ផ្ទុះឆេះ​រោងចក្រគីមីនៅចិន ស្លាប់មនុស្ស៥នាក់ បាត់ខ្លួន៦នាក់​ និងរបួស​ស្រាលច្រើននាក់​

យោងតាមការចេញផ្សាយរបស់សារព័ត៌មាន​ CNN នៅថ្ងៃទី២៨ខែឧសភានេះ ការផ្ទុះដ៏ខ្លាំងក្លាមួយ​បាន​កើត​ឡើង​​នៅឯរោងចក្រគីមី Shandong Youdao ក្នុងទីក្រុង Gaomi ភាគខាងកើតប្រទេសចិន បានសម្លាប់មនុស្សយ៉ាងហោចណាស់ ៥នាក់ និង​៦នាក់​ផ្សេង​ទៀត​​បាត់ខ្លួន​​។

យោងតាម​ការ​អះអាង​​របស់​អាជ្ញាធរក្នុងតំបន់ ហេតុការណ៍នេះបានកើតឡើងនៅពេលជិតថ្ងៃត្រង់កាលពីថ្ងៃអង្គារ ដោយ​បានបញ្ចេញផ្សែងពណ៌ប្រផេះ និងពណ៌ទឹកក្រូចយ៉ាងសន្ធោសន្ធៅទៅ​ក្នុងលំហ​អាកាស​​ និងបានធ្វើឱ្យខូចខាតអគារនៅក្បែរនោះ។

មនុស្ស ១៩នាក់ផ្សេងទៀតបានរងរបួសស្រាល ខណៈដែលរថយន្តពន្លត់អគ្គិភ័យចំនួន ៥៥គ្រឿង និងបុគ្គលិកសង្គ្រោះចំនួន ២៣២នាក់ត្រូវបានបញ្ជូនទៅកាន់កន្លែងកើតហេតុ។ មូលហេតុនៃការផ្ទុះនេះ នៅមិនទាន់ដឹងនៅឡើយ ដោយអាជ្ញាធរ​កំពុងបើក​ការ​ស៊ើបអង្កេត ខណៈ​កិច្ច​ប្រឹងប្រែង​ជួយ​សង្គ្រោះ​នៅតែបន្ត។

រោងចក្រគីមីនេះគ្រប់គ្រងដោយក្រុមហ៊ុន​ Himile Group ដែលផលិតថ្នាំសម្លាប់សត្វល្អិត ឱសថ និងសារធាតុគីមី។ រោងចក្រនេះបង្កើតឡើងក្នុងឆ្នាំ ២០១៩ ដោយ​​លាតសន្ធឹងលើផ្ទៃដីជាង ៤៦ហិកតា និងមានបុគ្គលិកជាង ៣០០​នាក់។

សាក្សី​​​ឃើញ​ហេតុការណ៍ដែលមានចម្ងាយរហូតដល់ ៦គីឡូម៉ែត្រ បានរាយការណ៍ថា បានមានអារម្មណ៍ថាមានរលកនៃការផ្ទុះដ៏គួរឱ្យតក់ស្លុត ធ្វើឲ្យបង្អួចបែកខ្ទេចខ្ទី និងខ្យល់បក់បោកយ៉ាងខ្លាំងនិងផ្សែងហុយពាសពេញតំបន់នោះ។

ឧបទ្ទវហេតុនេះក៏បានរំលឹកពីសោកនាដកម្មឧស្សាហកម្មកាលពីអតីតកាលនៅក្នុងប្រទេសចិន រួមទាំងការបំផ្ទុះនៅ Tianjin ឆ្នាំ ២០១៥ ដែលបានសម្លាប់មនុស្សជាង១០០នាក់ផងដែរ៕

អត្ថបទ៖ ប៊ុន សុភាព