ព័ត៌មានអន្ដរជាតិ

កិច្ចព្រមព្រៀងកំពង់ផែឥណ្ឌា-អ៊ីរ៉ង់ អាចទទួលទណ្ឌកម្មពីអាមេរិក

បានផុស

១១ ខែ មុន

នៅ

ថ្ងៃពុធ ១៥ ឧសភា ២០២៤

ដោយ

Chheang

សហរដ្ឋអាមេរិក បានប្រកាសថា ទណ្ឌកម្មអាចនឹងដាក់ចេញចំពោះប្រទេសណា ដែលសហការពាណិជ្ជកម្មជាមួយអ៊ីរ៉ង់។ ការព្រមានបែបនេះ ធ្វើឡើងបន្ទាប់ពីឥណ្ឌា បានចុះកិច្ចសន្យារយៈពេល១០ឆ្នាំជាមួយអ៊ីរ៉ង់ នៅលើគម្រោងកំពង់ផែ Chabahar កាលពីពេលថ្មីៗកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១៣ ខែឧសភា ឥណ្ឌា បានចុះកិច្ចព្រមព្រៀងរយៈពេលវែងជាមួយអ៊ីរ៉ង់ ដើម្បីអភិវឌ្ឍកំពង់ផែរបស់ខ្លួន ដោយពីមុនប្រទេសទាំង២ក៏ធ្លាប់សហការគ្នាម្ដងរួចមកហើយកាលពីឆ្នាំ២០១៦កន្លងទៅ។ រដ្ឋមន្ត្រីក្រសួងដឹកជញ្ជូនឥណ្ឌា បានហៅកិច្ចព្រមព្រៀងតម្លៃ៣៧០លានដុល្លារនេះថាជា “ពេលវេលាប្រវត្តិសាស្ត្រក្នុងចំណងមិត្តភាពឥណ្ឌា-អ៊ីរ៉ង់”។

វាជាដំណឹងរីករាយសម្រាប់ប្រទេសទាំង២ តែអាមេរិកហាក់មិនពេញចិត្តសោះឡើយ ព្រោះនេះបង្ហាញពីការរំលោភបំពានទណ្ឌកម្មរបស់ខ្លួនដែលបានដាក់លើរដ្ឋាភិបាលតេហេរ៉ង់។ អាមេរិកបានអនុវត្តទណ្ឌកម្មជាង៦០០ លើអង្គភាពដែលពាក់ព័ន្ធនឹងអ៊ីរ៉ង់ នៅអំឡុងពេល៣ឆ្នាំកន្លងមកនេះ។

ប្រធានាធិបតីអ៊ីរ៉ង់លោក Hassan Rouhani និងនាយករដ្ឋមន្ត្រីឥណ្ឌាលោក Narendra Modi

លោក Vedant Patel អ្នកនាំពាក្យរងក្រសួងការបរទេសអាមេរិក បានថ្លែងកាលពីម្សិលមិញថា ទណ្ឌកម្មលើអ៊ីរ៉ង់នៅតែមានដដែល ហើយរដ្ឋាភិបាលក្រុងវ៉ាស៊ីតោន នឹងបន្តអនុវត្តវាបន្ថែមទៀត។ លោក ថា “អង្គភាពណាក៏ដោយ បុគ្គលណាក៏ដោយ ឲ្យតែហ៊ានពិចារណាធ្វើកិច្ចព្រមព្រៀងជំនួញជាមួយអ៊ីរ៉ង់ ត្រូវដឹងខ្លួនអំពីហានិភ័យខ្ពស់ដែលពួកគេកំពុងបណ្ដោយខ្លួនប្រឈមជាមួយ ព្រមទាំងហានិភ័យនៃទណ្ឌកម្មដែលត្រូវដាក់”។

ពាក់ព័ន្ធនឹងការលើកឡើងរបស់អាមេរិក រដ្ឋាភិបាលឥណ្ឌានៅមិនទាន់មានការឆ្លើយតបណាមួយនៅឡើយទេ។

សូមបញ្ជាក់ថា ឥណ្ឌាបានចាប់ផ្ដើមដំណើរការកំពង់ផែ Chabahar នាចុងឆ្នាំ២០១៨។ កំពង់ផែនេះ អនុញ្ញាតឲ្យឥណ្ឌាអាចដឹកទំនិញ និងផលិតផលតាមផ្លូវទឹកទៅកាន់ប្រទេសអាហ្វហ្គានីស្ថាន និងអាស៊ីកណ្ដាល ជំនួសឲ្យការដឹកជញ្ជូនតាមផ្លូវគោកឆ្លងកាត់ប៉ាគីស្ថាន ខណៈដែលប្រទេសទាំង២កំពុងមានភាពតានតឹងនឹងគ្នា៕

ដោយ៖ ឈាង