ត្រាំ គំរាមថា នរណាហ៊ានទិញប្រេងអ៊ីរ៉ង់ មិនឲ្យមកធ្វើជំនួញជាមួយអាមេរិក ដាច់ខាត!

ភ្លាមៗក្រោយប្រទេសអូម៉ង់ប្រកាសថា ការចរចាស្តីពីកម្មវិធីនុយក្លេអ៊ែររបស់ទីក្រុងតេហេរ៉ង់ ដែលគ្រោងធ្វើនៅសប្តាហ៍នេះ ត្រូវបានផ្អាកវិញនោះ ស្រាប់តែលោក ដូណាល់ ត្រាំ ក្តៅស្លឹកត្រចៀកតែម្តង ដោយប្រធានាធិបតីអាមេរិករូបនេះ គំរាមថា ប្រទេសណាឬនរណាក៏ដោយ បើហ៊ានទិញប្រេងអ៊ីរ៉ង់ នឹងរងទណ្ឌកម្ម ហើយមិនឲ្យមកធ្វើជំនួញជាមួយអាមេរិកដាច់ខាត។ នេះបើតាមការចុះផ្សាយរបស់ PBS កាលពីថ្ងៃព្រហស្បតិ៍ទី១ខែឧសភាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមគម្រោង កិច្ចចរចានុយក្លេអ៊ែរអាមេរិក-អ៊ីរ៉ង់ នឹងរៀបចំឡើងនៅថ្ងៃទី៣ខែឧសភា ក្នុងទីក្រុងរ៉ូមនៃប្រទេសអ៊ីតាលី ប៉ុន្តែវាត្រូវផ្អាកសិនដោយសារហេតុផលខាងភស្តុភារ។

កិច្ចពិភាក្សានេះ មានគោលបំណងដាក់កំហិតលើកម្មវិធីនុយក្លេអ៊ែររបស់អ៊ីរ៉ង់ ជាថ្នូរនឹងការដកទណ្ឌកម្មសេដ្ឋកិច្ចមួយចំនួនដែលសហរដ្ឋអាមេរិកបានដាក់លើសាធារណរដ្ឋឥស្លាមមួយនេះ។ ការចរចានោះទៀតសោត នឹង​ត្រូវ​ដឹកនាំ​ដោយ​រដ្ឋមន្ត្រី​ការបរទេស​អ៊ីរ៉ង់ Abbas Araghchi និង​បេសកជន​មជ្ឈិមបូព៌ា​របស់​អាមេរិក Steve Witkoff។

យ៉ាងណា ពាក់ព័ន្ធការបរាជ័យនេះ ធ្វើឲ្យលោកត្រាំ ក្តៅចិត្ត ហើយចេញសារគំរាមលើបណ្តាញសង្គម Truth Social ថា៖ «រាល់ការទិញប្រេងឬផលិតផលគីមីឥន្ធនៈរបស់អ៊ីរ៉ង់ ត្រូវតែបញ្ឈប់ឥឡូវនេះ! ប្រទេស​ណាឬនរ​ណា​ក៏ដោយ ឲ្យតែហ៊ាន​ទិញ​ផលិតផល​ទាំង​នោះ​ពី​ប្រទេស​អ៊ីរ៉ង់ នឹង​មិនឲ្យ​មកធ្វើជំនួញជាមួយអាមេរិកទេ»។ 

ដ្បិតលោកត្រាំ ព្រមានបែបនេះទៅគ្រប់ប្រទេសក៏ពិតមែន ប៉ុន្តែគេដឹងថា អ្នកប៉ះពាល់ខ្លាំងបំផុតគឺ ចិន ព្រោះប្រទេសនេះគឺជាអតិថិជនដ៏ធំរបស់អ៊ីរ៉ង់ ហើយចំណាត់ការរបស់ប្រមុខរដ្ឋាភិបាលទីក្រុងវ៉ាស៊ីនតោន ច្បាស់ជាធ្វើឲ្យភាពតានតឹងជាមួយទីក្រុងប៉េកាំងកាន់តែធ្ងន់ធ្ងរ ខណៈទំនាក់ទំនងរវាងប្រទេសទាំងពីរ កំពុងយ៉ាប់យ៉ឺនស្រាប់ទៅហើយ ដោយសារវិធានការពន្ធរបស់អាមេរិក។

តួយ៉ាង ផ្អែកលើទិន្នន័យតាមដានប្រេង, រដ្ឋបាលព័ត៌មានថាមពលរបស់សហរដ្ឋអាមេរិកបានសន្និដ្ឋាននៅក្នុងរបាយការណ៍ដែលបញ្ចេញកាលពីខែតុលាឆ្នាំមុនថា ប្រទេសចិនបានទទួលយកសឹងតែ៩០%ទៅហើយ នៃការនាំចេញប្រេងឆៅនិងសារធាតុរាវខាប់របស់អ៊ីរ៉ង់ក្នុងឆ្នាំ២០២៣៕

អត្ថបទ៖ សុខ សុវណ្ណ

ចុចអាន៖ ប្រទេស​ចំនួន​បី គំរាម​ដាក់ទណ្ឌកម្ម បើកិច្ចព្រមព្រៀងនុយក្លេអ៊ែរអ៊ីរ៉ង់​បរាជ័យ