ព័ត៌មានអន្ដរជាតិ

លោក ថាក់ស៊ីន៖ ភឿថៃ បើកទូលាយជានិច្ច ទទួលគណបក្សច្រើនទៀត មកចូលរួមក្រុមចម្រុះ

បានផុស

២ years មុន

នៅ

ថ្ងៃពុធ ២១ សីហា ២០២៤

ដោយ

លោក ថាក់ស៊ីន ស៊ីណាវ៉ាត្រា ឪពុកនាយករដ្ឋមន្ត្រីថ្មីរបស់ប្រទេសថៃ បាននិយាយកាលពីថ្ងៃអង្គារទី២០ខែសីហាថា គណបក្សភឿថៃ នៅតែបើកទូលាយរង់ចាំស្វាគមន៍គណបក្សច្រើនទៀត មកចូលរួមក្នុងក្រុមចម្រុះនេះជានិច្ច រួមទាំងគណបក្សប្រជាធិបតេយ្យផងដែរ។

លោក ថាក់ស៊ីន ស៊ីណាវ៉ាត្រា (រូបថត៖ Bloomberg)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះគណបក្ស Palang Pracharath ដែលកំពុងប្រេះឆាផ្ទៃក្នុងដោយសារបច្ចុប្បន្នគណបក្សនេះ មានការបែងចែកជាពីរពួក,លោក ថាក់ស៊ីន ប្រាប់ថា ពួកគេអាចចូលក្នុងរដ្ឋាភិបាលថ្មីបាន ប៉ុន្តែពួកគេត្រូវផ្សះផ្សាគ្នាសិន ហើយបើចង់មកត្រូវមកទាំងមូល មិនមែនបែងចែកបក្សពួកអ៊ីចឹងទេ។

ស្របពេលជាមួយគ្នានោះ នៅពេលសួរអំពីលទ្ធភាពដែលគណបក្សប្រជាធិបតេយ្យ ត្រូវបានអញ្ជើញឲ្យចូលរួមក្នុងក្រុមចម្រុះនេះដែរ លោកថាក់ស៊ីនអះអាងថា អាចទៅរួច! ព្រោះវាជារឿងធម្មតាទៅហើយ សម្រាប់រដ្ឋាភិបាលនីមួយៗក្នុងការស្វែងរកស្ថិរភាព ដើម្បីឲ្យប្រជាជនកាន់តែមានទំនុកចិត្តលើខ្លួន។

លោក ថាក់ស៊ីន ស៊ីណាវ៉ាត្រា (រូបថត៖ Nation)

ទោះបីជាយ៉ាងណាក៏ដោយ លោកគូសបញ្ជាក់ថា វាគឺអាស្រ័យលើគណបក្សភឿថៃទេ ដែលជាអ្នកសម្រេចចិត្តថាតើអ្នកណាគួរនៅក្នុងគណៈរដ្ឋមន្ត្រី ព្រោះលោកគ្មានសិទ្ធក្នុងរឿងនេះទេ។

សូមជម្រាបថា គណបក្ស Palang Pracharath Party (PPP) របស់លោកឧត្តមសេនីយ៍ Prawit Wongsuwan អតីតឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃថៃ បានរងនូវភាពរង្គោះរង្គើរយ៉ាងខ្លាំង បន្ទាប់ពីអគ្គលេខាធិការគណបក្សប្រកាសលាលែង និងក្រោយពេល២ថ្ងៃប៉ុណ្ណោះដែលលោក Prawit ប្រើហិង្សាលើអ្នកសារព័ត៌មានជាស្ត្រីនៅថ្ងៃបោះឆ្នោតជ្រើសរើសនាយករដ្ឋមន្ត្រីថ្មី។

លោក Prawit Wongsuwan ប្រធានគណបក្ស PPP (រូបថត៖ Snipping)

លោក Thammanat Peompao បានប្រកាសលាលែងពីតួនាទីជាអគ្គលេខាធិការគណបក្ស PPP និងត្រូវបានគេរាយការណ៍ថា ប្រុងទៅចូលរួមជាមួយគណបក្សថ្មី គឺគណបក្ស Kla Tham (Kla Dhamma) ដឹកនាំដោយលោកស្រី Narumon Pinyosinwat ដែលទើបចាកចេញពីគណបក្ស Palang Pracharath នោះដែរ។

ការប្រកាសរបស់លោក Thammanat ធ្វើឡើងបន្ទាប់ពីមានពាក្យចចាមរ៉ាមជុំវិញទំនាស់ជាមួយ ឧត្តមសេនីយ៍ Prawit ជុំវិញការតែងតែងក្នុងគណៈរដ្ឋមន្ត្រីថ្មី។ ក្នុងពេលជាមួយគ្នានេះ មានសេចក្តីរាយការណ៍ថា សមាជិក១៨រូបផ្សេងទៀតនឹងលាឈប់ដូចគ្នាទៅតាមលោក Thammanat ទៅចូលរួមជាមួយគណបក្សថ្មី៕

អត្ថបទ៖ សុខ សុវណ្ណ

ចុចអាន៖ គណបក្សលោក Prawit រង្គោះរង្គើផ្ទៃក្នុងយ៉ាងខ្លាំង