ហាម៉ាស ប្រកាសឈប់បង្ហាញឈ្មោះ អ្នកដែលនឹងត្រូវឡើងកាន់តំណែងជាមេក្រុម

ក្រោយមន្ត្រីជាន់ខ្ពស់របស់ខ្លួនត្រូវអ៊ីស្រាអែល សម្លាប់ជាបន្តបន្ទាប់ ពេលនេះក្រុមហាម៉ាស ប្រកាសថា ខ្លួនលែងបង្ហាញអត្តសញ្ញាណអ្នកដែលនឹងត្រូវឡើងកាន់តំណែងជាមេក្រុមរបស់ខ្លួនទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសនេះកើតឡើងត្រឹមមួយថ្ងៃប៉ុណ្ណោះ បន្ទាប់ពីអ៊ីស្រាអែល បញ្ជាក់ពីការសម្លាប់ បេក្ខភាពមេក្រុមហេសបូឡា ដែលជាសម្ព័ន្ធមិត្តហាម៉ាស គឺលោក Hashem Safieddine នៅតំបន់ Dahieh ជាយក្រុងបេរូត នៃប្រទេសលីបង់។

តាមការចុះផ្សាយរបស់ RT កាលពីថ្ងៃពុធទី២៣ខែតុលាឆ្នាំ២០២៤, ក្រុមហាម៉ាស បញ្ជាក់យ៉ាងច្បាស់ ការសម្រេចចិត្តលាក់ការណ៍សម្ងាត់បែបនេះ គឺដោយសារតែហេតុផលសន្តិសុខ។

ចលនាប្រដាប់អាវុធមានមូលដ្ឋាននៅប៉ាឡេស្ទីនមួយនេះ មិនទាន់រកបានអ្នកជំនួសតំណែងមេក្រុមឡើយ ចាប់តាំងពីលោក Yahya Sinwar ត្រូវអ៊ីស្រាអែល យកជីវិតក្នុងការវាយប្រហារនៅទីក្រុង Rafah កាលពីសប្តាហ៍មុន។

គិតត្រឹមចុងខែតុលានេះ មានបុគ្គលជាន់ខ្ពស់ជាច្រើនរូបរបស់ក្រុមហាម៉ាស ដែលត្រូវស្លាប់ក្រោមដៃអ៊ីស្រាអែល ដោយក្នុងនោះមានដូចជា Yahya Sinwar, Saleh al-Arouri, Marwan Issa, Ayman Nofal, Jawad Abu Shamala, Zaher Jabarin និង Ismail Haniyeh។

ទោះបែបនេះក្តី ក្រុមហាម៉ាស នៅតែអះអាងថា ខ្លួននឹងបន្តធ្វើសង្គ្រាមជាមួយអ៊ីស្រាអែល ហើយមិនដោះលែងចំណាប់ខ្មាំងនៅសល់ប្រហែល១០០នាក់ដាច់ខាត ដរាបណាអ៊ីស្រាអែលមិនដកទ័ពចេញពីតំបន់ហ្គាហ្សា និងមិនដោះលែងអ្នកទោសប៉ាឡេស្ទីនជាច្រើននាក់នៅក្នុងគុករបស់ខ្លួនទេនោះ។

យ៉ាងណា នាយករដ្ឋមន្ត្រីអ៊ីស្រាអែល Benjamin Netanyahu បានប្រាប់មហាសន្និបាតអង្គការសហប្រជាជាតិកាលពីខែមុនថា ប្រសិនបើក្រុមហាម៉ាសមិនចុះចាញ់ទេ កងទ័ពរបស់លោកក៏មិនព្រមឈប់ដែរ ហើយនឹងបន្តប្រយុទ្ធរហូតដល់ទទួលបានជ័យជម្នះទាំងស្រុង៕

អត្ថបទ៖ សុខ សុវណ្ណ

ចុចអាន៖ តើមេដឹកនាំ​ហាម៉ាស់​សំខាន់​ប៉ុនា្មន​​នាក់​ត្រូវអ៊ីស្រាអែល​សម្លាប់​ដល់​ពេលនេះ​?