ព័ត៌មានអន្ដរជាតិ

“បៃឌិន ឬក៏ ត្រាំ” មួយណាឈ្នះឆ្នោត ក៏ចិនមិនខ្ចីទៅខ្វល់ចិត្តជាមួយឡើយ

បានផុស

៩ ខែ មុន

នៅ

ថ្ងៃព្រហស្បតិ៍ ២០ មិថុនា ២០២៤

ដោយ

Chheang

យោងតាមការចុះផ្សាយរបស់សារព័ត៌មាន Bloomberg នៅថ្ងៃទី២០ ខែមិថុនា ឆ្នាំ២០២៤ បានឲ្យដឹងថា មេដឹកនាំចិនគ្មានក្ដីព្រួយបារម្ភ ឬចាប់អារម្មណ៍សោះឡើយ ពាក់ព័ន្ធនឹងការបោះឆ្នោតនៅសហរដ្ឋអាមេរិក ដែលត្រៀមនឹងប្រព្រឹត្តឡើងនៅខែវិច្ឆិកាខាងមុខ។

លោក ចូ បៃឌិន (ឆ្វេង) លោក ស៊ី ជីនពីង (កណ្ដាល) និងលោក ដូណាល់ ត្រាំ (ស្ដាំ)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីចារកម្មអាមេរិក បានប្រាប់ Bloomberg ថា ចិនមិនមានទំនោរទៅខាងណានោះទេ រវាងបេក្ខភាពប្រធានាធិបតីទាំង២របស់អាមេរិក គឺ លោក ចូ បៃឌិន និងលោក ដូណាល់ ត្រាំ។ ទោះម្នាក់ណាជាប់ឆ្នោត ក៏ទំនាក់ទំនងរវាងចិន និងអាមេរិក មិនអាចស្រោចស្រង់បានល្អប្រសើរជាងនេះវិញដែរ ពោលគឺភាពតានតឹងនឹងនៅតែបន្តក្នុងរយៈពេលវែងតទៅមុខទៀត ដោយប៉ុន្មានឆ្នាំកន្លងទៅនេះ មហាយក្សទាំង២ បានបង្កើតជម្លោះដាក់គ្នាលើរឿងគ្រប់បែបយ៉ាងទៅហើយ រាប់ចាប់ពីវិស័យបច្ចេកវិទ្យា រហូតដល់សិទ្ធិមនុស្ស ព្រមទាំងជម្លោះនៅលើដែនសមុទ្រចិនខាងត្បូង។

ស្រដៀងគ្នាទៅនឹងសម្ដីរបស់ចារកម្មអាមេរិក ប្រភពពីមន្ត្រីរបស់ក្រុងប៉េកាំង ក៏បានរៀបរាប់ដូចគ្នាប្រាប់ទៅសារព័ត៌មាន Bloomberg ផងដែរថា បេក្ខភាពទាំង២សុទ្ធតែមានបំណងគាបសង្កត់ចិន ហើយបន្តធ្វើឲ្យទំនាក់ទំនងល្អក់កករដដែល។ លោក Gao Zhikai អតីតមន្ត្រីការទូតចិន និងធ្លាប់ធ្វើជាអ្នកបកប្រែឲ្យអតីតមេដឹកនាំចិនលោក Deng Xiaoping បាននិយាយថា លោក ចូ បៃឌិន ជាបុគ្គលបែបសង្គ្រាមត្រជាក់ ដែលមិនខ្វល់ខ្វាយរឿងពិភពលោកធ្លាក់ចូលក្នុងជម្លោះបែបណាទេ ខណៈដែលលោក ដូណាល់ ត្រាំ វិញគឺជាបុគ្គលដែលនឹងប្រហែលជាដាក់ទណ្ឌកម្ម និងរឹតបន្តឹងពន្ធលើប្រទេសចិន ដូចដែលលោកធ្លាប់បានធ្វើកាលពីអាណត្តិជាប្រធានាធិបតីរបស់លោក។ លោក Gao ថា “តាមទស្សនៈរបស់ចិន យើងគ្រាន់តែត្រូវអង្គុយមើលឲ្យស្ងៀម។ នរណាឈ្នះក៏ដោយ ចិនត្រូវតែដោះស្រាយជាមួយអ្នកនោះ ជាជាងរង់ចាំភាពមិនប្រាកដប្រជា”។

ចំណែកឯ លោក Liu Pengyu អ្នកនាំពាក្យស្ថានទូតចិននៅក្រុងវ៉ាស៊ីតោន ពេលត្រូវគេចោទសួរអំពីរឿងបោះឆ្នោតនៅអាមេរិក បាននិយាយថា ក្រុងប៉េកាំងមិនលូកលាន់ចំពោះកិច្ចការផ្ទៃក្នុងរបស់សហរដ្ឋអាមេរិកនោះឡើយ៕

ដោយ៖ ឈាង