កូរ៉េ​ខាង​ជើង ថ្កោលទោស​​សមយុទ្ធ​អាមេរិក ដែល​ធ្វើឡើង​រួម​គ្នា​ជាមួយ​កូរ៉េ​ខាង​ត្បូង និង​ជប៉ុន

កូរ៉េខាងជើង នៅ​ថ្ងៃ​សៅរ៍​នេះ​បានថ្កោលទោស​ការធ្វើសមយុទ្ធយោធារួមគ្នានាពេលថ្មីៗ ដោយសហរដ្ឋអាមេរិក កូរ៉េខាងត្បូង និងជប៉ុន ហើយ​​ព្រមានថា​នឹងចាត់វិធានការភ្លាមៗ ប្រសិនបើចាំបាច់ដើម្បីការពារខ្លួន។

ក្រសួងការពារជាតិកូរ៉េខាងជើង បានប្រកាស​ថា៖ «យើងព្រមានខ្លាំងៗដល់សហរដ្ឋអាមេរិក និងបក្ខពួករបស់ខ្លួនដែលមានអរិភាពចំពោះកូរ៉េខាងជើង ឲ្យបញ្ឈប់ជាបន្ទាន់នូវសកម្មភាពអរិភាពដែលបណ្ដាល​ឲ្យមានការបង្កហេតុ និងអស្ថិរភាពដែលអាចជំរុញឲ្យមានការប្រឈមមុខដាក់គ្នាខាងយោធានៅឧបទ្វីបកូរ៉េ និងតំបន់ជុំវិញឲ្យ​ទៅជាជម្លោះប្រដាប់អាវុធពិតប្រាកដ»។

ក្រសួង​​ការពារ​ជាតិ​កូរ៉េ​ខាង​ជើង​ បាន​បន្ថែម​ថា យោធានឹងរក្សាជម្រើសទាំងអស់ដែលមាន ហើយចាត់វិធានការជាបន្ទាន់ ប្រសិនបើចាំបាច់ ដើម្បីគ្រប់គ្រងហានិភ័យជាមុន ខណៈពេលដែលកំពុងឃ្លាំមើល​យ៉ាង​ដិត​ដល់​ចំពោះ​សកម្មភាពយោធា​របស់​សហរដ្ឋអាមេរិក និងសម្ព័ន្ធមិត្ត។

សូម​បញ្ជាក់​​ថា ការ​ថ្កោលទោស​របស់​កូរ៉េ​ខាង​ជើង​ ធ្វើ​ឡើង​​បន្ទាប់​ពី​​​ប្រទេសទាំងបី កាលពីសប្តាហ៍មុនបានធ្វើសមយុទ្ធរួមគ្នារយៈពេលបីថ្ងៃ ដែលមានឈ្មោះថា «Freedom Edge»។ សមយុទ្ធ​នេះ មាន​ការ​​ចូលរួម​ពី​យន្តហោះចម្បាំង និងយន្តហោះល្បាតសមុទ្រ ព្រមទាំងនាវាផ្ទុកយន្តហោះដើរដោយថាមពលនុយក្លេអ៊ែររបស់សហរដ្ឋអាមេរិក USS George Washington៕

​ដោយ៖ ឈាង