នាវា​ផ្ទុក​យន្តហោះ​ចម្បាំង​អាមេរិក ចូល​ចត​នៅ​កូរ៉េ​ខាង​ត្បូង បង្ហាញ​សាច់ដុំកម្លា​កូរ៉េ​ខាង​ជើង

នាវាផ្ទុកយន្តហោះ​ចម្បាំង USS Carl Vinson បានទៅ​ដល់កំពង់ផែទីក្រុង​ប៊ូសានក្នុង​ប្រទេសកូរ៉េខាងត្បូងកាលពីថ្ងៃអាទិត្យ​ទី​២​ខែ​មីនា​ឆ្នាំ​២០២៥ ដែល​នេះ​ត្រូវ​គេ​មើល​ឃើញ​ថា​​ជាការបង្ហាញ​យុទ្ធសាស្ត្រ​​នៃ​កម្លាំង​យោធា​ប្រឆាំងនឹងកូរ៉េខាងជើង។

ការ​ទៅ​ដល់​នៃ​នាវា​អាមេរិក ធ្វើ​ឡើង​បន្ទាប់​ពី​កូរ៉េ​ខាង​ជើង​កាល​ពី​ប៉ុន្មាន​ថ្ងៃ​មុន​បាន​បាញ់​សាកល្បង​មីស៊ីល​គ្រូស​ផ្លោង​ចូល​សមុទ្រ​លឿង​នៅ​ឆ្នេរភាគ​ខាង​លិច​នៃ​ឧបទ្វីប​កូរ៉េ។

វាគឺជានាវាផ្ទុកយន្តហោះអាមេរិកដំបូងគេដែលចូលចតនៅកំពង់ផែកូរ៉េខាងត្បូង គិត​ចាប់តាំងពី​ប្រធានាធិបតីអាមេរិកលោក ដូណាល់ ត្រាំ ចូល​កាន់​តំណែង​នៅ​ក្នុង​អាណត្តិ​ទី​ពីរ​របស់​លោក​កាល​ពី​ខែ​មករា។

បើ​យោង​តាម​កង​ទ័ព​ជើង​ទឹក​កូរ៉េ​ខាង​ត្បូង ដំណើរទស្សនកិច្ច​របស់ USS Carl Vinson គឺជាផ្នែកមួយនៃការប្តេជ្ញាចិត្ត​ដ៏​មុតមាំង​របស់​អាមេរិក ក្នុងការពង្រីកការរារាំង និងដើម្បីបង្ហាញពីការត្រៀមខ្លួនដោយសម្ព័ន្ធភាពយោធារវាងទីក្រុងសេអ៊ូល និងទីក្រុងវ៉ាស៊ីនតោន ប្រឆាំងនឹងកូរ៉េខាងជើង។

នាវា USS Carl Vinson ត្រូវបាន​អម​ដំណើរ​ដោយនាវាចម្បាំង​បំពាក់​មីស៊ីល USS Princeton និង​នាវា​ពិឃាត USS Sterett។

លោក Michael S. Wosje មេបញ្ជាការក្រុម Carrier Strike Group One ដែល​ដឹក​នាំ​នាវា USS Carl Vinson បាននិយាយ​នៅ​ថ្ងៃ​ចន្ទ​នេះ​ថា៖ «ច្បាស់ណាស់វត្តមានរបស់យើងនៅទីនេះនៅទីក្រុងប៊ូសាន បង្ហាញពីសម្ព័ន្ធភាពដ៏រឹងមាំរវាងសាធារណរដ្ឋកូរ៉េ និងសហរដ្ឋអាមេរិក និងឱកាសរបស់យើងក្នុងការបណ្តុះបណ្តាល និងប្រតិបត្តិការរួមគ្នាជាមួយសម្ព័ន្ធមិត្តរបស់យើង»៕

ដោយ៖ ឈាង

ចុចអាន៖ កូរ៉េ​ខាង​ជើង បាញ់​មីស៊ីល​ផ្លោង​ចូល​សមុទ្រ​លឿង ​បង្ហាញពី​ការ​ត្រៀម​ខ្លួន​ប្រឆាំង​នឹង​សត្រូវ