មនុស្សជិត ២០០ នាក់នៅ ជប៉ុន សម្រុកទៅតេស្តមើលខូចក្រលៀនឬអត់ ក្រោយប្រើអាហារបំប៉នខុសស្ដង់ដារ

មនុស្សជិត ២០០ នាក់នៅក្នុងប្រទេសជប៉ុនបានសម្រុកទៅធ្វើតេស្តរកមើលថាតើមានបញ្ហាខូចក្រលៀនដែរឬអត់ បន្ទាប់ពីទទួលទានអាហារបំប៉នមួយប្រភេទផ្ទុកទៅដោយសារធាតុម្យ៉ាងឈ្មោះ “beni-koji” ដែលមានធាតុផ្សំដូចជា អង្ករលាយជាមួយនឹងមេដំបែ ជាធាតុមួយត្រូវគេសន្មត់ថាជួយកាត់បន្ថយកម្រិតកូឡេស្តេរ៉ូល ឬខ្លាញ់អាក្រក់បាន ។ នេះបើយោងតាមសេចក្ដីរាយការណ៍ពីទូរទស្សន៍ជាតិ NHK កាលពីថ្ងៃទី៧ ខែឧសភាកន្លងទៅ ។

គិតត្រឹមខែមេសា មនុស្សចំនួន ១៨៩ នាក់បានញាប់ដៃញាប់ជើងរត់ទៅជួបគ្រូពេទ្យដើម្បីធ្វើតេស្តថាតើមានផលប៉ះពាល់ទៅដល់តម្រងនោម ឬក្រលៀនដែរឬក៏យ៉ាងណា បន្ទាប់ពីប្រើប្រាស់ផលិតផលប្រមាណជា ៣ ប្រភេទរបស់ក្រុមហ៊ុនឱសថ Kobayashi Pharmaceutical ។

ទន្ទឹមនោះ មានតែមនុស្ស ១៥ នាក់ប៉ុណ្ណោះដែលមិនបង្ហាញអាការៈរោគពីបញ្ហាខូចក្រលៀន ប៉ុន្តែចំពោះអ្នកផ្សេងទៀតគ្រូពេទ្យបានបង្ហាញពីលទ្ធផលតេស្តថា ភាគច្រើននៃអ្នកទាំងនោះបង្ហាញរោគសញ្ញាពាក់ព័ន្ធដូចជា មុខងារតម្រងនោមមានភាពមិនប្រក្រតី បាត់បង់ចំណីអាហារ អស់កម្លាំង និងទឹកនោមប្រែពណ៌ជាដើម ។

ស្របពេលជាមួយគ្នានេះ ក្នុងចំណោមអ្នកជំងឺ ៩៤ នាក់ដែលបានធ្វើតេស្តជាលិកាតម្រងនោមបានបង្ហាញថា ៤៣.៥ ភាគរយនៃអ្នកជំងឺមានបញ្ហារលាកតម្រងនោម ហើយ ២៨.៣ ភាគរយមានដំបៅរលួយ ឬឈានទៅដល់ការខូចក្រលៀនតែម្ដង ។

អាហារបំប៉នជាប្រភេទថ្នាំគ្រាប់ផលិតដោយក្រុមហ៊ុនឱសថ Kobayashi Pharmaceutical ដែលមានមូលដ្ឋាននៅទីក្រុងអូសាកាផ្ទុះល្បីធ្វើឲ្យខូចក្រលៀន ខណៈក៏មានមនុស្សមួយចំនួនស្លាប់បាត់បង់ជីវិតផងដែរ បន្ទាប់ពីទទួលទានអាហារបំប៉នដែលល្បីប្រើទៅជួយឲ្យស្រួលខ្លួន និងមានសុខភាពល្អមួយនេះ ។ ទោះយ៉ាងណា ខាងក្រុមហ៊ុនក៏បានចេញមុខទទួលស្គាល់កំហុស និងបានប្រមែប្រមូលផលិតផលរបស់ខ្លួនចូលរោងចក្រវិញផងដែរ ៕

គួរបញ្ជាក់ថា គិតត្រឹមពេលនេះ ជប៉ុនមានអ្នកស្លាប់បាត់បង់ជីវិតចំនួន ៥ នាក់ហើយ បន្ទាប់ពីប្រើប្រាស់អាហារបំប៉នដែលមានសារធាតុ “beni-koji” ខណៈមនុស្សប្រមាណ ១១0 នាក់ផ្សេងទៀតកំពុងដេកសម្រាកព្យាបាលនៅមន្ទីរពេទ្យ ហើយជនរងគ្រោះទាំងនោះសុទ្ធសឹងតែមានបញ្ហាក្រលៀន និងសុខភាពផ្សេងទៀតជាដើម ៕

ដោយ ៖ សុខ ជីវ័ន្ត

ចុចអាន ៖ ៣ ប្រទេសនៅ អាស៊ាន ក្លាយជាមុខព្រួញទេសចរណ៍ល្បីៗទាំង ១០ របស់ ចិន