អ្នកស្លាប់ដោយសារទឹកជំនន់នៅអូស្រ្តាលីកើនដល់៤នាក់ ខណៈភ្លៀងនៅ​បន្ត​ធ្លាក់ខ្លាំង

យោងតាមការចេញផ្សាយរបស់កាសែត Bangkok Post នៅថ្ងៃទី២៣ខែឧសភានេះ អ្នកស្លាប់បានកើនដល់៤នាក់ និងរាប់ពាន់នាក់គ្មានអគ្គិសនីប្រើប្រាស់ ខណៈព្យុះដ៏ខ្លាំងនិងទឹកជំនន់​ទឹកភ្លៀង​បានវាយប្រហាររដ្ឋដែលមានប្រជាជនច្រើនបំផុតរបស់ប្រទេសអូស្ត្រាលី។

រដ្ឋ New South Wales នៅតែមានការប្រុងប្រយ័ត្នខ្ពស់ចំពោះទឹកជំនន់ និងបញ្ហាអាកាសធាតុ។ យោងតាមការិយាល័យឧតុនិយម ភ្លៀងធ្លាក់ខ្លាំងត្រូវបានគេរំពឹងថានឹងបន្តដល់ចុងសប្តាហ៍នៅតំបន់កណ្តាល និងភាគខាងត្បូង ខណៈតំបន់ឆ្នេរកំពុងប្រឈមនឹងខ្យល់បក់រហូតដល់ ៨០គីឡូម៉ែត្រក្នុងមួយម៉ោង ។ តំបន់​ខ្លះមាន​ទឹកភ្លៀង​រហូត​ដល់ ៦០០ មីលីម៉ែត្រ​ក្នុង​រយៈពេល ៤ ថ្ងៃ​ចុង​ក្រោយ​នេះ។

ទឹកជំនន់នេះបានធ្វើឱ្យមនុស្សយ៉ាងតិច ៥០០០០ នាក់ជាប់គាំង និងមានមនុស្សម្នាក់បាត់ខ្លួន។ បើតាមភ្នាក់ងារសង្គ្រោះបន្ទាន់រដ្ឋ New South Wales មនុស្សជាង៦០០នាក់ត្រូវបានជួយសង្គ្រោះចាប់តាំងពីមានទឹកជំនន់។ ឆ្លើយតបទៅនឹងគ្រោះហន្តរាយនេះមាន ទូកជាង ៥០០ និងឧទ្ធម្ភាគចក្រ ៩ គ្រឿងត្រូវបានដាក់ពង្រាយនៅទូទាំងរដ្ឋ។

គួរបញ្ជាក់ថាការឡើងកំដៅផែនដីកំពុងធ្វើឱ្យមានបញ្ហាអាកាសធាតុដូចជាភ្លៀងធ្លាក់ញឹកញាប់ ឆក់យកជីវិតមនុស្ស បំផ្លាញហេដ្ឋារចនាសម្ព័ន្ធសំខាន់ៗ និងដំណាំនៅទូទាំងពិភពលោក។ ជាមួយគ្នានេះភ្លៀងធ្លាក់រយៈពេលខ្លី និងខ្លាំងបានកើនឡើងប្រហែល១០% ឬច្រើនជាងនេះនៅក្នុងតំបន់មួយចំនួនរបស់អូស្ត្រាលី នេះបើយោងតាមរបាយការណ៍អាកាសធាតុពីរឆ្នាំចុងក្រោយបំផុតរបស់រដ្ឋាភិបាលអូស្ត្រាលី៕

អត្ថបទ៖ ប៊ុន សុភាព