​អឺរ៉ុប​​ប្រើ​យន្តការការពារស៊ីវិល​លើក​ដំបូង​ជួយ​បូស្នៀ​ដែល​រងគ្រោះ​ដោយ​ទឹកជំនន់​

ក្រុមជួយសង្គ្រោះមកពីប្រទេសជិតខាងប្រទេសបូស្នៀ និងបណ្តាប្រទេសសហភាពអឺរ៉ុប​បន្ត​​ចូលរួម​ជួយ​ប្រទេសបូស្នៀ​ដើម្បីសម្អាតកម្ទេចថ្ម និងស្វែងរកមនុស្សដែលនៅតែបាត់ខ្លួនបន្ទាប់ពីទឹកជំនន់ និងបំណាក់ដីដ៏ធ្ងន់ធ្ងរដែលបានបំផ្លិចបំផ្លាញ​ផ្នែកខ្លះនៃប្រទេសនេះ។

ប្រទេស​បូស្នៀ​បានស្វែងរកជំនួយពីសហភាពអឺរ៉ុប បន្ទាប់ពីព្យុះភ្លៀងធ្លាក់ដ៏ខ្លាំងពេញមួយយប់កាលពីថ្ងៃសុក្រសប្តាហ៍​មុន​ បានធ្វើឱ្យតំបន់ទាំងមូល​ពោរ​ពេញ​​ដោយ​​ទឹក​​និង​​កម្ទេច​កម្ទី ដោយ​​ការ​​បំផ្លាញផ្លូវថ្នល់ និងស្ពាន និង​បានសម្លាប់មនុស្ស​យ៉ាងហោចណាស់១៨​នាក់ និងរាប់សិបនាក់រងរបួស។

ប្រធាន​គណៈកម្មការសហភាពអឺរ៉ុប លោកស្រី Ursula von der Leyen បាននិយាយនៅលើ​បណ្តាញ​សង្គម​ X. ថា៖​​«ពួកយើងបានធ្វើឱ្យយន្តការការពារស៊ីវិល EU របស់យើងដំណើរការហើយ ហើយកំពុងបញ្ជូនក្រុមសង្គ្រោះទៅអន្តរាគមន៍ ដែលនេះ​ជា​សកម្មភាពសាមគ្គីភាព​របស់​សហភាព​អឺរ៉ុប»។

ក្រុមមន្ត្រី បាននិយាយថា យ៉ាងហោចណាស់មនុស្ស១០នាក់​នៅ​បន្ត​បាត់ខ្លួន ដែលភាគច្រើននៃពួកគេនៅក្នុងភូមិ Donja Jablanica ភាគខាងត្បូងប្រទេសបូស្នៀ ដែលភូមិស្ទើរតែទាំងស្រុងត្រូវបានកប់នៅក្នុងថ្ម និងកម្ទេចថ្មពីកន្លែងយកថ្មពីភ្នំនៅខាងលើ។

អាជ្ញាធរ បាននិយាយថា ក្រុមអ្នកជួយសង្គ្រោះជនជាតិក្រូអាស៊ី​ បានមកដល់ហើយ ខណៈដែលក្រុមមកពីប្រទេសស៊ែប៊ី ត្រូវ​បានគេរំពឹងថានឹងត្រូវបានដាក់ពង្រាយនៅពេលរសៀល បន្ទាប់មកក្រុមស្លូវេនីជាមួយសត្វឆ្កែហិតក្លិនផងដែរ។ សេចក្តីថ្លែងការណ៍របស់រដ្ឋាភិបាលបាននិយាយថា ប្រទេសម៉ុងតេណេហ្គ្រោ ខាងជើង ម៉ាសេដូនៀ ប៉ូឡូញ ឆេក និងតួកគី ក៏បានផ្តល់ជំនួយផងដែរ។

គួរបញ្ជាក់ថាដោយសារតែគ្រោះមហន្តរាយនេះការបោះឆ្នោតក្នុងស្រុកនៅប្រទេសបូស្នៀត្រូវបានពន្យារពេលបោះឆ្នោតនៅក្នុងតំបន់រងគ្រោះដោយទឹកជំនន់ ប៉ុន្តែទឹកជំនន់បានគ្របដណ្តប់ការបោះឆ្នោតនៅទូទាំងប្រទេស។ ប្រទេសនេះមានភាពក្រីក្រ និងការបែកបាក់ជាតិសាសន៍ ខណៈប្រទេសបូស្នៀនេះបានតស៊ូដើម្បីងើបឡើងវិញបន្ទាប់ពីសង្រ្គាមដ៏ឃោរឃៅក្នុងឆ្នាំ ១៩៩២ដល់​១៩៩៥ ។ ប្រទេស​នេះ​កំពុង​ញាំញី​ដោយ​ការ​ឈ្លោះប្រកែក​គ្នា​ខាង​នយោបាយ និង​អំពើ​ពុករលួយផងដែរ៕

អត្ថបទ៖ ប៊ុន សុភាព