ព័ត៌មានអន្ដរជាតិ

ថៃស្នើសង់របងតាមព្រំដែនជាមួយកម្ពុជា បង្ការការឆ្លងដែនខុសច្បាប់

បានផុស

១ year មុន

នៅ

ថ្ងៃចន្ទ ៣ មីនា ២០២៥

ដោយ

ប្រទេសថៃកំពុងសិក្សាពីគំនិតផ្ដួចផ្ដើមសាងសង់ជញ្ជាំងមួយផ្នែកនៃព្រំដែនជាមួយប្រទេសកម្ពុជា ដើម្បីទប់ស្កាត់ការឆ្លងដែនខុសច្បាប់ ខណៈដែលកិច្ចខិតខំប្រឹងប្រែងពហុជាតិដើម្បីលុបបំបាត់កន្លែងឆបោកតាមអនឡាញតាមព្រំដែនកំពុងកើនឡើង។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី០៣ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរដ្ឋាភិបាលថៃ លោក Jirayu Houngsub បាននិយាយអំពីសំណើរសាងសង់ជញ្ជាំងនេះ ដោយមិនបានបញ្ជាក់ពីប្រវែងរបស់វា រួមទាំងសាងសង់ដោយរបៀបណានោះទេ។ ចំណែករដ្ឋាភិបាលកម្ពុជាមិនបានឆ្លើយតបភ្លាមៗចំពោះសំណើសុំការអត្ថាធិប្បាយលើសំណើសាងសង់ជញ្ជាំងនេះទេ។

ថៃនិងកម្ពុជា មានព្រំដែនជាប់គ្នា៨១៧គីឡូម៉ែត្រ។ ក្រសួងការពារជាតិថៃ ក៏ធ្លាប់បានស្នើសាងសង់ជញ្ជាំង ដើម្បីបិទផ្លូវឆ្លងកាត់ចម្ងាយ៥៥គីឡូម៉ែត្រ រវាងខេត្តស្រះកែវរបស់ប្រទេសថៃ និងក្រុងប៉ោយប៉ែត ដែលបច្ចុប្បន្នត្រូវបានការពារដោយខ្សែលួសប៉ុណ្ណោះ។

ការបង្រ្កាបកំពុងពង្រីកប្រឆាំងនឹង Call-Center ដែលប្រតិបត្តិការរក្លែងបន្លំហិរញ្ញវត្ថុដ៏ធំនៅអាស៊ីអាគ្នេយ៍ ជាពិសេសនៅតាមព្រំដែនដ៏ផុយស្រួយរបស់ប្រទេសថៃជាមួយប្រទេសមីយ៉ាន់ម៉ា និងប្រទេសកម្ពុជា ដែលមនុស្សរាប់សែននាក់ត្រូវបានជួញដូរដោយក្រុមឧក្រិដ្ឋជនក្នុងប៉ុន្មានឆ្នាំថ្មីៗនេះ។ នេះបើយោងតាមអង្គការសហប្រជាជាតិ។

កាលពីចុងសប្តាហ៍នេះ ប៉ូលិសថៃក៏បានទទួលជនជាតិថៃចំនួន១១៩នាក់ពីអាជ្ញាធរកម្ពុជា បន្ទាប់ពីការឆ្មក់ចូលក្នុងក្រុងប៉ោយប៉ែតចាប់បានមនុស្សជាង ២១៥នាក់ចេញពីបរិវេណកន្លែងឆបោក។

គួរបញ្ជាក់ថា បណ្ដាញឆបោកតាមទូរគមនាគមន៍បានដំណើរការអស់ជាច្រើនឆ្នាំមកហើយនៅអាស៊ីអាគ្នេយ៍ ប៉ុន្តែកន្លែងទាំងនោះទើបតែបានប្រឈមនឹងការបង្រ្កាបទ្រង់ទ្រាយធំបន្ទាប់ពីការជួយសង្គ្រោះតារាសម្តែងចិន Wang Xing កាលពីខែមករាដែលត្រូវបានបញ្ចុះបញ្ចូលឲ្យទៅធ្វើការនៅប្រទេសថៃ តែត្រូវបានគេចាប់ពង្រត់និងនាំយកទៅ Call-Center ក្នុងប្រទេស មីយ៉ាន់ម៉ា។

មកដល់ពេលនេះនៅទីក្រុង Myawaddy របស់មីយ៉ាន់ម៉ា មានជនបរទេសជាង៧០០០ នាក់ ភាគច្រើនមកពីប្រទេសចិន កំពុងរង់ចាំឆ្លងចូលប្រទេសថៃ ដែលកំពុងសម្របសម្រួលជាមួយស្ថានទូតនានា ដើម្បីព្យាយាមសម្រួលការធ្វើមាតុភូមិនិវត្តន៍ទៅប្រទេសដើមវិញ ដែលខ្លះបានធ្វើមាតុភូមិនិវត្តន៍រួចហើយ។

សមាជិកសភាកំពូលថៃម្នាក់ កាលពីសប្តាហ៍មុន បាននិយាយថា ការបង្រ្កាបមិនទាន់គ្រប់គ្រាន់ទេ ដោយប៉ាន់ស្មានថា មានមនុស្សចំនួន៣០ម៉ឺននាក់ឯណោះ បានធ្វើការនៅ Myawaddy។ ជាមួយគ្នានេះ ជនបរទេសរាប់រយនាក់ដែលត្រូវបានសង្គ្រោះចេញពី Call-Center កំពុងស្ថិតក្នុងស្ថានភាពលំបាកនៅក្នុងជំរំកងជីវពលមីយ៉ាន់ម៉ា ដោយសារបញ្ហាកង្វះការគ្រប់គ្រង់របស់មីយ៉ាន់ម៉ា៕