ស្លូវ៉ាគី គ្រោងផ្ទេរលោក Fico ទៅព្យាបាលនៅរដ្ឋធានី វិញ

ប៉ុន្មានថ្ងៃទៀត ក្រុមវេជ្ជបណ្ឌិតស្លូវ៉ាគី នឹងជួបពិភាក្សាគ្នាអំពីសុខភាពរបស់លោកនាយករដ្ឋមន្ត្រី Robert Fico និងដើម្បីសម្រេចថា តើគួរបញ្ជូនគាត់ទៅព្យាបាលនៅមន្ទីរពេទ្យធំក្នុងរដ្ឋធានី ប្រាទីស្លាវ៉ា ដែរឬក៏អត់ ត្បិតរួចផុតពីសេចក្តីស្លាប់ក៏ពិតមែន ប៉ុន្តែបច្ចុប្បន្ន ស្ថានភាពរបស់គាត់នៅតែធ្ងន់ធ្ងរនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Straits Times នៅថ្ងៃសុក្រទី១៧ខែឧសភា, ក្រុមប្រឹក្សាវេជ្ជសាស្រ្តស្លូវ៉ាគី នឹងកោះប្រជុំនៅថ្ងៃចន្ទដើមសប្តាហ៍ក្រោយ ដើម្បីគិតគូរថាតើពិតជាត្រូវបញ្ជូនលោកនាយករដ្ឋមន្ត្រីពីមន្ទីរពេទ្យក្រុង បានស្កា បាយស្ទ្រីកា ទៅកាន់រដ្ឋធានី ប្រាទីស្លាវ៉ា ឬក៏អត់។

ស្របពេលជាមួយគ្នានោះដែរ ភ្នាក់ងារ​រ៉យទ័រ ក៏បានទាក់ទងទៅមន្ទីរពេទ្យ បានស្កា បាយស្ទ្រីកា ផងដែរ ប៉ុន្តែមិនមានការឆ្លើយតប បំភ្លឺអំពីព័ត៌មាននេះទេ។

សូមបញ្ជាក់ជាថ្មី លោក Robert Fico ត្រូវបានខ្មាន់កាំភ្លើងបាញ់៥គ្រាប់ បណ្តាលឲ្យរងរបួសធ្ងន់ ពេលជួបជាមួយអ្នកគាំទ្រនៅក្នុងព្រឹត្តិការណ៍មួយខាងក្រៅមជ្ឈមណ្ឌលវប្បធម៌ក្នុងទីក្រុង Handlova កាលពីរាត្រីថ្ងៃពុធទី១៥ខែឧសភា (ពេលវេលានៅកម្ពុជា)។

ខ្មាន់កាំភ្លើងឈ្មោះ Juraj Cintula អាយុ៧១ឆ្នាំ ត្រូវបានឃាត់ខ្លួននៅនឹងកន្លែង ហើយពេលនេះ រងការចោទប្រកាន់ពីឃាតកម្មគិតទុកជាមុន ហើយរូបគេ អាចមានទោសជាប់ពន្ធនាគារអស់មួយជីវិត។

តាមការបញ្ជាក់ពី រដ្ឋមន្ត្រីមហាផ្ទៃស្លូវ៉ាគី Matus Sutaj Estok បានឲ្យដឹងថា ការវាយប្រហារនេះគឺជាប់ទាក់ទិននឹងបញ្ហានយោបាយសុទ្ធសាធ ហើយខ្មាន់កាំភ្លើងធ្វើសកម្មភាពតែម្នាក់ឯងគត់។

ការបាញ់ប្រហារនេះគឺជាការប៉ុនប៉ងធ្វើឃាតទ្រង់ទ្រាយធំលើកដំបូង លើមេដឹកនាំនយោបាយអឺរ៉ុបក្នុងរយៈពេលជាង២០ឆ្នាំចុងក្រោយ ហើយបង្កឲ្យមានការថ្កោលទោសយ៉ាងចាស់ដៃពីអន្តរជាតិ។

ពាក់ព័ន្ធហេតុការណ៍នេះដែរ ក្រុមអ្នកវិភាគនយោបាយនិងអ្នកតាក់តែងច្បាប់អន្តរជាតិនាំគ្នានិយាយថា វាបង្ហាញពីបរិយាកាសនយោបាយដែលកាន់តែក្តៅគគុក និងមានភាពចម្រូងចម្រាស់ទាំងនៅក្នុងប្រទេសស្លូវ៉ាគី និងទ្វីបអឺរ៉ុបទាំងមូលតែម្តង៕

អត្ថបទ៖ សុខ សុវណ្ណ

ចុចអាន៖ តើខ្មាន់កាំភ្លើង ប៉ងធ្វើឃាតនាយករដ្ឋមន្ត្រីស្លូវ៉ាគី ត្រូវមានទោសធ្ងន់កម្រិតណា?