ដាណឺម៉ាក ​រិះគន់​គម្រោង​​ទស្សនកិច្ច​គណៈប្រតិភូ​អាមេរិក​ទៅកាន់ Greenland ដោយ​​​មិន​បាន​ស្នើសុំ

នាយករដ្ឋមន្ត្រីដាណឺម៉ាកលោកស្រី Mette Frederiksen បានសម្តែងការមិនពេញចិត្តយ៉ាងខ្លាំងចំពោះដំណើរទស្សនកិច្ចនាពេលខាងមុខទៅកាន់​កោះ Greenland ដោយគណៈប្រតិភូ​ជាន់​ខ្ពស់​របស់​សហរដ្ឋ​អាមេរិក ខណៈ​មហា​អំណាច​មួយ​នេះ​បាន​ដាក់​ «សម្ពាធ​ដែល​មិនអាចទទួលយកបាន» នៅ​លើទឹកដីពាក់កណ្តាលស្វយ័ត​របស់​ដាណឺម៉ាក។

យោង​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន​ Reuters នៅ​ថ្ងៃ​ទី​២៦​ខែ​មីនា​ឆ្នាំ​២០២៥​ គណៈប្រតិភូដឹកនាំដោយ​លោកស្រី Usha Vance ភរិយារបស់អនុប្រធានាធិបតីសហរដ្ឋអាមេរិក JD Vance រួមមានទីប្រឹក្សាសន្តិសុខជាតិលោក Mike Waltz និងរដ្ឋមន្ត្រីថាមពលលោក Chris Wright។ ដំណើរ​ទស្សន​កិច្ច​ដែល​គ្រោង​ធ្វើ​ចាប់​ពី​ថ្ងៃ​ព្រហស្បតិ៍​ដល់​ថ្ងៃ​សៅរ៍​​សប្ដាហ៍​នេះ ត្រូវ​បាន​រៀប​ចំ​ដោយ​គ្មាន​ការ​អញ្ជើញ​ជា​ផ្លូវ​ការ​ពី​អាជ្ញាធរ​ដាណឺម៉ាក ​ឬ ​Greenland នោះ​ទេ។

ប្រមុខរដ្ឋាភិបាលស្តីទីរបស់ Greenland លោក Múte Bourup Egede ក៏បានថ្កោលទោសដំណើរទស្សនកិច្ចនេះផងដែរ ដោយពណ៌នាថា វាជាការបង្កហេតុ និង​ជា​ការ​ដាក់​សម្ពាធ​បន្ថែម​ ខណៈ​បច្ចុប្បន្ន​ដែន​កោះ​អាកតិច​​ដ៏​ធំ​នេះ​កំពុងស្ថិតក្នុងដំណើរការបង្កើតរដ្ឋាភិបាលថ្មី បន្ទាប់ពីការបោះឆ្នោតនាពេលថ្មីៗនេះ។

កន្លង​មក ប្រធានាធិបតីអាមេរិក​លោក ដូណាល់ ត្រាំ បានរំលឹកសារជាថ្មីអំពីសារៈសំខាន់ជាយុទ្ធសាស្ត្ររបស់ Greenland ចំពោះសន្តិសុខជាតិរបស់​អាមេរិក ដោយបង្ហាញចំណាប់អារម្មណ៍​ក្នុងការបញ្ចូល Greenland ​ជា​ឧបសម្ព័ន្ធរបស់ខ្លួន។ លោកស្រី Frederiksen បានច្រានចោលគំនិតនេះយ៉ាងម៉ឺងម៉ាត់ ដោយសង្កត់ធ្ងន់ថា៖ «Greenland ជាកម្មសិទ្ធិរបស់​ពលរដ្ឋ​ Greenland ហើយមិនមែនសម្រាប់លក់ទេ»។

ក្រុមប្រឹក្សាសន្តិសុខជាតិរបស់សេតវិមាន បាននិយាយថា គោលបំណងរបស់គណៈប្រតិភូ គឺដើម្បីចូលរួម​ស្វែង​យល់​វប្បធម៌ និងប្រវត្តិសាស្ត្រ​របស់​ Greenland។ ទោះយ៉ាងណាក៏ដោយ ទាំងមន្ត្រីដាណឺម៉ាក និង Greenland ចាត់ទុកដំណើរទស្សនកិច្ចដែលមិនបានស្នើសុំនោះថាជាសម្ពាធ និងការជ្រៀតជ្រែកហួសហេតុក្នុងកិច្ចការផ្ទៃក្នុងរបស់ពួកគេ៕

ដោយ៖ ឈាង