ព័ត៌មានអន្ដរជាតិ

កូរ៉េខាងជើង នៅមិនទាន់បញ្ចេញប្រតិកម្មអ្វីទាំងអស់ ក្រោយពេលលោក ត្រាំ ឈ្នះឆ្នោត

បានផុស

១ year មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

Chheang

សារព័ត៌មានរដ្ឋកូរ៉េខាងជើង នៅថ្ងៃព្រហស្បតិ៍នេះនៅតែស្ងៀមស្ងាត់មិនទាន់បញ្ចេញប្រតិកម្មអ្វីសោះឡើយ ចំពោះលោក ដូណាល់ ត្រាំ (Donald Trump) ដែលទើបជាប់ឆ្នោតធ្វើជាប្រធានាធាធិបតីអាមេរិកទី៤៧ ក្រោយថ្ងៃបោះឆ្នោតសកល៥វិច្ឆិកា។

លោក គីម ជុងអ៊ុន មេដឹកនាំកូរ៉េខាងជើង និងលោក ដូណាល់ ត្រាំ (រូបភាព៖ AP)

សារព័ត៌មានធំបំផុតរបស់ក្រុងព្យុងយ៉ាង ដូចជា KCNA, Rodong Sinmun និង Korean Central Television ពុំបានធ្វើសេចក្ដីរាយការណ៍ទាល់តែសោះអំពីជោគជ័យរបស់លោក ត្រាំ គិតត្រឹមម៉ោង៧ព្រឹកថ្ងៃទី៧ខែវិច្ឆិកា។

កាលពីពេលមុនៗ កូរ៉េខាងជើង បានផ្សាយទាក់ទងនឹងលទ្ធផលបោះឆ្នោតនៅអាមេរិកដោយប្រយោលតែប៉ុណ្ណោះ ហើយការផ្សព្វផ្សាយនេះទៀតសោតមិនមែនធ្វើឡើងភ្លាមៗនោះដែរ។ ក្នុងអំឡុងពេលលោក Barack Obama ឈ្នះឆ្នោតចំនួន២អាណត្តិមុន កាសែត Rodong Sinmun បានចុះផ្សាយដំណឹងនេះរយៈពេល៤ថ្ងៃបន្ទាប់ពីការប្រកាសជាផ្លូវការនៅអាមេរិក។

ចំណែកឯពេល លោក ត្រាំ ឈ្នះឆ្នោតដំបូងនៅក្នុងឆ្នាំ២០១៦ កូរ៉េខាងជើងបានចុះផ្សាយលទ្ធផលរយៈពេល ១១ថ្ងៃ ក្រោយថ្ងៃបោះឆ្នោត ដោយកាសែត Rodong Sinmun ហើយកាលណោះបានរិះគន់អំពីលិខិតអបអរសាទររបស់អតីតប្រធានាធិបតីកូរ៉េខាងត្បូង លោក Park Geun-Hye ដែលបានផ្ញើទៅលោក ត្រាំ។

នៅពេលលោក ចូ បៃដិន (Joe Biden) បានឈ្នះការបោះឆ្នោតធ្វើជាប្រធានាធិបតីកាលពីឆ្នាំ២០២០ កូរ៉េខាងជើងក៏បាននៅស្ងៀមមិនអើពើរហូតដល់ទៅ២ខែឯណោះ ទើបបញ្ចេញប្រតិកម្មដោយប្រយោលតាមការឃោសនាប្រឆាំងចំថ្ងៃឡើងកាន់តំណែងផ្លូវការរបស់លោក បៃដិន។

ក្រុមអ្នកវិភាគ បានប៉ាន់ស្មានថា កូរ៉េខាងជើងអាចនឹងផ្ញើសំបុត្រអបអរក្រៅផ្លូវការទៅកាន់លោក ដូណាល់ ត្រាំ ដូចដែលមេដឹកនាំទាំងពីរធ្លាប់បានធ្វើកាលពីមុន។ យ៉ាងណាមិញ កូរ៉េខាងជើង ទំនងជាមិនចង់ធ្វើឲ្យសាធារណជនមានការរំពឹងថា ទំនាក់ទំនងរវាងក្រុងព្យុងយ៉ាង និងអាមេរិកនឹងអាចប្រសើរឡើងនោះឡើយ។

លោក ត្រាំ កាលពីខែកក្កដាធ្លាប់បានលើកឡើងអំពីចំណងមិត្តភាពល្អរបស់លោកជាមួយនឹងមេដឹកនាំកូរ៉េខាងជើង។ ប៉ុន្តែទីភ្នាក់ងារព័ត៌មាន KCNA បានរាយការណ៍ថា កូរ៉េខាងជើងមិនខ្វល់ថានរណាឈ្នះឡើយ ដោយរៀបរាប់ថា៖ «ទោះបីជារដ្ឋបាលណាមួយចូលកាន់តំណែងនៅអាមេរិកក៏ដោយ ក៏បរិយាកាសនយោបាយមិនផ្លាស់ប្តូរដែរ»។

លោក ត្រាំ និងមេដឹកនាំកូរ៉េខាងជើង ធ្លាប់បានជួបពិភាក្សាគ្នាក្នុងកិច្ចប្រជុំកំពូលនៅប្រទេសសិង្ហបុរីក្នុងឆ្នាំ២០១៨ និងប្រទេសវៀតណាមក្នុងឆ្នាំ២០១៩។ កិច្ចប្រជុំកំពូលនៅទីក្រុងហាណូយ បានបញ្ចប់ដោយគ្មានការចុះកិច្ចព្រមព្រៀងណាមួយទេ ព្រោះតែការបរាជ័យក្នុងចំណុចសំខាន់ៗពាក់ព័ន្ធនឹងវិសាលភាពនៃការរំសាយកម្មវិធីនុយក្លេអ៊ែរ និងការបន្ធូរបន្ថយទណ្ឌកម្មលើកូរ៉េខាងជើង៕

ដោយ៖ ឈាង