រុស្ស៊ី ថា​ត្រៀម​ជួយ​គាំទ្រ​ផ្នែក​យោធា​ដល់​កូរ៉េ​ខាង​ជើង ក្នុង​ករណី​ចាំបាច់

វិមានក្រឹមឡាំង បានបញ្ជាក់​នៅ​ថ្ងៃ​ចន្ទ​ទី​២៨​ខែ​មេសា​នេះ​ថា រុស្ស៊ី​បាន​ត្រៀមផ្តល់ជំនួយយោធាដល់កូរ៉េខាងជើងប្រសិនបើចាំបាច់ ស្របតាមកិច្ចព្រមព្រៀងភាពជាដៃគូយុទ្ធសាស្ត្រដែលបានចុះហត្ថលេខារវាងប្រជាជាតិទាំងពីរក្នុងខែវិច្ឆិកា​ឆ្នាំ​២០២៤។

អ្នកនាំពាក្យវិមានក្រឹមឡាំងលោក Dmitry Peskov បានសង្កត់ធ្ងន់ថា កិច្ចព្រមព្រៀងមានកាតព្វកិច្ច​​តម្រូវ​ឲ្យ​ប្រទេសទាំងពីរផ្តល់ការគាំទ្រគ្នាទៅវិញទៅមក ក្នុងគ្រាចាំបាច់។ លោក​បន្ថែម​ថា ការចូលរួមរបស់ទាហានកូរ៉េខាងជើងក្នុងកិច្ចខិតខំប្រឹងប្រែងរបស់រុស្ស៊ី ដើម្បីដណ្តើមយកមកវិញនូវតំបន់ព្រំដែន Kursk បានបង្ហាញ​ច្បាស់​អំពីប្រសិទ្ធភាពនៃកិច្ចព្រមព្រៀងភាពជាដៃគូយុទ្ធសាស្ត្រ​នេះ។

ការ​ប្រកាស​របស់​វិមានក្រឹមឡាំង ធ្វើ​ឡើង​បន្ទាប់​ប្រទេសកូរ៉េខាងជើង ទទួលស្គាល់ហើយថា ខ្លួនពិតជាបញ្ជូនទ័ពទៅជួយរុស្ស៊ី ប្រយុទ្ធនឹងកងកម្លាំងអ៊ុយក្រែន នៅក្នុងសង្គ្រាមមែន ខណៈការបញ្ជូននេះ ត្រូវបានបញ្ជាដោយមេដឹកនាំ គីម ជុងអ៊ុន ផ្ទាល់តែម្តង។ កូរ៉េខាងជើង បានចាត់ទុកការដាក់ពង្រាយនោះថា ជាការបង្ហាញអំពីមិត្តភាពសកម្មប្រយុទ្ធដ៏រឹងមាំកម្រិតខ្ពស់បំផុតរវាងកូរ៉េខាងជើងនិងរុស្ស៊ី។

របាយការណ៍កន្លង​មក បង្ហាញថា ទាហានកូរ៉េខាងជើងប្រហែល ១០ ០០០​ ទៅ​ ១២ ០០០​នាក់ត្រូវបានដាក់ពង្រាយ ដោយ​ក្នុង​នោះ​មាន​ស្លាប់​និងរបួស​​ប្រហែល ៤ ០០០​នាក់។ ជាការតបស្នងវិញ រុស្ស៊ីតាមសេចក្តីរាយការណ៍បានផ្គត់ផ្គង់សព្វាវុធដល់កូរ៉េខាងជើង ដោយបង្កើនការព្រួយបារម្ភក្នុងចំណោមមន្ត្រីអាមេរិក និងកូរ៉េខាងត្បូងអំពីការផ្ទេរបច្ចេកវិទ្យាយោធាដែលមានសក្តានុពល ដែលអាចបង្កើនសមត្ថភាពនុយក្លេអ៊ែររបស់កូរ៉េខាងជើង។

សន្ធិសញ្ញាការពារ​គ្នា​ទៅវិញទៅមក ដែលបានចុះហត្ថលេខារវាងរុស្ស៊ី និងកូរ៉េខាងជើង ត្រូវបានចាត់ទុកថា ជាសន្ធិសញ្ញាយោធាដ៏សំខាន់បំផុតរវាងប្រទេសទាំងពីរ ចាប់តាំងពី​សម័យ​សង្គ្រាមត្រជាក់មក។ នៅក្រោមសន្ធិសញ្ញានេះ ប្រទេសទាំងពីរប្តេជ្ញាផ្តល់ជំនួយផ្នែកយោធាភ្លាមៗ បើ​ភាគី​ណា​មួយ​រង​ការ​វាយប្រហារ ដែលជាសញ្ញាបង្ហាញពីការពង្រឹងសម្ព័ន្ធភាពយោធារបស់ពួកគេ៕

ដោយ៖ ឈាង

ចុចអាន៖ ទីបំផុត កូរ៉េខាងជើង ទទួលស្គាល់ថា ខ្លួនពិតជាបញ្ជូនទ័ព ទៅជួយរុស្ស៊ី មែន