ព័ត៌មានអន្ដរជាតិ

រដ្ឋមន្ត្រីអ៊ីរ៉ង់ ធ្វើដំណើរទៅចិន មុនកិច្ចប្រជុំនុយក្លេអ៊ែរលើកទីបីជាមួយអាមេរិក

បានផុស

១ year មុន

នៅ

ថ្ងៃអង្គារ ២២ មេសា ២០២៥

ដោយ

Chheang

ប្រទេសចិនបានប្រកាសជាផ្លូវការថា រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi នឹងធ្វើទស្សនកិច្ចនៅទីក្រុងប៉េកាំងនាថ្ងៃពុធទី២៣ខែមេសាឆ្នាំ២០២៥ ដែលជាផ្នែកមួយនៃទំនាក់ទំនងការទូតកាន់តែស៊ីជម្រៅរវាងប្រជាតិទាំងពីរ ចំពេលមានភាពតានតឹងកើនឡើងនៅមជ្ឈិមបូព៌ា និងការចរចានុយក្លេអ៊ែរ។

លោក Seyed Abbas Araghchi (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Guo Jiakun អ្នកនាំពាក្យក្រសួងការបទេសចិន បានលើកឡើងថា ភាគីទាំងពីរនឹងពិភាក្សាអំពីទំនាក់ទំនងទ្វេភាគី និងបញ្ហាក្តៅអន្តរជាតិ និងក្នុងតំបន់ ដែលជាកង្វល់រួម។

ទីក្រុងប៉េកាំងបានដាក់ខ្លួនជាអ្នកសម្រុះសម្រួលដ៏សំខាន់នៅមជ្ឈិមបូព៌ា ដោយដើរតួនាទីយ៉ាងសំខាន់ក្នុងការស្តារទំនាក់ទំនងរវាងអ៊ីរ៉ង់ និងអារ៉ាប៊ីសាអូឌីត កាលពីឆ្នាំមុន។ ដំណើរទស្សនកិច្ចនេះត្រូវបានគេរំពឹងថានឹងពង្រឹងការគាំទ្ររបស់ចិនចំពោះដំណោះស្រាយការទូត និងពហុភាគីនិយមក្នុងកិច្ចការពិភពលោក។

ជាការកត់សម្គាល់ សេចក្តីប្រកាសអំពីដំណើរទស្សនកិច្ចនេះ បានធ្វើឡើងមុនកិច្ចចរចានុយក្លេអ៊ែរលើកទីបីរវាងអ៊ីរ៉ង់ និងសហរដ្ឋអាមេរិកដែលនឹងត្រូវធ្វើឡើងនៅថ្ងៃសៅរ៍សប្ដាហ៍នេះក្នុងប្រទេសអូម៉ង់។

គួរបញ្ជាក់ថា មុនកិច្ចប្រជុំនុយក្លេអ៊ែរលើកទីពីរសប្ដាហ៍មុន អ៊ីរ៉ង់ក៏បានចាត់ឲ្យលោក Araghchi ធ្វើទស្សនកិច្ចនៅប្រទេសរុស្ស៊ីផងដែរ។ កាលណោះ លោក Araqchi បានប្រាប់ទូរទស្សន៍រដ្ឋអ៊ីរ៉ង់ថា៖ «ទាក់ទងនឹងបញ្ហានុយក្លេអ៊ែរ យើងតែងតែមានការពិគ្រោះយោបល់យ៉ាងជិតស្និទ្ធជាមួយមិត្តចិន និងរុស្ស៊ី»៕

ដោយ៖ ឈាង

ចុចអាន៖ អ៊ីរ៉ង់ផ្ញើសំបុត្រឲ្យ ពូទីន មុនកិច្ចប្រជុំនុយក្លេអ៊ែរលើកទីពីរជាមួយអាមេរិក