ព័ត៌មានអន្ដរជាតិ

ឥណ្ឌាស្វះស្វែងរកប្រាក់២ពាន់លានដុល្លារ ធ្វើការឆ្ពោះទៅពង្រីកថាមពលនុយក្លេអ៊ែរ

បានផុស

២ ខែ មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

ប្រទេសឥណ្ឌាសម្លឹងទៅរកការបង្កើនថាមពលនុយក្លេអ៊ែឲ្យកាន់តែខ្ពស់បន្ថែមទៀត ដោយបានអំពាវនាវរកប្រាក់ ២ពាន់លានដុល្លារសម្រាប់ការស្រាវជ្រាវ ដើម្បីជំរុញការវិនិយោគ ខណៈប្រទេសនេះចង់ដំឡើងថាមពលនុយក្លេអែរឲ្យបាន ១០០ជីហ្គាវ៉ាត់នៅឆ្នាំ ២០៤៧។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៣ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវនេះត្រូវបានធ្វើឡើងដោយរដ្ឋមន្ត្រីហិរញ្ញវត្ថុរបស់ប្រទេសឥណ្ឌាកាលពីដើមខែនេះ ដែលជាផ្នែកមួយនៃផែនការពង្រីកការផលិតអគ្គិសនី និងកាត់បន្ថយការបំភាយឧស្ម័ន ខណៈថាមពលនុយក្លេអែរ គឺជាមធ្យោបាយមួយសម្រាប់ការដោះស្រាយកង្វះខាតថាមពល និងការផលិតអគ្គិសនីដែលមិនបញ្ចេញឧស្ម័នកំដៅផែនដី ទោះបីជាវាបង្កើតកាកសំណល់វិទ្យុសកម្មក៏ដោយ។

ប្រទេសឥណ្ឌាគឺជាប្រទេសមួយក្នុងចំណោមប្រទេសដែលបញ្ចេញឧស្ម័នកំដៅភពផែនដីដ៏ធំបំផុតរបស់ពិភពលោក ហើយជាង៧៥% នៃថាមពលរបស់វានៅតែត្រូវបានបង្កើតឡើងដោយការដុតឥន្ធនៈហ្វូស៊ីល ដែលភាគច្រើនជាធ្យូងថ្ម។ ឥណ្ឌាចង់ដំឡើងថាមពលនុយក្លេអ៊ែរ១០០ជីហ្គាវ៉ាត់នៅឆ្នាំ២០៤៧ ដែលគ្រប់គ្រាន់ដើម្បីផ្តល់ថាមពលដល់ផ្ទះប្រជាជនឥណ្ឌាជិត៦០លានខ្នងក្នុងមួយឆ្នាំ។

អ្នកជំនាញថាមពលបាននិយាយថា ដើម្បីឲ្យពិភពលោកផ្លាស់ប្តូរឆ្ងាយពីឥន្ធនៈដែលបំភាយកាបូនដូចជា ធ្យូងថ្ម ប្រេង និងឧស្ម័ន ប្រភពដូចជាថាមពលនុយក្លេអ៊ែរគឺចំាបាច់ ដែលមិនពឹងផ្អែកលើព្រះអាទិត្យ និងខ្យល់។ ប៉ុន្តែអ្នកខ្លះមានការសង្ស័យអំពីមហិច្ឆតារបស់ឥណ្ឌាលើវិស័យនុយក្លេអ៊ែរនេះ ហើយការយល់ឃើញជាសាធារណៈអវិជ្ជមានអំពីឧស្សាហកម្មនេះនៅតែមាន។

ពាក់ព័ន្ធបញ្ហានេះ លោក Shayak Sengupta សហការីស្រាវជ្រាវជាន់ខ្ពស់នៅមជ្ឈមណ្ឌលគោលនយោបាយថាមពលសកលរបស់សាកលវិទ្យាល័យ Columbia បាននិយាយថា៖«បំណងប្រាថ្នារបស់រដ្ឋបាលរបស់លោក ដូណាល់ ត្រាំ ថ្មីក្នុងការកំណត់រចនាសម្ព័ន្ធពាណិជ្ជកម្មឡើងវិញអាចមានប្រយោជន៍ជាមួយផែនការកំណើននុយក្លេអ៊ែររបស់ប្រទេសឥណ្ឌាសម្រាប់ការនាំចេញរបស់សហរដ្ឋអាមេរិក»។

ជាមួយគ្នានេះ នាយករដ្ឋមន្ត្រីឥណ្ឌាលោក Narendra Modi គ្រោងនឹងជួបប្រធានាធិបតីអាមេរិក ដូណាល់ ត្រាំ នៅថ្ងៃពុធនេះ។ យោងតាមរដ្ឋមន្ត្រីថាមពលរបស់ប្រទេសឥណ្ឌា មេដឹកនាំទាំងពីរត្រូវបានគេរំពឹងថានឹងពិភាក្សាអំពីថាមពលនុយក្លេអ៊ែរ ក្នុងចំណោមប្រធានបទផ្សេងទៀត៕