ចិន សង់កប៉ាល់ចិញ្ចឹមត្រីសាល់ម៉ុន ដ៏អស្ចារ្យដំបូងគេលើលោក

ជាលើកដំបូងហើយលើពិភពលោក ដែលប្រទេសចិន សង់កប៉ាល់ចិញ្ចឹមត្រីសាល់ម៉ុន ជាមួយសមត្ថភាពអស្ចារ្យ បង្កការភ្ញាក់ផ្អើលយ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express នៅថ្ងៃអង្គារទី២៧ខែឧសភាឆ្នាំ២០២៥ កប៉ាល់នេះមានឈ្មោះ Su Hai No 1 ប្រវែង២៥០ម៉ែត្រ តម្លៃ ៨៣.៦ លានដុល្លារអាមេរិក សង់ដោយក្រុមហ៊ុន Huangpu Wenchong ក្នុងទីក្រុងក្វាងចូវ។

ហេតុផលនៅពីក្រោយការសង់កប៉ាល់នេះ ត្រូវគេបញ្ជាក់ថា គឺដើម្បីបំពេញឲ្យទាន់តម្រូវការត្រីសាល់ម៉ុន ដែលកំពុងមានការកើនឡើងយ៉ាងគំហុកនៅក្នុងប្រទេស និងជួយឲ្យខ្លួនលែងសូវពឹងផ្អែកលើការនាំចូលត្រីមកពីក្រៅប្រទេសដូចមុនទៀត។

លក្ខណៈពិសេសរបស់ Su Hai No 1 គឺថា កប៉ាល់នេះអាចបម្លាស់ទីបានយ៉ាងលឿន ដើម្បីចៀសវាងគ្រោះថ្នាក់នានាដូចជាព្យុះនិងសារាយពុលជាដើម ដើម្បីធានាសុវត្ថិភាពរបស់ត្រីសាម៉ុង។ លើសពីនេះ Su Hai No 1 មានបំពាក់ដោយប្រព័ន្ធកែច្នៃត្រីសាម៉ុងដោយផ្ទាល់ ដែលអនុញ្ញាតឲ្យដឹកជញ្ជូនត្រីស្រស់កែច្នៃ ទៅកាន់ទីតាំងទិញក្នុងប្រទេសចិន នារយៈពេលត្រឹមតែ២៤ម៉ោងប៉ុណ្ណោះ។

កប៉ាល់ Su Hai No 1 បានឆ្លងកាត់ការធ្វើតេស្តនៅលើសមុទ្រដោយជោគជ័យ ហើយគេរំពឹងថា វានឹងចាប់ផ្តើមប្រតិបត្តិការពេញលេញនៅដើមខែក្រោយនេះតែម្តង ជាមួយនឹងសមត្ថភាពផ្គត់ផ្គង់ត្រីសាល់ម៉ុនរហូតដល់ទៅ ៨ ០០០តោនក្នុងមួយឆ្នាំ។

សូមជម្រាបថា បច្ចុប្បន្ន ត្រីសាល់ម៉ុនជាង៨០% ដែលប្រើប្រាស់នៅក្នុងប្រទេសចិន គឺត្រូវពឹងផ្អែកលើការនាំចូល ដែលភាគច្រើនមកពីប្រទេសន័រវេសនិងឈីលី។

កាលពីឆ្នាំមុន ប្រទេសចិនបាននាំចូលត្រីសាល់ម៉ុនជាង ១០០ ០០០តោន ខណៈតួលេខនេះត្រូវគេរំពឹងថា នឹងហក់ឡើងដល់ជាង ២០០ ០០០តោននៅត្រឹមឆ្នាំ២០៣០៕

អត្ថបទ៖ សុខ សុវណ្ណ

ចុចអាន៖ ចិន ត្រៀមបញ្ចេញ យន្តហោះផ្ទុកដ្រូនដំបូងគេលើលោក ដ៏អស្ចារ្យ