លោក Zelensky មិន​ឲ្យ​ប្រមុខ UN ធ្វើ​ទស្សនកិច្ច​នៅ​អ៊ុយក្រែន ព្រោះ​អន់ចិត្ត​រឿង​នៅ BRICS

លោក Volodymyr Zelensky បានច្រានចោល​សំណើ​ដំណើរទស្សនកិច្ចទៅកាន់ប្រទេសអ៊ុយក្រែនរបស់លោក Antonio Guterres ក្រោយ​អគ្គលេខាធិការអង្គការសហប្រជាជាតិ​រូប​នេះ បាន​ទៅ​ចូលរួម​នៅ​ក្នុង​កិច្ច​ប្រជុំ BRICS នៅ​ឯ​​ទីក្រុង Kazan ប្រទេស​រុស្ស៊ី។ នេះ​បើ​យោង​តាម​ការ​ចុះ​ផ្សាយ​របស់​សារព័ត៌មាន BBC នៅ​ថ្ងៃ​ទី​២៦​ខែ​តុលា​ឆ្នាំ​២០២៤។

ប្រភព​ពី​ការិយាល័យ​ប្រធានាធិបតី​អ៊ុយក្រែន បានប្រាប់ BBC ថា៖ «លោកប្រធានាធិបតីមិនបានបញ្ជាក់ពីដំណើរទស្សនកិច្ចរបស់គាត់ទេ។ បន្ទាប់ពី​ទៅ Kazan និងបន្ទាប់ពីគាត់បានចាប់ដៃជាមួយអ្នកញុះញង់សង្រ្គាម ហើយបាន​ប្រារព្ធ​​ថ្ងៃ “UN Day” នៅលើទឹកដីនៃប្រទេសឈ្លានពាន វាពិតជាចម្លែកក្នុងការទទួលគាត់​ឲ្យ​មក​ទីនេះ»។

ដំណើរ​ទស្សនកិច្ច​របស់​លោក Guterres ទៅ​កាន់​ប្រទេស​រុស្ស៊ី បាន​ធ្វើ​ឲ្យ​អ៊ុយក្រែន​មាន​ការ​សង្រាក​ចិត្ត​ជា​ខ្លាំង។

ក្នុងអំឡុងពេលទស្សនកិច្ចនៅ​រុស្ស៊ី លោក Guterres បានអំពាវនាវឲ្យ​មាន «សន្តិភាពដ៏​ត្រឹមត្រូវ» មួយ​នៅក្នុងប្រទេសអ៊ុយក្រែន និងបានបញ្ជាក់ឡើងវិញនូវគោលជំហររបស់​លោក​ចំពោះលោក ពូទីន ថា​ការឈ្លានពានរបស់រុស្ស៊ី​លើ​អ៊ុយក្រែន គឺជា «ការរំលោភលើធម្មនុញ្ញអង្គការសហប្រជាជាតិ និងច្បាប់អន្តរជាតិ»។

នៅក្នុងសេចក្តីថ្លែងការណ៍មួយមុនពេលដំណើរទស្សនកិច្ចរបស់លោក Guterres ទៅកាន់ទីក្រុង Kazan ក្រសួងការបរទេសអ៊ុយក្រែនបានប្រកាស​ថា៖ «នេះគឺជាជម្រើសខុសដែលមិនជំរុញបុព្វហេតុសន្តិភាព។ វាគ្រាន់តែធ្វើឲ្យខូចកេរ្តិ៍ឈ្មោះរបស់អង្គការសហប្រជាជាតិប៉ុណ្ណោះ»។

សេចក្តីថ្លែងការណ៍បានបន្ថែមថា៖ «អគ្គលេខាធិការអង្គការសហប្រជាជាតិ បានបដិសេធការអញ្ជើញរបស់អ៊ុយក្រែនឲ្យចូលរួមក្នុងកិច្ចប្រជុំកំពូលសន្តិភាពសកលលើកដំបូងនៅក្នុងប្រទេសស្វីស។ ប៉ុន្តែគាត់បានទទួលយកការអញ្ជើញទៅទីក្រុង Kazan ពីឧក្រិដ្ឋជនសង្គ្រាមលោក ពូទីន ទៅ​វិញ»៕

ដោយ៖ ឈាង