ព័ត៌មានអន្ដរជាតិ

UN ច្រានចោលផែនការផ្តល់ជំនួយតំបន់ហ្គាហ្សា ដែលគាំទ្រដោយសហរដ្ឋអាមេរិក

បានផុស

១ year មុន

នៅ

ថ្ងៃសុក្រ ១៦ ឧសភា ២០២៥

ដោយ

អង្គការសហប្រជាជាតិនឹងមិនចូលរួមក្នុងប្រតិបត្តិការមនុស្សធម៌ដែលគាំទ្រដោយសហរដ្ឋអាមេរិកនៅតំបន់ហ្គាហ្សានោះទេ ដោយលើកឡើងថា វាមានភាពលំអៀង និងមិនអព្យាក្រឹត ខណៈអ៊ីស្រាអែលបានសន្យាជួយសម្រួលដល់កិច្ចខិតខំប្រឹងប្រែងតែមិនលូកដៃក្នុងការដឹកជញ្ជូនជំនួយទាំងនោះឡើយ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃសុក្រទី១៦ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរងរបស់អង្គការសហប្រជាជាតិលោក Farhan Haq បានប្រាប់អ្នកយកព័ត៌មានកាលពីថ្ងៃព្រហស្បតិ៍ថា «ផែនការផ្ដល់ជំនួយនេះមិនស្របតាមគោលការណ៍ជាមូលដ្ឋានរបស់ឍអង្គការសហប្រជាជាតិ រួមទាំងមានភាពលំអៀង មិនមានអព្យាក្រឹតភាព មិនឯករាជ្យភាព ហើយយើងនឹងមិនចូលរួមក្នុងរឿងនេះទេ» ។

មូលនិធិមនុស្សធម៌តំបន់ហ្គាហ្សាដែលគាំទ្រដោយសហរដ្ឋអាមេរិកនឹងចាប់ផ្តើមនៅហ្គាហ្សានាចុងខែឧសភានេះ ក្រោមផែនការជំនួយដែលត្រូវបានរិះគន់យ៉ាងខ្លាំងដោយប្រធានជំនួយរបស់អង្គការសហប្រជាជាតិលោក Tom Fletcher ដែលថា វានឹងបង្កើនអំពើហិង្សា និងការផ្លាស់ទីលំនៅបន្ថែមទៀតរបស់ប៉ាឡេស្ទីននៅក្នុងតំបន់ហ្គាហ្សា។

គួររម្លឹកថា អ៊ីស្រាអែលបានចោទប្រកាន់ហាម៉ាសថាបានលួចជំនួយ ត្រូវក្រុមសកម្មប្រយុទ្ធប៉ាឡេស្ទីននេះបដិសេធ។ អ៊ីស្រាអែលបានរារាំងការដឹកជញ្ជូនជំនួយមនុស្សធម៌ទាំងអស់ទៅកាន់តំបន់ហ្គាហ្សាចាប់តាំងពីថ្ងៃទី២ខែមីនា ដោយទាមទារឱ្យក្រុមហាម៉ាសដោះលែងអ្នកជាប់ឃុំដែលនៅសេសសល់ទាំងអស់។

ថ្លែងទៅកាន់អ្នកសារព័ត៌មាននៅទីក្រុង Antalya ប្រទេសតួកគី រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃព្រហស្បតិ៍បានទទួលស្គាល់ការរិះគន់នេះ ហើយបាននិយាយថា ទីក្រុងវ៉ាស៊ីនតោនបានបើកចំហចំពោះផែនការជំនួសណាមួយ ដើម្បីផ្ដល់ជំនួយដល់ជនស៊ីវិល «ដោយគ្មានក្រុមហាម៉ាសអាចលួចវាបាន»។

អ៊ីស្រាអែល និងសហរដ្ឋអាមេរិកបានជំរុញឱ្យអង្គការសហប្រជាជាតិ និងក្រុមជំនួយទាំងឡាយសហការនិងធ្វើការជាមួយផែនការមួយនេះ ខណៈប្រភពមូលនិធិនៅមិនទាន់ដឹងច្បាស់ថាបានមកពីណាឲ្យប្រាកដទេ ហើយអ្នកនាំពាក្យក្រសួងការបរទេសក្រុងវ៉ាស៊ីនតោន បានបញ្ជាក់ថា គ្មានថវិការបស់រដ្ឋាភិបាលអាមេរិកនឹងចូលរួមក្នុងមូលនិធិនោះឡើយ៕