សយ៉ាងតិច ១ ២០០នាក់ និង ២៥០នាក់ ត្រូវបានចាប់ជាចំណាប់ខ្មាំង។ អ៉ីស្រាអ៊ែល បានសងសឹកវិញដោយបើកការវាយប្រហារតាមដែនអាកាស និងជើងគោក ក្នុងនោះមានពលរដ្ឋប៉ាឡេស្ទីនបានស្លាប់ ៣៤ ៥៦៨នាក់ ខណៈ ៧៧ ៧៦៥នាក់ផ្សេងទៀតរងរបួស។

សភាអាមេរិក កាលពីខែមេសាកន្លងទៅ បានអនុម័តកញ្ចប់ជំនួយថវិកាសន្តិសុខជាតិចំនួន ៩៥ពាន់លានដុល្លារឲ្យទៅបណ្ដាសម័ន្ធមិត្ត ហើយក្នុងនោះអ៉ីស្រាអ៊ែលទទួលបានជំនួយយោធាជាង ១៤ពាន់លានដុល្លារ៕

ដោយ៖ ឈាង