១១ខែ វៀតណាម រញ្ជួយដី ៤៥៨លើក

ជាតួលេខមិននឹកស្មានដល់មួយ ដែលវិទ្យាស្ថានភូគព្ភសាស្ត្រវៀតណាម បានចេញរបាយការណ៍នៅថ្ងៃអង្គារទី១០ខែធ្នូថា ក្នុងរយៈពេល១១ខែនៃឆ្នាំនេះ ប្រទេសវៀតណាម បានកើតមានរញ្ជួយដីចំនួន៤៥៨លើក ប៉ុន្តែភាគច្រើនគឺមានកម្រិតស្រាល ពោលគឺចន្លោះពី២.៥ទៅ៥.០រ៉ិចទ័រ ប៉ុណ្ណោះ។ នេះបើតាមការចុះផ្សាយរបស់ Vietnam Net។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមវិទ្យាស្ថានខាងលើ ចាប់ពីដើមឆ្នាំ២០២៤មក មានការរញ្ជួយដីរាប់រយលើក ខណៈខែវិច្ឆិកាកើតឡើងញឹកញាប់ជាងគេ។ ក្នុងនោះដែរ ស្រុក Kon Plong នៃខេត្ត Kon Tum ជាកន្លែងរញ្ជួយដីវាយប្រហារញឹកញាប់បំផុត ពោលគឺគ្រាន់តែស្រុកនោះម្នាក់ឯង មានរញ្ជួយដីដល់ទៅ៤៣០លើកទៅហើយ។

ត្បិតតែរញ្ជួយដីនៅវៀតណាមភាគច្រើនមានកម្រិតស្រាលក៏ពិតមែន ប៉ុន្តែក្រុមអ្នកជំនាញបានបង្ហាញក្តីបារម្ភផងដែរចំពោះគ្រោះធម្មជាតិនាពេលអនាគត ហើយបានអំពាវនាវឲ្យប្រជាជនពលរដ្ឋទាំងអស់ត្រូវប្រយ័ត្ននិងប្រុងខ្លួនជានិច្ច។

ចាប់ពីឆ្នាំ១៩០៣ដល់ឆ្នាំ២០២០ មានការរញ្ជួយដីត្រឹមជាង៣០លើកប៉ុណ្ណោះ ត្រូវបានកត់ត្រានៅក្នុងខេត្ត Kon Tum ជាមួយកម្លាំងខ្លាំងបំផុត ៣.៩រ៉ិចទ័រ ប៉ុន្តែចាប់តាំងពីខែមេសាឆ្នាំ២០២១មក ការរញ្ជួយដីរាប់រយលើក បានកើតឡើងនៅក្នុងខេត្តនេះ៕

អត្ថបទ៖ សុខ សុវណ្ណ

ចុចអាន៖ ខេត្តវៀតណាម ជាប់ព្រំដែនកម្ពុជា រញ្ជួយដីផ្ទួនៗ ៧ លើកទៀត