ព័ត៌មានអន្ដរជាតិ

ពលរដ្ឋអាមេរិកនៅមិនញញើតកូវីដ-១៩ ដល់រដូវដើរលេង សម្រុកទៅឆ្នេរ Miami Beach អាជ្ញាធរទប់លែងឈ្នះប្រកាសអាសន្ន

បានផុស

៥ years មុន

នៅ

ថ្ងៃចន្ទ ២២ មីនា ២០២១

ដោយ

គ្រាន់តែរដូវលំហើយចាប់ផ្តើមភ្លាម ក្នុងឆ្នាំនេះ មនុស្សបាននាំគ្នាសម្រុកទៅកម្សាន្តនៅឆ្នេរសមុទ្រ Miami Beach ក្នុងរដ្ឋហ្លរីដា សហរដ្ឋអាមេរិកដែលធ្វើឲ្យមានការគ្រប់គ្រងលែងបានរហូតដល់អាជ្ញាធរប្រកាសអាសន្នកាលពីថ្ងៃទី២០ ខែមីនានេះ និងបានដាក់បំរាមគោចរតែម្តង។

ទិដ្ឋភាពដើរកម្សាន្តពេលយប់នៅឆ្នេរ Miami Beach

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសអាសន្ននេះគឺ២ឆ្នាំជាប់គ្នាដែលភាពសប្បាយរីករាយត្រូវបានកាត់បន្ថយនៅទិសដៅពេលឈប់សម្រាកដ៏ពេញនិយមបំផុតក្នុងនិទាឃរដូវមានតាំងពីខែមីនាឆ្នាំមុន បន្តចូលខែមីនាឆ្នាំនេះទៀត ពីព្រោះកូវីដ-១៩នៅតែមានហានិភ័យខ្ពស់។

អាជ្ញាធរបានប្រកាសកាលពីថ្ងៃសៅរ៍ថា អ្នកដើរកម្សាន្តត្រូវតែចាកចេញពីតាមដងផ្លូវ និងថា ភោជនីយដ្ឋានត្រូវត្រូវបិទទ្វារត្រឹមម៉ោង៨យប់នៅឆ្នេរ South Beach ដែលជាចំណុចកណ្តាលពោរពេញដោយការកម្សាន្តរាត្រី បន្ទាប់ពីការកើនឡើងនៃហិង្សា និងការបំផ្លិចបំផ្លាញក្នុងរយៈពេលប៉ុន្មានថ្ងៃនេះ។

បន្ថែមលើបំរាម ស្ពាន៣កន្លែងតភ្ជាប់ពីឆ្នេរ Miami Beach ទៅដីគោក ត្រូវបិទចរាចរណ៍ចាប់ពី១០យប់ដល់ម៉ោង៦ព្រឹក។ អ្នកស្រុក អ្នកធ្វើការ និងភ្ញៀវសណ្ឋាគារអាចឆ្លងកាត់បាន។

កាលពីយប់ថ្ងៃសៅរ៍ ប៉ូលិសបានបញ្ចេញរូបថតពីលើអាកាសមួយសន្លឹកបង្ហាញពីឈ្នូតដងផ្លូវដ៏ធំរបស់ទីក្រុងដែលស្រលះធេង ក្រោយពេលបំរាមពីរម៉ោង។

ឆ្នេរសមុទ្រ Miami Beach មិនមែនជាកន្លែងចម្លែកសម្រាប់ការសម្រាកកម្សានដែលមានពោរពេញដោយហ្វូងមនុស្សកក់កុញនារដូវលំហើយនោះទេ ប៉ុន្តែឆ្នាំនេះ ប្រជាជនដែលចាក់វ៉ាក់សាំងប្រហែល១៣%នៃប្រជាជនអាមេរិកមិនត្រូវបានអនុញ្ញាតឲ្យមានភាពសប្បាយអធឹកអធមដូចសព្វមួយដងឡើយ។

អ្នកគ្រប់គ្រងទីក្រុងស្តីទីលោក Raul Aguila បាននិយាយថា វិធានការណ៍ដាក់បំរាមររបស់ទីក្រុងដើម្បីសុវត្ថិភាពសាធារណ»។

លោកបានចាត់ទុកហ្វូងមនុស្សច្រើនកក់កុញដែលជួបជុំគ្នានៅតាមដងផ្លូវមើលទៅដូចជា«ការប្រគុំតន្ត្រៃរ៉ុក»។ មនុស្សច្រើនកក់កុញពេក សូម្បីមើលដី ស្មៅ ឬកំរាលថ្មក៏មិនឃើញផង។

អភិបាលក្រុង Miami Beach លោក Dan Gelber បាននិយាយនៅថ្ងៃសៅរ៍កំឡុងពេលប្រកាសបំរាមថា «បរិមាណមនុស្សគឺច្រើនជាងឆ្នាំមុនៗយ៉ាងខ្លាំង»។

រយៈពេលប៉ុន្មានថ្ងៃចុងក្រោយនេះ មានវីដេអូបង្ហាញពីការវ៉ៃគ្នានៅក្នុងភោជនីយដ្ឋានដែលបណ្តាលឲ្យមានការខូចខាតយ៉ាងធ្ងន់ធ្ងរបណ្តាលឲ្យអ្នកញាំអាហារពេលល្ងាចរត់ចេញប្រសាច។

អធិការប៉ូលិសក្រុងម៉ៃមីលោក Richard Clements បាននិយាយថា លោកបារម្ភពីស្ថានភាពដែលនឹងមិនអាចគ្រប់គ្រងបាន។

រហូតមកដល់ពេលនេះ សហរដ្ឋអអាមេរិកនៅតែជាប្រទេសដែលឈរចំណាត់ថ្នាក់លេខ១ដែលមានអ្នកឆ្លង និងស្លាប់ដោយកូវីដ-១៩ច្រើនជាងគេបំផុតក្នុងពិភពលោកនេះគឺអ្នកឆ្លងសរុបជិត៣០លាននាក់ និងអ្នកស្លាប់ជាង៥៤ម៉ឺននាក់។

ចំណែកប្រទេសប្រេស៊ីលស្ថិតនៅលេខ២ដែលមានអ្នកឆ្លងសរុបប្រមាណ១២លាននាក់ ហើយអ្នកស្លាប់ជិត៣០ម៉ឺននាក់ ហើយឥណ្ឌាលេខ៣ រុស្ស៊ីលេខ៤ និងចក្រភពអង់គ្លេសលេខ៥៕

សម្រួល៖ វីរបុត្រ
ប្រភព៖ CNA

Related Topics:សហរដ្ឋអាមេរិក