ព័ត៌មានអន្ដរជាតិ

ហាម៉ាស គំរាមសម្លាប់ចំណាប់ខ្មាំង បើអ៊ីស្រាអែល ហ៊ានបើកប្រតិបត្តិការជួយសង្គ្រោះ

បានផុស

១ ខែ មុន

នៅ

ថ្ងៃព្រហស្បតិ៍ ៥ ធ្នូ ២០២៤

ដោយ

Chheang

ក្រុមហាម៉ាស បាននិយាយថា ខ្លួនទទួលដំណឹងថា អ៊ីស្រាអែលមានបំណងធ្វើប្រតិបត្តិការជួយសង្គ្រោះចំណាប់ខ្មាំង ដែលស្រដៀងនឹងប្រតិបត្តិការធ្វើឡើងនៅក្នុងជុំរុំ Nuseirat នៃតំបន់ហ្គាហ្សា កាលពីខែមិថុនា។ ក្រុមសកម្មប្រយុទ្ធនេះ បានគំរាមថានឹងសម្លាប់ឈ្លើយសឹក បើប្រតិបត្តិការបែបនេះកើតឡើងម្ដងទៀត។

ក្រុមគ្រួសារចំណាប់ខ្មាំងដែលត្រូវបានចាប់ខ្លួនទៅតំបន់ហ្គាហ្សាកំពុងទាមទារឲ្យបញ្ចប់សង្គ្រាម (រូបភាព៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយកាលពីថ្ងៃទី៤ខែធ្នូឆ្នាំ២០២៤របស់ទីភ្នាក់ងារព័ត៌មាន Reuters ក្រុមហាម៉ាស បានប្រាប់ប្រតិបត្តិកររបស់ខ្លួនមិនចាំបាច់គិតពីផលប៉ះពាល់ណាមួយឡើយ ហើយត្រូវធ្វើតាមការណែនាំ ដោយបន្ថែមថា អ៊ីស្រាអែលជាអ្នកក្ដោបក្ដាប់ជោគវាសនានៃឈ្លើយសឹក។ យ៉ាងណាមិញ ហាម៉ាស មិនបានបញ្ជាក់ថាប្រតិបត្តិការអ៊ីស្រាអែលនឹងកើតឡើងនៅពេលណានោះទេ។

ការប្រកាសនេះ ធ្វើឡើងស្របពេលដែលរដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយកាលពីថ្ងៃពុធថា សម្ពាធលើក្រុមហាម៉ាសកំពុងកើនឡើង ហើយនៅពេលនេះ «យើងនឹងពិតជាអាចឈានទៅរកកិច្ចព្រមព្រៀងដោះលែងចំណាប់ខ្មាំង»។

គួររំឭកថា ក្រុមហាម៉ាស កាលពីថ្ងៃទី៩ឬទី១០ខែតុលាឆ្នាំ២០២៣ ធ្លាប់បានប្រកាសដោះលែងចំណាប់ខ្មាំងជាជនស៊ីវិលទាំងអស់ ជាថ្នូរនឹងការដែលកងកម្លាំងអ៊ីស្រាអែលមិនវាយចូលទៅក្នុងតំបន់ហ្គាហ្សាស្ទ្រីប ប៉ុន្តែត្រូវភាគីអ៊ីស្រាអែលបដិសេធ និងចាប់ផ្តើមយុទ្ធនាការវាយសងសឹករបស់ខ្លួន ដែលបណ្ដាលឲ្យជនជាតិប៉ាឡេស្ទីនជាង៤៤ ៥០០នាក់ត្រូវបានសម្លាប់ ជាង១១ ០០០នាក់កំពុងបាត់ខ្លួន និង ១០៥ ០០០នាក់រងរបួស។

អំឡុងប្រតិបត្តិការរបស់អ៊ីស្រាអែលនៅថ្ងៃទី៩ខែមិថុនាឆ្នាំ២០២៤ ចំណាប់ខ្មាំងចំនួន ៤នាក់ ត្រូវបានជួយសង្គ្រោះ។ មន្ត្រីប៉ាឡេស្ទីន បានឲ្យដឹងថា ប្រតិបត្តិការនេះ បានសម្លាប់មនុស្សជាង ២០០នាក់ ដែលជាការលុកលុយដ៏សាហាវបំផុតនៅក្នុងសង្គ្រាមគិតចាប់តាំងពីថ្ងៃទី៧ខែតុលាឆ្នាំ២០២៣៕

ដោយ៖ ឈាង