ព័ត៌មានអន្ដរជាតិ

មន្ត្រីសំខាន់ៗរបស់ពូទីនចេញទៅអារ៉ាប៊ី សាអូឌីត ក្នុងបុព្វហេតុជំនួបកំពូល «ត្រាំ-ពូទីន»

បានផុស

៤ ខែ មុន

នៅ

ថ្ងៃអាទិត្យ ១៦ កុម្ភៈ ២០២៥

ដោយ

រដ្ឋមន្ត្រីក្រសួងហិរញ្ញវត្ថុរុស្ស៊ី លោក Anton Siluanov បានទៅបំពេញទស្សនកិច្ចនៅអារ៉ាប៊ីសាអូឌីត នៅថ្ងៃអាទិត្យនេះ ក្នុងដំណើរទស្សនកិច្ចមួយដែលត្រូវបានគេរំពឹងទុកថា ក្នុងបុព្វហេតុនៃជំនួបពិភាក្សារវាងមេដឹកនាំកំពូលរុស្ស៊ី និងសហរដ្ឋអាមេរិក នៅក្នុងព្រះរាជាណាចក្រ ដែលគ្រោងធ្វើនៅសប្តាហ៍ក្រោយ។

រដ្ឋមន្ត្រីក្រសួងហិរញ្ញវត្ថុរុស្ស៊ី លោក Anton Siluanov ចេញទៅបំពេញទស្សនកិច្ចនៅអារ៉ាប៊ីសាអូឌីត។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីហិរញ្ញវត្ថុរុស្ស៊ី លោក Siluanov បាននិយាយនៅក្នុងព្រឹត្តិការណ៍មួយដែលមានឈ្មោះថា សន្និសីទ AlUla ស្តីពីសេដ្ឋកិច្ចទីផ្សារងើបឡើង (AlUla Conference for Emerging Market Economies) ដែលរៀបចំដោយក្រសួងហិរញ្ញវត្ថុអារ៉ាប៊ីសាអូឌីត និងមូលនិធិរូបិយវត្ថុអន្តរជាតិ។

ប្រមុខដឹកនាំមន្ត្រីអាមេរិកលោក ដូណាល់ ត្រាំ និងរុស្ស៊ីលោក លោក វ៉្លាឌីមៀរ ពូទីន ក្នុងកិច្ចសន្ទនាលើកដំបូងតាមទូរស័ព្ទកាលថ្ងៃទី១២ខែកុម្ភៈ បានអះអាងពីលទ្ធភាពនៃការជួបប្រជុំគ្នានៅប្រទេសអារ៉ាប៊ីសាអូឌីត ហើយត្រូវបានគេរំពឹងទុកថា «នឹងកើតមាននៅប៉ុន្មានថ្ងៃខាងមុខ» ដើម្បីចាប់ផ្តើមកិច្ចចរចាសំដៅបញ្ចប់សង្រ្គាមជិតបីឆ្នាំនៅអ៊ុយក្រែន។ នេះបើតាមការផ្សាយរបស់ទីភ្នាក់ងារព័ត៌មានរ៉យទ័រដែលបានដកស្រង់សម្តីសមាជិកសភាអាមេរិក និងប្រភពដែលដឹងអំពីផែនការនេះបាននិយាយកាលពីថ្ងៃសៅរ៍។

ការចរចាដើម្បីរកដំណោះស្រាយបញ្ចប់សង្គ្រាមនៅអ៊ុយក្រែនដែលត្រូវបានគេរំពឹងយ៉ាងខ្លាំងថា ប្រធានាធិបតីសហរដ្ឋអាមេរិកលោក ដូណាល់ ត្រំា ដែលឡើងកាន់អំណាចមិនដល់មួយខែនេះ នឹងជំរុញការពិភាក្សាដោយទោរទន់ទៅរករុស្ស៊ីជាជាងអ៊ុយក្រែនដែលជាសម្ព័ន្ធមិត្តរបស់សហរដ្ឋអាមេរិក។ លើលពីនេះសហភាពអឺរ៉ុបដែលជាអ្នកជ្រោមជ្រែងអ៊ុយក្រែនក៏នឹងត្រូវផាត់ចោលពីកិច្ចសន្ទនាលើកដំបូងនេះដែរ។

ប្រធាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ក្នុងជំនួបជាមួយដូណាល់ ត្រាំ បន្ទាប់ពីដូណាល់ ត្រាំ សន្ទនាជាមួយពូទីន បានកោតសរសើរដូណាល់ត្រាំក្នុងកិច្ចខិតខំប្រឹងប្រែងដើម្បីកិច្ចចរចាសន្តិភាពអ៊ុយក្រែន ប៉ុន្តែនៅពេលទៅចូលរួមសន្និសីទស្តីពីសន្តិសុខនៅប្រទេសអាល្លឺម៉ង់ហាក់ប្តូរជំហរមិនទទួលស្គាល់កិច្ចព្រមព្រៀងរវាងអាមេរិកនិងរុស្ស៊ី បើមិនបានបញ្ចូលអាមេរិកក្នុងការចរចា។

ប្រធានាធិបតីអ៊ុយក្រែនក៏ចង់ឃើញអឺរ៉ុបបង្កើត និងពង្រឹងកងកម្លាំងផ្ទាល់ខ្លួនដោយឈប់ពឹងសហរដ្ឋអាមេរិកផងដែរ។

តាមទីភ្នាក់ងារព័ត៌មានរ៉យទ័រ ឧបនាយករដ្ឋមន្ត្រីទីមួយរបស់រុស្សី លោក Denis Manturov រួមជាមួយលោក Siluanov និងទេសាភិបាលធនាគារកណ្តាល Elvira Nabiullina បានជួបពិភាក្សាជាមួយប្រធានាធិបតីនៃប្រទេសអារ៉ាប់រួម Sheikh Mohamed bin Zayed Al Nahyan នៅថ្ងៃទី ១៥ ខែកុម្ភៈ។

ថ្លែងនៅក្នុងព្រឹត្តិការណ៍មួយ លោក Siluanov បានលើកឡើងពីឆន្ទៈរបស់រុស្ស៊ីក្នុងការរៀបចំរចនាសម្ព័ន្ធបំណុលរបស់បរទេសឡើងវិញ។

លោក Siluanov បាននិយាយថា៖«ក្នុងអំឡុងពេល ២៥ឆ្នាំចុងក្រោយនេះ យើងបានធ្វើរចនាសម្ព័ន្ធឡើងវិញនូវបំណុលរបស់ប្រទេសចំនួន ២២សម្រាប់ចំនួនទឹកប្រាក់ជិត ៣០ពាន់លានដុល្លារ។ ចំនួនទឹកប្រាក់ស្រដៀងគ្នានេះ យើងបានរៀបចំរចនាសម្ព័ន្ធឡើងវិញតាមរយៈកិច្ចព្រមព្រៀងទ្វេភាគី»៕

ដោយ រ៉ាន់ រើយ