ព័ត៌មានអន្ដរជាតិ

សេតវិមាន៖ ទាហានកូរ៉េខាងជើង កំពុងស្លាប់ និងរបួសច្រើនណាស់ លើសមរភូមិ

បានផុស

៣ ខែ មុន

នៅ

ថ្ងៃសៅរ៍ ២៨ ធ្នូ ២០២៤

ដោយ

Chheang

អ្នកនាំពាក្យសេតវិមាន លោក John Kirby បានប្រាប់អ្នកយកព័ត៌មានកាលពីថ្ងៃសុក្រទី២៧ធ្នូថា កងកម្លាំងកូរ៉េខាងជើងចំនួន ១ ០០០នាក់បានស្លាប់ និងរបួសយ៉ាងច្រើននៅជួរមុខនៃសង្គ្រាមរបស់រុស្ស៊ីប្រឆាំងនឹងអ៊ុយក្រែន កាលពីសប្ដាហ៍មុននៅក្នុងតំបន់ Kursk។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍តួលេខលើកនេះ គឺលើសពីតួលេខដែលមន្ត្រីអាមេរិកបានផ្តល់ឲ្យនាពេលកន្លងមក។ លោក Kirby បាននិយាយថា៖ «វាច្បាស់ណាស់ថា មេដឹកនាំយោធារុស្ស៊ី និងកូរ៉េខាងជើងកំពុងចាត់ទុកកងទ័ពទាំងនេះថាអាចលះបង់បាន និងបញ្ជាឲ្យពួកគេលើការវាយប្រហារដោយគ្មានសង្ឃឹម ប្រឆាំងនឹងការការពាររបស់អ៊ុយក្រែន»។

បេសកជនកូរ៉េខាងជើងប្រចាំអង្គការសហប្រជាជាតិនៅទីក្រុងញូវយ៉ក មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ហើយបេសកជនអង្គការសហប្រជាជាតិរបស់រុស្ស៊ី បានបដិសេធមិនធ្វើអត្ថាធិប្បាយឡើយ។

ប្រធានាធិបតីអ៊ុយក្រែន លោក Volodymyr Zelensky បានលើកឡើងថា កងកម្លាំងកូរ៉េខាងជើងបានបាត់បង់ចំនួនយ៉ាងច្រើន ហើយកំពុងត្រូវបានបញ្ជូនទៅសមរភូមិដោយមានការការពារតិចតួចពីកងកម្លាំងរុស្ស៊ី។

លោកបានបន្ថែមថា៖ «យើងឃើញថា ទាំងយោធារុស្ស៊ី ឬអ្នកត្រួតពិនិត្យកូរ៉េខាងជើងរបស់ពួកគេ មិនអើពើក្នុងការធានាការរស់រានមានជីវិតរបស់ជនជាតិកូរ៉េខាងជើងទាំងនេះទេ»។

លោក Zelensky បានបន្តថា កងកម្លាំងអ៊ុយក្រែនបានចាប់ខ្លួនអ្នកទោសដែលជាទាហានកូរ៉េខាងជើងបានពីរបីនាក់ «ប៉ុន្តែពួកគេបានរងរបួសយ៉ាងធ្ងន់ធ្ងរ ដែលមិនអាចជួយជីវិតពួកគេបានទេ»។

លោកបានបញ្ជាក់ទៀតថា ប្រជាជនកូរ៉េមិនគួរបាត់បង់ជីវិតក្នុងសង្រ្គាមនៅអឺរ៉ុបទេ ហើយបើប្រទេសចិនមានចិត្តស្មោះ មិនចង់ឲ្យសង្រ្គាមរីកធំ «ខ្លួនត្រូវតែដាក់សម្ពាធសមស្របលើទីក្រុងព្យុងយ៉ាង»។

សូមបញ្ជាក់ថា កាលពីថ្ងៃចន្ទ លោក Zelensky បាននិយាយថា ទាហានកូរ៉េខាងជើងជាង ៣ ០០០នាក់ត្រូវបានសម្លាប់ និងរងរបួសនៅក្នុងតំបន់ Kursk ដោយបន្ថែមថា នេះជាទិន្នន័យបឋមដែលលោកកំពុងស្រង់៕

ដោយ៖ ឈាង