ព័ត៌មានអន្ដរជាតិ

យន្តហោះយោធាចិន លួចចូលដែនអាកាសជប៉ុន ជាលើកដំបូង

បានផុស

២ years មុន

នៅ

ថ្ងៃអង្គារ ២៧ សីហា ២០២៤

ដោយ

Chheang

ជប៉ុន បានចាត់ឲ្យយន្តហោះចម្បាំងរបស់ខ្លួនចេញប្រតិបត្តិការភ្លាមៗ ដើម្បីព្រមានយន្តហោះយោធាចិន១គ្រឿង ដែលបានចូលក្នុងដែនអាកាសជប៉ុនរយៈពេលខ្លីកាលពីថ្ងៃទី២៦ខែសីហា។ នេះគឺជាការឈ្លានពានលើកដំបូងរបស់ចិននៅដែនអាកាសជប៉ុន គិតចាប់តាំងពីឆ្នាំ២០១៧កន្លងទៅ។

យន្តហោះឈ្លបការណ៍ Y-9 របស់ចិន ដែលហោះចូលដែនអាកាសជប៉ុន (រូបភាព៖ ក្រសួងការពារជាតិជប៉ុន)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិជប៉ុន បានប្រកាសថា យន្តហោះឈ្លបការណ៍ Y-9 របស់ចិនបានចូលដែនអាកាសជប៉ុនរយៈពេល២នាទីនៅម៉ោង ១១ និង ២៩នាទីព្រឹកម៉ោងក្នុងស្រុក នៅជិតប្រជុំកោះ Danjo ភាគខាងត្បូងតំបន់ Kyushu។ ចំណែកឯក្រសួងការបរទេសជប៉ុនវិញ បានកោះហៅឯកអគ្គរដ្ឋទូតស្តីទីរបស់ប្រទេសចិន ដើម្បីប្រឆាំងនឹងឧបទ្ទវហេតុនេះ ហើយអំពាវនាវឲ្យមានវិធានការទប់ស្កាត់ការកើតឡើងម្តងទៀត។

ក្រសួងការពារជាតិជប៉ុន បានបង្ហាញថា យន្តហោះចិនបានធ្វើដំណើរជុំវិញតំបន់ក្បែរប្រជុំកោះ Danjo មុនពេលហោះចូលដែនអាកាសជប៉ុន ហើយបន្ទាប់មកបានធ្វើដំណើរត្រឡប់ទៅទឹកដីរបស់ខ្លួនវិញ។ ឧបទ្ទវហេតុនេះ គឺជាការឈ្លានពានដែនអាកាសដោយយន្តហោះយោធាចិនជាលើកដំបូងមិនធ្លាប់មាន ខណៈកាលពីមុនធ្លាប់មានការឈ្លានពាន២ដងដែរ តែធ្វើឡើងដោយយន្តហោះស៊ីវិលរបស់ចិននៅក្នុងឆ្នាំ២០១២ និងយន្តហោះគ្មានមនុស្សបើកនៅឆ្នាំ២០១៧។

ចិន មិនបានធ្វើការអត្ថាធិប្បាយភ្លាមៗអំពីហេតុការណ៍នេះទេ។ ប៉ុន្តែអ្វីដែលគួរកត់សម្គាល់គឺថា កាលពីខែកក្កដា នាវាពិឃាដជប៉ុនបានបើកចូលទៅក្នុងដែនទឹករបស់ចិន បើទោះបីជាត្រូវបាននាវាចិនព្រមានក៏ដោយ។ កាលណោះ រដ្ឋាភិបាលចិនបាននិយាយថា ឧបទ្ទវហេតុនេះគឺជា «ការបង្កហេតុដោយចេតនា» របស់នាវាពិឃាដជប៉ុន ដែលបានលួចប្រមូល និងវិភាគព័ត៌មានពាក់ព័ន្ធនឹងដែនទឹកដែលចិនត្រៀមធ្វើសមយុទ្ធបាញ់គ្រាប់ពិត។

ភាពតានតឹងផ្នែកយោធារវាងជប៉ុន និងចិន តែងតែផ្តោតសំខាន់ទៅលើប្រជុំកោះដែលគ្រប់គ្រងដោយជប៉ុននៅសមុទ្រចិនខាងកើត ដែលប្រជុំកោះទាំងនោះក៏ត្រូវបានចិនទាមទារនិងអះអាងជាអធិបតេយ្យភាពរបស់ខ្លួនផងដែរ។ ចិនតែងតែបញ្ជូននាវាឆ្មាំសមុទ្រទៅល្បាតនៅក្បែរតំបន់នោះ៕

ដោយ៖ ឈាង