ព័ត៌មានអន្ដរជាតិ

នូវែលសេឡង់ ថា ខ្មាសគេ ព្រោះយន្តហោះដឹកនាយករដ្ឋមន្ត្រីឧស្សាហ៍ខូច

បានផុស

២ years មុន

នៅ

ថ្ងៃចន្ទ ១៧ មិថុនា ២០២៤

ដោយ

Chheang

យន្តហោះយោធានូវែលសេឡង់ ដែលដឹកលោកនាយករដ្ឋមន្ត្រី Christopher Luxon សំដៅទៅកាន់ប្រទេសជប៉ុន បានខូចនៅពាក់កណ្ដាលផ្លូវកាលពីថ្ងៃទី១៦ ខែមិថុនា ដោយតម្រូវឲ្យមានការផ្លាស់ប្ដូរលោកនាយករដ្ឋមន្ត្រីទៅជិះតាមជើងហោះហើរពាណិជ្ជកម្មវិញ។ នេះបើយោងតាមការប្រកាសរបស់ការិយាល័យនាយករដ្ឋមន្ត្រីនូវែលសេឡង់ នៅថ្ងៃចន្ទទី១៧ ខែមិថុនា ឆ្នាំ២០២៤។

លោក Christopher Luxon នាយករដ្ឋមន្ត្រីនូវែលសេឡង់ (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Luxon គ្រោងនឹងចំណាយពេល៤ថ្ងៃនៅក្នុងក្រុងតូក្យូ ដើម្បីជួបនាយករដ្ឋមន្ត្រីជប៉ុន លោក Fumio Kishida និយាយអំពីការផ្សព្វផ្សាយពាណិជ្ជកម្មរបស់នូវែលសេឡង់។ កំឡុងពេលធ្វើដំណើរ លោក Luxon បានជិះយន្តហោះកងកម្លាំងការពារជាតិនូវែលសេឡង់ Boeing 757 តែត្រូវបានខូច នៅពេលចតចាក់សាំងនៅក្នុងប្រទេសប៉ាពូអាស៊ីនូវែលហ្គីណេ ដែលជាហេតុនាំឲ្យគណៈប្រតិភូធុរកិច្ច និងអ្នកកាសែត ត្រូវជាប់ខ្លួនក្នុងរដ្ឋធានី Port Moresby ខណៈដែលលោក Luxon បានហោះហើរបន្តតាមជើងយន្តហោះពាណិជ្ជកម្មទៅកាន់ទីក្រុងតូក្យូ។

ពាក់ព័ន្ធនឹងបញ្ហានេះ លោក Judith Collins រដ្ឋមន្ត្រីក្រសួងការពារជាតិនូវែលសេឡង់ បានប្រាប់ស្ថានីយវិទ្យុ Newstalk ZB ថា បញ្ហាខូចយន្តហោះនេះគឺឧស្សាហ៍កើតឡើង ហើយវាជាភាពអាម៉ាសមួយរបស់នូវែលសេឡង់។ លោកបន្តថា ក្រសួងរបស់លោកនឹងចាត់ចែងមធ្យោបាយដឹកនាយករដ្ឋមន្ត្រី និងគណៈប្រតិភូតាមជើងហោះពាណិជ្ជកម្មវិញ ចាប់ពីពេលនេះទៅ ខណៈដែលយន្តហោះយោធា Boeing 757 ទាំង២គ្រឿង របស់នូវែលសេឡង់ មានអាយុកាលចំណាស់ខ្លាំងដល់ទៅជាង ៣០ឆ្នាំ ហើយមិនសូវមានសុវត្ថិភាព។

សូមបញ្ជាក់ថា បច្ចុប្បន្ន កងកម្លាំងការពារជាតិនូវែលសេឡង់ កំពុងជួបប្រទះនឹងបញ្ហាឧបករណ៍ប្រើប្រាស់ចាស់ៗ និងកង្វះខាតចំនួនកងកម្លាំង។ រដ្ឋាភិបាល បានប្រកាសថានឹងចំណាយបន្ថែមទៀតលើវិស័យការពារជាតិ ប៉ុន្តែទន្ទឹមគ្នានេះដែរក៏ព្យាយាមកាត់បន្ថយការចំណាយដែលមិនចាំបាច់ ខណៈពេលប្រទេសកំពុងប្រឈមនឹងវិបត្តិសេដ្ឋកិច្ច៕

ដោយ៖ ឈាង

Related Topics:ប្រទេសនូវែលសេឡង់

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា