ជា​ប្រវត្តិសាស្ត្រ​អាមេរិក! ប្រធានាធិបតី​មួយ​រូប​ធ្លាប់​ស្បថ​ចូល​កាន់​តំណែង​នៅ​លើ​យន្តហោះ

នៅក្នុងពេលវេលាជា​ប្រវត្តិសាស្ត្រមួយ​របស់​សហរដ្ឋ​អាមេរិក លោក Lyndon B. Johnson បានស្បថចូលកាន់តំណែងជាប្រធានាធិបតីទី៣៦ នៅលើយន្តហោះ Air Force One។ ពិធីស្បថចូលកាន់តំណែង បានធ្វើឡើងនៅពេល​យន្តហោះ​កំពុង​​ហោះហើរ​លើផ្ទៃមេឃនៃរដ្ឋតិចសាស់ ត្រឹមតែប៉ុន្មានម៉ោងបន្ទាប់ពីការធ្វើឃាតប្រធានាធិបតី លោក John F. Kennedy ក្នុងទីក្រុង Dallas កាល​ពី​ថ្ងៃ​ទី​២២​ខែ​វិច្ឆិកា​ឆ្នាំ​១៩៦៣។

ក្រោយ​ពី​ដំណឹងដ៏គួរឲ្យភ្ញាក់ផ្អើលនៃការស្លាប់របស់ប្រធានាធិបតី Kennedy លោក Johnson ដែលធ្លាប់ជាអនុប្រធានាធិបតី ត្រូវបាន​គេ​នាំយក​​ទៅ​លើយន្តហោះ Air Force One យ៉ាងរហ័ស ដើម្បីកាន់តំណែងជាអ្នកដឹកនាំ​ថ្មី។ យន្តហោះដឹកប្រធានាធិបតីថ្មី និងមន្ត្រីរដ្ឋាភិបាលសំខាន់ៗជាច្រើននាក់ កាល​ណោះ​បានធ្វើដំណើរពីទីក្រុង Dallas ទៅកាន់រដ្ឋធានី Washington DC។ ពិធី​ស្បថ​របស់​លោក Johnson ត្រូវ​បាន​រៀបចំ​​ឡើង​ដោយចៅក្រមសហព័ន្ធ លោកស្រី Sarah T. Hughes ហើយ​​នេះ​ក៏​ជា​លើក​ដំបូង និង​មិន​ធ្លាប់​មាន​ផង​ដែរ​ដែល​​ស្ត្រី​ភេទ​​អាច​ក្លាយ​ជា​​អ្នក​កាន់​កិច្ចការ​​​គ្រប់គ្រង​​ពិធី​ឡើង​កាន់​តំណែង​ប្រធានាធិបតី​អាមេរិក​យ៉ាង​ដូច្នេះ។

លោក Johnson បាន​ធ្វើ​​ជាប្រធានាធិបតី​រហូត​ដល់​ឆ្នាំ​១៩៦៩។ អ្វីដែល​គួរ​​ឲ្យ​ចាប់​អារម្មណ៍​នៅ​ក្នុង​អាណត្តិ​របស់​លោក គឺ​គោលនយោបាយ​ «សង្គមដ៏អស្ចារ្យ (Great Society)» ដែល​មាន​គោលបំណងលុបបំបាត់ភាពក្រីក្រ និងភាព​អយុត្តិធម៌ពូជសាសន៍។ បន្ថែម​ពី​នេះ រដ្ឋបាលរបស់​លោក បានអនុម័តច្បាប់សំខាន់ៗ រួម​ទាំង​ច្បាប់សិទ្ធិស៊ីវិលឆ្នាំ​១៩៦៤ ច្បាប់សិទ្ធិបោះឆ្នោតឆ្នាំ​១៩៦៥ និងការបង្កើត​សេវា​សុខាភិបាល Medicare&Medicaid។

លោក Johnson មិនបាន​ឈរ​ឈ្មោះ​​បោះឆ្នោតឡើងវិញ​​នៅឆ្នាំ​១៩៦៨​នោះ​ទេ ដោយសារតែមាន​សម្ពាធ​នយោបាយ និង​ការប្រឆាំងកាន់តែខ្លាំងឡើង​ពាក់ព័ន្ធ​នឹង​​បញ្ហា​សង្រ្គាម​វៀតណាម។ បន្ទាប់ពីចាកចេញពីតំណែង លោក​បានចូលនិវត្តន៍​ទៅ​នៅ​កសិដ្ឋាន​មួយ​កន្លែង​នៅរដ្ឋតិចសាស់ ជាកន្លែងដែលលោក​នៅតែសកម្មក្នុងកិច្ចការនយោបាយរហូតដល់​​ចុង​បញ្ចប់​នៃ​ជីវិត​របស់​លោក​នៅឆ្នាំ​១៩៧៣៕

ដោយ៖ ឈាង