ព័ត៌មានអន្ដរជាតិ

របបយោធាមីយ៉ាន់ម៉ាទម្លាក់គ្រាប់បែកលើពិធីមង្គលការសម្លាប់ជនស៊ីវិល១០នាក់ រួមទាំងកូនក្រមុំផង

បានផុស

១ year មុន

នៅ

ថ្ងៃអង្គារ ២៧ ឧសភា ២០២៥

ដោយ

យ៉ាងហោចណាស់ជនស៊ីវិល ១០នាក់ រួមទាំងកូនក្រមុំ និងក្មេងពីរនាក់ត្រូវបានសម្លាប់ ដោយសារការទម្លាក់គ្រាប់បែករបស់របបយោធាមីយ៉ាន់ម៉ា លើពិធីមង្គលការមួយនៅក្នុងភូមិ Kyunkyi ក្នុងទីក្រុង Kyaukkyi តំបន់ Bago ប្រទេសមីយ៉ាន់ម៉ា។ នេះបើយោងតាមការចេញផ្សាយរបស់សារព័ត៌មានThe Irrawaddy កាលពីថ្ងៃទី២៦ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីថ្ងៃអាទិត្យ ដោយក្រៅពីមានអ្នកស្លាប់១០នាក់ ក៏មានមនុស្សជាង២០នាក់ផ្សេងទៀតបានរងរបួស ក្នុងនោះ៧នាក់ស្ថិតក្នុងស្ថានភាពធ្ងន់ធ្ងរ។ គ្រាប់បែកនេះត្រូវបានគេរាយការណ៍ថា ត្រូវបានទម្លាក់នៅក្បែររោងការដែលមានភ្ញៀវកំពុងពិសារអាហារ និងបានធ្វើឲ្យមានការរិះគន់ជាខ្លាំង ពីសំណាក់ប្រជាជនមីយ៉ាន់ម៉ា។

បើតាមសម្ដីអ្នកភូមិ ភូមិនេះត្រូវបានកំណត់គោលដៅវាយប្រហារព្រោះវាស្ថិតនៅក្នុងតំបន់ដែលគ្រប់គ្រងដោយសម្ព័ន្ធជាតិ Karen (KNU)។ បើតាម KNU ជនស៊ីវិលជាង ២០នាក់ត្រូវបានសម្លាប់នៅក្នុងខែមេសាតែមួយ បើទោះបីជាមានបទឈប់បាញ់ក្រោយគ្រោះមហន្តរាយរញ្ជួយដីក៏ដោយ។

ការវាយប្រហារនេះកើតឡើង ចំពេលដែលការវាយឆ្មក់តាមអាកាសរបស់របបយោធាមីយ៉ាន់ម៉ាកាន់តែខ្លាំងឡើងនៅទូទាំងប្រទេសមីយ៉ាន់ម៉ា បើទោះបីជាមានការសន្មត់អំពីបទឈប់បាញ់ដែលបានដាក់ចេញ បន្ទាប់ពីការរញ្ជួយដីរហូតដល់ចុងខែឧសភានេះក៏ដោយ។ ក្នុងនោះការវាយប្រហារដែលរងការថ្កោលទោសជាអន្តរជាតិគឺការវាយប្រហារដ៏សាហាវទៅលើសាលារៀនក្នុងតំបន់ Sagaing កាលពីថ្ងៃទី១២ ឧសភា ដែលបានសម្លាប់សិស្ស២២នាក់ និង គ្រូបង្រៀន២នាក់។

យោងតាមរដ្ឋាភិបាលឯកភាពជាតិ (NUG) យោធាមីយ៉ាន់ម៉ាបានធ្វើការវាយប្រហារតាមអាកាសចំនួន ៤៤៥លើកចាប់តាំងពីការរញ្ជួយដី ដែលបានសម្លាប់មនុស្ស ៤១៦នាក់នៅទូទាំងប្រទេស៕