ព័ត៌មានអន្ដរជាតិ

ភ្លើងឆេះព្រៃដ៏សាហាវកំពុងបំផ្លាញជីវៈចម្រុះនៅជិតឆ្នេរនៅភាគខាងត្បូងក្រិក

បានផុស

២ years មុន

នៅ

ថ្ងៃចន្ទ ៣០ កញ្ញា ២០២៤

ដោយ

មនុស្ស២នាក់បានស្លាប់នៅក្នុងហេតុការណ៍ភ្លើងឆេះព្រៃដ៏ធំមួយជិតរមណីយដ្ឋានមាត់សមុទ្រមួយនៅភាគខាងត្បូងនៃប្រទេសក្រិក ដែលជាហេតុការណ៍ភ្លើងឆេះព្រៃដ៏អាក្រក់បំផុតមិនធ្លាប់មានក្នុងរយៈពេលពីរទសវត្សរ៍នេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៣០ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមពន្លត់អគ្គីភ័យ បានឲ្យដឹងថា អ្នកពន្លត់អគ្គីភ័យប្រហែល៣៥០នាក់ និងយន្តហោះទម្លាក់ទឹកចំនួន១៨បានគ្រប់គ្រងការឆាបឆេះយ៉ាងសន្ធោសន្ធៅនៅជិត Xylokastro ក្នុងតំបន់ Peloponnese នៅព្រឹកថ្ងៃចន្ទនេះ។ ជាមួយគ្នានេះមនុស្សរាប់សិបនាក់ត្រូវបានបញ្ជាឱ្យជម្លៀសចេញពេញមួយយប់ ជាការប្រុងប្រយ័ត្ន បន្ទាប់ពីភ្លើងបានចាប់ផ្តើមរាលដាលកាលពីថ្ងៃអាទិត្យ។ ទោះបីជាភ្លើង បានឆាបឆេះយ៉ាងសន្ធោសន្ធៅនៅតំបន់នោះក៏ដោយ ប៉ុន្តែផ្នែកខាងមុខធំត្រូវបានពន្លត់អស់ហើយ។

យោងតាមអាជ្ញាធរ បុរសពីរនាក់ដែលបានស្លាប់ជាអ្នកស្រុកដែលបានបាត់ខ្លួនកាលពីល្ងាចថ្ងៃអាទិត្យ។ គ្មានអ្នកណាផ្សេងត្រូវបានគេរាយការណ៍ថា បានបាត់ខ្លួនទេ រួមទាំងមិនមានរបាយការណ៍ភ្លាមៗអំពីផ្ទះដែលត្រូវបានឆេះនៅក្នុងតំបន់រងគ្រោះ ដែលស្ថិតនៅចម្ងាយប្រហែល១៥០គីឡូម៉ែត្រ ភាគនិរតីនៃរដ្ឋធានី Athens ប្រទេសក្រិកផងដែរ។

លើសពីនេះ ក៏មានភ្លើងឆេះព្រៃមួយផ្សេងទៀតនៅជិត ក្រុង Andravida ក៏ត្រូវបានគ្រប់គ្រងបានផងដែរ ប៉ុន្តែអ្នកពន្លត់អគ្គីភ័យនៅតែបន្តប្រកាសអាសន្ននៅក្នុងតំបន់នេះចំពោះការឆាបឆេះ។

ប្រទេសក្រិក ក៏ដូចជាបណ្តាប្រទេសនៅអឺរ៉ុបភាគខាងត្បូងផ្សេងទៀត កំពុងតែញាំញីដោយភ្លើងឆេះព្រៃដែលបំផ្លិចបំផ្លាញរៀងរាល់រដូវក្តៅ និងកើនឡើងដោយសារតែការឡើងកំដៅផែនដីកាន់តែខ្លាំង។

ក្នុងរយៈពេលប៉ុន្មានខែកន្លងមកនេះ អាជ្ញាធរក្រិកបានទប់ទល់នឹងភ្លើងឆេះព្រៃជាង ៤៥០០កន្លែងនៅតំបន់ជនបទដែលរងគ្រោះរាំងស្ងួតអូសបន្លាយ និងរលកកំដៅនៅដើមរដូវក្តៅ ដែលត្រូវបានចាត់ទុកថាជារដូវដែលមានភ្លើងឆេះដ៏គ្រោះថ្នាក់បំផុតក្នុងរយៈពេលពីរទសវត្សរ៍នេះ។

កាលពីខែខែសីហា ភ្លើងឆេះព្រៃដ៏កាចសាហាវមួយបានលេបត្របាក់ភ្នំភាគខាងជើងនៃទីក្រុង Athens ដោយបានបំផ្លាញផ្ទះជាច្រើនខ្នង និងបានសម្លាប់មនុស្សម្នាក់ ខណៈដែលរដូវក្តៅនេះភ្លើងឆេះព្រៃបានដុតបំផ្លាញផ្ទៃដីមានទំហំប្រហែល ២៥ភាគរយជាមធ្យមរាល់ឆ្នាំក្នុងរយៈពេល ២០ឆ្នាំកន្លងមកនេះ៕