អន្តរជាតិប្រតិកម្មខ្លាំងៗ ក្រោយកូរ៉េខាងជើង ទទួលស្គាល់ បញ្ជូនទ័ពទៅជួយច្បាំងរុស្ស៊ី

សហគមន៍អន្តរជាតិ បានថ្កោលទោសយ៉ាងដាច់អហង្ការចំពោះការទទួលស្គាល់នាពេលថ្មីៗនេះពីសំណាក់ប្រទេសកូរ៉េខាងជើង ដែលថា ខ្លួនពិតជាបញ្ជូនទ័ព ទៅជួយរុស្ស៊ីច្បាំងក្នុងសង្គ្រាមជាមួយអ៊ុយក្រែនមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទង្វើនេះនាំឲ្យមានការរិះគន់យ៉ាងខ្លាំងពីសំណាក់បណ្តាប្រទេសនិងអង្គការអន្តរជាតិមួយចំនួន ដែលបង្ហាញពីក្តីបារម្ភអំពីស្ថិរភាពក្នុងតំបន់និងការរីករាលដាលនៃជម្លោះកាន់តែធំ។

សហរដ្ឋអាមេរិកនិងកូរ៉េខាងត្បូង

សម្ព័ន្ធមិត្តទាំងពីរគឺសហរដ្ឋអាមេរិកនិងកូរ៉េខាងត្បូង បាននាំគ្នាចេញមុខថ្កោលទោសកូរ៉េខាងជើងចំពោះរឿងនេះ ដោយទីក្រុង​សេអ៊ូល​ ចាត់ទុតថា សេចក្តីប្រកាសរបស់ទីក្រុងព្យុងយ៉ាង គឺប្រៀបបាននឹងការ​ទទួលស្គាល់​អំពើ​ឧក្រិដ្ឋកម្ម ខណៈទី​ក្រុង​វ៉ាស៊ីនតោន ​​សង្កត់​ធ្ងន់​ថា ​កូរ៉េ​ខាង​ជើង​និង​ប្រទេស​ដែល​រួម​ចំណែក​ផ្សេង​ទៀត​ ជាអ្នកទទួល​ខុស​ត្រូវ​សម្រាប់​ការ​អូស​បន្លាយ​សង្គ្រាម ឲ្យកាន់តែវែងឆ្ងាយ។

អ៊ុយក្រែន

តំណាងអ៊ុយក្រែនប្រចាំអង្គការសហប្រជាជាតិ ព្រមានថា ការចូលរួមរបស់ទាហានកូរ៉េខាងជើង កំពុងបង្កការគំរាមកំហែងយ៉ាងធ្ងន់ធ្ងរដល់ទាំងអឺរ៉ុបនិងឧបទ្វីបកូរ៉េ។

អង្គការណាតូ

អគ្គលេខាធិការអង្គការណាតូ លោក ម៉ាក រូតេ ព្រមានថា កិច្ចសហប្រតិបត្តិការយោធាកាន់តែស្អិតរមួតរវាងកូរ៉េខាងជើងនិងរុស្ស៊ី អាចបង្កអស្ថិរភាពបន្ថែមទៀតនៅក្នុងសង្គ្រាមដែលកំពុងឆាបឆេះស្រាប់ ហើយបង្កគ្រោះថ្នាក់ដល់សន្តិសុខទាំងនៅក្នុងតំបន់ឥណ្ឌូប៉ាស៊ីហ្វិកនិងតំបន់អឺរ៉ូអាត្លង់ទិក។

អង្គការសហប្រជាជាតិ

អគ្គលេខាធិការអង្គការសហប្រជាជាតិ Antonio Guterres បានបង្ហាញក្តីបារម្ភជាពន់ពេកអំពីការចូលដៃពីសំណាក់ភាគីបន្ថែមទៀតនៅក្នុងសង្រ្គាមរុស្ស៊ី-អ៊ុយក្រែន ដោយសារតែវត្តមានទ័ពកូរ៉េខាងជើង។

អាល្លឺម៉ង់

រដ្ឋមន្ត្រីការបរទេសអាល្លឺម៉ង់ អ្នកស្រី Annalena Baerbock បានសង្កត់ធ្ងន់ថា ជំនួយយោធារបស់កូរ៉េខាងជើងដល់រុស្ស៊ី ធ្វើឲ្យស្ថានការណ៍កាន់តែធ្ងន់ធ្ងរ ខណៈលោក ពូទីន បន្តសង្គ្រាមសម្លាប់ប្រជាជនស្លូតត្រង់៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា​ត្រៀម​ជួយ​គាំទ្រ​ផ្នែក​យោធា​ដល់​កូរ៉េ​ខាង​ជើង ក្នុង​ករណី​ចាំបាច់