ព័ត៌មានអន្ដរជាតិ

រដ្ឋបាលលោក ត្រាំ ត្រៀមទទួលយកយន្តហោះប្រណិតតម្លៃ ៤០០លានដុល្លារជាអំណោយពីកាតា

បានផុស

៦ ថ្ងៃ មុន

នៅ

ថ្ងៃចន្ទ ១២ ឧសភា ២០២៥

ដោយ

Chheang

យោងតាមការចុះផ្សាយកាលពីថ្ងៃទី១១ខែឧសភាឆ្នាំ២០២៥របស់សារព័ត៌មាន ABC News រដ្ឋបាលប្រធានាធិបតីអាមេរិក ដូណាល់ ត្រាំ ត្រូវបានគេរាយការណ៍ថាកំពុងរៀបចំទទួលយកយន្តហោះ Boeing 747-8 ដ៏ប្រណិតមួយគ្រឿងពីខ្សែរាជវង្សកាតា ក្នុងបំណងយកទៅបម្រើការបណ្តោះអាសន្នជាយន្តហោះដឹកប្រធានាធិបតី Air Force One។

លោក ដូណាល់ ត្រាំ (រូបថត៖ New York Times)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះនេះ មានតម្លៃប្រហែល ៤០០លានដុល្លារ និងត្រូវបានគេដាក់ឈ្មោះថា «រាជវាំងលើអាកាស (Flying Palace)»។ វានឹងត្រូវប្រើប្រាស់ជាបណ្ដោះអាសន្នសម្រាប់ដឹកប្រធានាធិបតីអាមេរិក ខណៈយន្តហោះ Air Force One ផ្លូវការដែលផលិតដោយក្រុមហ៊ុន Boeing ត្រូវបានពន្យារពេលដឹកជញ្ជូន។ បន្ទាប់ពីចប់អាណត្តិ លោក ត្រាំ គ្រោងនឹងផ្ទេរយន្តហោះដែលជាអំណោយរបស់កាតានេះទៅឲ្យអង្គការមូលនិធិបណ្ណាល័យប្រធានាធិបតី។

ព័ត៌មាននេះ បានបញ្ឆេះឲ្យមានការរិះគន់ជាច្រើន។ សមាជិកសភាគណបក្សប្រជាធិបតេយ្យ រួមទាំងមេដឹកនាំសំឡេងភាគតិចព្រឹទ្ធសភា លោក Chuck Schumer និងអ្នកតំណាង Adam Schiff បានអំពាវនាវឲ្យមានការស៊ើបអង្កេតលើការបំពានដែលអាចកើតមានចំពោះរដ្ឋធម្មនុញ្ញ ដែលហាមឃាត់មន្ត្រីអាមេរិកពីការទទួលយកអំណោយពីរដ្ឋាភិបាលបរទេសដោយគ្មានការយល់ព្រមពីសភា។

សូមបញ្ជាក់ថា លោក ត្រាំ បានសម្តែងការខកចិត្តចំពោះការពន្យារពេលក្នុងការផ្តល់យន្តហោះ 747-8 ចំនួនពីរគ្រឿង ដើម្បីបម្រើការជាយន្តហោះ Air Force One ថ្មី។ ក្នុងអំឡុងអាណត្តិដំបូងរបស់ខ្លួន លោក ត្រាំ បានឈានដល់កិច្ចព្រមព្រៀងជាមួយក្រុមហ៊ុន Boeing ដើម្បីចែកចាយយន្តហោះនៅឆ្នាំ២០២៤។ យ៉ាងណាមិញ មន្ត្រីកងទ័ពអាកាសអាមេរិក បានប្រាប់សភាកាលពីសប្តាហ៍មុនថា ក្រុមហ៊ុន Boeing បានស្នើសុំពន្យារពេលរហូតដល់ឆ្នាំ២០២៧ឯណោះវិញ៕

ដោយ៖ ឈាង